1 Duuchchi Woddik Gootti Muuse'ninna Aarooni'n hiyyee qici, 2 Isira'eelik ardi kaambe giddo afenshatike duukaanixxe dowwe'n shiixxo qico bayyateexxi offo'laan; offo'laqicinna mitti mitting ifi ifike qorbike beesisi baandir hundanna ifi ifike gosati mini hundan.

3 Boroti darree'n arsho fuldamabaa'n Yihudak qorbi ifi ifike sanachchuwwinni ifi ifike bandiri hunda offo'laan; Yihudake ardik akeekisanji Aminadaabike belto Ne'asooniten. 4 Isike qorbike sannachchik laakkossi torbaane tommenna shoole kumanna jaane dhibbamman. 5 Insa'nenaa'n aaneexxi Yisaakoorike gosati mini offo'laan; Yisaakoorike gosati minik akeekisanjinna Tsi'aarike belto Naatina'eelite kadaan. 6 Isike qorbik sannachchi laakkosi onde tommenna shoole kumanna shoole dhibbamman. 7 Ookkoneechchi uduma Zabilonixxe gosati mini itti aanaan; Zabilonike gosatike minik akeekisanjinna Helonike belto Eli'aabitemman. 8 Isike qorbike sannachchi laakkosi onde tommenna torbaane kumanna shoole dhibban. 9 Duuchching mitteba Yihudaxxe Kaambe'n ifi ifike qorba'n laakko'eemeeke sannachchik laakkossi dhibbanna saddeeta tommenna jaane kumanna shoole dhibban. Insa'ne edinsee fullaan.

10 Bita'i darree'n Robelixxe kaambek qorbi ifi ifike bandiri hunda offo'laan; Roobelike ardik akeekisanjinna Sediyoorik belto, Elitsuurte kadaan. 11 Isike qorbike sannachchik laakkosi shoole tommenna jaane kumanna onde dhibban. 12 Insa'ne'n aaneexxi Simoonik gosatik mine ofo'laan; Simoonike ardike akeekisanjinna Suurisedayike belto, Selemi'eeliten. 13 Isike qorbike sannachchi laakkosi onde tommenna salane kumanna sase dhibban. 14 Ookkeechchi uduma Gaadike gosaki mini hadi itti aanaan; Gaadike ardik akeekisanji De'uuliki belto, Elisaafiten. 15 Isike qorbike sannachchik laakkosi shoole tommenna onde kumanna jaane dhibbanna onde tommen. 16 Duuchchiing mitteba Roobelixxe Kaambe'n ifi ifike qorba'n laakko'emeeke mannik laakkosi dhibbanna onde tommenna mitte kumanna shoole dhibbanna onde tommen. Insa'ne itti aanne fullaan.

17 Ookkoneechchi uduma Leewwito afenshatika duunkaana axxeexxi oddote'n me'itaan. Mitti mittingi kaambe giddo offo'lema qicinni ifi ifike bandir hunda me'aan.

18 Dhidhimi darree'n Efireemixxe kaambek qorbik sannachchi ifi ifike bandiri hunda offo'laan; Efiremike ardik akeekisanji Amihuudik belto, Elishaama'ite kadaan. 19 Isike qorbike sannachchi laakkosi shoole tomme kumanna onde dhibban.

20 Insa'nenaa'n itti aanaak Minaaseke gosati mine kadaan. Minaaseke ardik akeekisanji Fidadasuurike belto, Gemali'eelite. 21 Isike qorbike sannachchi laakkosi sase tommenna lame kumanna lame dhibban. 22 Ookkoneechchi uduma Biiniyaamik gosatik mini itti aanaan. Binyamike ardki akeekisanjinna Gadeyoonike belto, Abidaanite kadaan. 23 Isike qorbike sannachchi laakkosi sase tommenna onde kumanna shoole dhibban. 24 Duuchchiing mitteba Efireemixxe kaambe'n ifi ifike qorba'n laakko'emeeke labballik laakkossi dhibbanna saddeeta kumanna dhibbaken. Insa'ne sakkaba fullaan.

25 Middi darree'n Daanixxe kaambek qorbi ifi ifike bandiri hunda offo'laan; Daanike ardik akeekisanjinna Amisadayike belto Ahi'eezerite kadaan. 26 Isike qorbike sannachchik laakkossi jaane tommenna lame kumanna torbaane dhibban. 27 Aseerik gosati mini insa'ne'n itti aaneexxi offo'laan. Asserike ardik akeekisanjinna Ekiraanike belto, Faagi'eelite kadaan. 28 Isike qorbike sannachchi laakkossi shoole tommenna mitte kumanna onde dhibban. 29 Ookkoneechchi uduma Nefitaalemike gosati mini itti aanaan; Nefiitaalmike ardik akeekisanji Eenaanike belto Ahiira'ite kadaan. 30 Isike qorbike sannachchi laakkossi onde tommenna sase kumanna shoole dhibban. 31 Duuchching mitteba Daanixxe kaambe'n ifi ifike qorba'n laakko'emeeke labballik laakkossi dhibbanna onde tommenna torbaane kumanna jaane dhibban. Insa'ne baandira ifiki hunda he'neexxi udu'mine fullaan. 32 Kunni ifi ifike mini hado'ninna ifi ifike qorba'ni laakko'eemeke Isira'eelike ardan. Kaambe giddo ifi ifike qorba'n laakko'eemeek duuchching jaane dhibbanna sase kumanna onde dhibbanna onde tommeman. 33 Kaddo malee Duuchchi Woddiki Gootti Muuse'e ajajemmashshanni, Leewwito wele Isira'eelike ardinni welti laakko'endebaan.

34 Tennexxee Isira'eelik ardi Duuchchi Woddiki Gootti Muuse'e ajajemmashshanni duuchchiinxa asse; tinninna insa'ne kaambe giddo ifi ifike baandiri hunda ofollan, ifi ifike gosatike mininninna ifi ifike mini hadinni me'inaamman.