1 Duuchchi Woddik Gootti Isira'eelik ardi Gibtse'n fuleexxe langaxxe woggake, langake agenjixxe taakkaxxe barra'n Siinaxxe qilla gammoojje giddo, afenshatike duunkaani giddo Muusee hiyyee qici: 2 «Labballo mitti mittingika summa ganati borreesitina'n Isira'eelika arda duuchcha isixxe gosa gosanaa'ninna isike mini mini hado'n lakko'i. 3 Atinna Aarooni Isira'eeli giddo hedheeka lame tomme wogganna yookaan iimi ga'ma hedheeka labballo, duule lola dande'aaka mitte mittenga isike qorbi qorba'n laakko'we. 4 Mitte mitte gosati mininaa'ni mitti mitti ifike min hadik sooreessi ha'nonni welti hedheexxi ha'noo gargarowwaal. 5 Ha'no'o gargaaraake mannik summi konnechchin butti'a hedheeken.

Roobelike gosatike mininaa'n, Sediyoorik beltti Elitsuur;

6 Simoonikenaa'n

Suurisedayik belti Selemi'eeli,

7 Yihudakenaa'n

Aminadaabik belti Ne'asoon;

8 Yisakoorinaa'n, Tsi'aarik belti Naatina'eeli;

9 Zabilonikena'n, Helonik belti Eli'aabi;

10 Yooseefixxa labbaxxa oose:

Efireemi darree'n Amihuudik belti Elishaama'i;

Minaase darree'n Fidasuurik beltti Gemali'eeli;

11 Biiniyaamikenaa'n, Gadeyoonik belti Abidaani;

12 Daanikena'n, Amisadayik belti Ahi'eezer;

13 Aseerikenaa'n, Ekiraanik belti Faagu'eeli;

14 Gaadikennaa'ni, Degu'elik belti Elisaafi;

15 Nefitaaleemik, Enaanik belti Ahiira'i.»

16 Kunni aridakenaa'n filemeeke, ifi ifixxe gosati minike edi annuwwa kada wodda insa'nenna Isira'eelixxe gosake akeekisanjuwwamman.

17 Muusenna Aarooni konnee insa'neek summi borreessemeeka manna aa'neexxi, 18 langake agenjixxe taakkaxxe barra'n, arda duuchcha ye'ne mitteba bukki assineexxi labballo gosa gosati mine mini'ninna insa'neeke mini mini hado'n lame tomme woggakanna yookaan eettene iimidarre hedheeka mitti mittingika summa borreessine. 19 Duuchchi Woddik Gootti Muuse'e ajajemmashshanni Muuse Siinaxxe qiilla Gammoojje giddo arda laakko'e.

20 Isira'eelika angafa Roobelixxe hortenaa'n duule lola dande'aak lame tomme woggakinna ookkonechchi iima hexxeexxe woggak laballi duuchchi ifi ifike gosatike mine'ninna ifi ifike mini hado'n borreessememmashshanni mitti mittingik summi borreesseme. 21 Roobelixxe hortenaa'n lakko'emeek shoole tommenna jaane kumanna onde dhibbaman.

22 Simoonixxe hortenaa'n, duule lola dande'aak lame tomme woggakinna ookkonechchi iima hexxeexxe woggak labballi duuchchi ifi ifike gosatike mine'ninna ifi ifike mini hado'n borreessememmashshanni mitte mittingik summi borreesseme. 23 Simoonixxe hortenaa'n lakkoo'emeek onde tommenna sallane kumanna sase dhibbamman.

24 Gaadixxe hortenaa'n duule lola dande'aak lame tomme woggakinna ookkonechchi iima hexxeexxe woggak labballi duuchchi ifi ifike gosati mine'ninna ifi ifike mini hado'n borreessememmashshanni mitte mittingik summi borreesseme. 25 Gaadixxe hortenaa'n laakko'emeek shoole tommenna onde kumanna jaane dhibbanna onde tommemman.

26 Yihudaxxe hortenaa'n duule lola dande'aak lame tomme woggakinna ookkonechchi iima hexxeexxe woggak labballi duuchchi ifi ifike gosati mine'ninna ifi ifike mini hado'n borreessememmashshanni mitte mittingik summi borreesseme. 27 Yihudaxxe hortenaa'n laakko'eemeek torbaane tommenna shoole kumanna jaane dhibbaman.

28 Yisakoorixxe hortenaa'n: duule lola dande'aak lame tomme woggakinna ookkonechchi iima hexxeexxe woggak labballi duuchchi ifi ifike gosati mine'ninna, ifi ifike mini hado'n borreessememmashshanni mitte mittingik summi borreesseme. 29 Yisakoorixxxe hortenaa'n laakko'emeek onde tommenna shoole kumanna shoole dhibbamman.

30 Zabilonixxi hortenaa'n: duule lola dande'aak lame tomme woggakinna ookkonechchi iima hexxeexxaa woggak labballi duuchchi, ifi ifike gosati mine'ninna ifi ifike mini hado'n borreessememmashanni mitte mittingik summi borreesseme. 31 Zabilonixxe hortenaa'n laakko'emeek onde tommenna torbaane kumanna shoole dhibbamman.

32 Yooseefixxi labbaxxi oose, Efireemixxe horte darrenaa'n duule lola dande'aak lame tomme woggakinna ookkonechchi iima hexxeexxe woggak labballi duuchchi ifi ifike gosati mine'ninna ifi ifike mini hado'n borreessememmashshanni mitte mittingik summi borreesseme. 33 Efireemike gosati mininaa'n laakko'emeek shoole tomme kumanna onde dhibbamman.

34 Minaasexxe hortenaa'n duule lola dande'aak lame tomme woggakinna ookkonechchi iima hexxeexxe woggak labballi duuchchi ifii fike gosati mine'ninna ifi ifike mini hado'n borreessememmashshanni mitte mittingik summi borreesseme. 35 Minaasexxe hortenaa'n lakko'emeek sase tommenna lame kumanna lame dhibbaman.

36 Biiniyaamixxe hortenaa'n duule lola dande'aak lame tomme wogga kinna ookkonechchi iima hexxeexxe woggak labballi duuchchi ifi ifike gosatike mine'ninna ifi ifike mini hado'n borreessememmashshanni mitte mittingik summi borreesseme. 37 Biniyaamixxe hortenaa'n lakko'emeek sase tommenna onde kumanna shoole dhibbamman.

38 Daanixxe hortenaa'n duule lola dande'aak lame tomme woggakinna ookkonechchi iima hexxeexxe woggak labballi duuchchi ifi ifike gosatike mine'ninna ifi ifike mini hado'n borreessememmashshanni mitte mittingik summi borreeseme. 39 Daanixxe hortenaa'n laakko'emeek jaane tommenna lame kumanna torbaane dhibbamman.

40 Aseerixxe hortenaa'n duule lola dande'aak lame tomme woggakinna ookkonechchi iima hexxeexxe woggak labballi duuchchi ifi ifike gosatike mine'ninna ifii ifike mini hado'n borreessememmashshanni mitte mittingik summi borreesseme. 41 Aseerixxe hortenaa'n laakko'emeek shoole tommenna mitte kumanna onde dhibbamman.

42 Nefitaaleemixxe hortenaa'n duule lola dande'aak lame tomme woggakinna ookkonechchi iima hexxeexxaa woggak labballi duuchchi ifi ifike gosatike mine'ninna ifi ifike mini hado'n borreessememmashshanni mitte mittingik summi borreesseme. 43 Nefitaalemixxe hortenaa'n laakko'emeek onde tommenna sase kumanna shoole dhibbamman.

44 Kunni Muusenna Aarooni, mitti mitting ifi ifike mini hadixxe tukke kade'emak tommenna lami Isira'eelik akeekisanjuwwi laakkoo'eemmake labballomman. 45 Konne qicinni Isira'eelik labballi wogga insa'neexxinna lame tommenna eettene iimidarre kadeek Isira'eelike sannachchinni duula dande'aak duuchchi ifi ifike mini hadi hadishshanni laakko'emme. 46 Duuchchingik laakkos mitteba jaane dhibanna sase kumanna onde dhibbanna onde tommeman.✝

47 Leewwik gosati mini minik haduwwi kinni wele gosati mininni welti laakko'emeemmabaan. 48 Tinninna Duuchchi Woddik Gootti Muuse'e hiyyee qici: 49 «Leewwika gosati mine laakkottoxxe'e yookaan laakkossa insa'neekanna wele Isira'eelike laakkosi giddo e'yishshoxxe'e. 50 Erttenexxa bado Leewwito galduma Kakotike Taabotikanna isi giddo hedheeke mi'uwwa duuchcha'n iittanni tennenni welti afendaaxxi heene yaanuwwa hana yaane uuddaake assi; insa'ne Taabotiinke gldumika Fooqaanna isi giddo hedheeka mi'uwwa duuchcha ba'e'nowwaal; isi giddonna ergatemmowwaal; ifi ifika duunkaani dowwe isixxe'n oltinowwaal. 51 Taaotinke galdumik duunkaan welebaa ke'aaxxa yanna Leewwito isoo goshshaan; mare geyaake booncho'ninna isoo ottaan; weli manji isibaa shiqoole kinni shiyemowwaal. 52 Isira'eelik manninna ifi ifike qorbinni ifi ifixxe kaanbe'n ifi ifika duunkaana ifi ifike baandiri bira oltaan. 53 Yaane kinni Isira'eelike orga'n aare ibbabaashsha Leewwito ifi ifika duunkaana Kakotike Taabotixxe galdumixxe dowwe'n oltowwaal. Galduma Kakotike Taabotixxi yaane uuddaak Leewaawwootaken.»

54 Tennexxee Isira'eeliki ardinna Duuchchi Woddik Gootti Muuse'n hiyyemmaxxa duuchcha asse.