1 Gibtseke boganaa'n fulleexxe langaxxe woggake takkeessoke agenjo'n Duuchchi Woddik Gootti Siinaxxe qilla gammoojje giddo Muuse'n hiyyee qici, 2 «Isira'eelik ardi sa'atika ayyaana eettene murtesendeexxe yanna'n ulfeesowwaal; 3 Ayyaanakanna konne agenjixxe tommenna shoolgeessoxxe barra'n arishsho e'yitammaxxa yanna konne ayyaanike seerishshanna aadashshanni muxemowwaal» hiyye. 4 Tennexxee Muuse sa'atika ayyaana ulfesaashsha ardake'n kule. 5 Insa'nenna siretike agenjixxe tommenna shoolgeessoxxe baraa'n arishsho e'yitammaxxa yanna Siinaxxe qiilla gammoojje giddo sa'atika ayyaana ulfeessine; Isira'eelito Duuchchi Woddik Gootti Muuse'n ajajemmashshanni duuchchiinxa assitte.✝

6 Yaane kinni mitti mitti manni rensha tuqatenaa'n kexxeexxinni konne ayyaanike seersha batto'eeke kadeemmaxxee eettene barra'n sa'atika ayyaana ulfeesa dande'abaan; tennexxee kunni manni ettenee barra Muusebaanna Aaroonibaa dageexxi hiyyee qici: 7 «No'o rensha tuqatenaa'n kexxeexxa battooneennen; yaane kinni Duuchchi Woddike Goottika tolcha mayeeteta wele Isira'eelike manninni welti eettene murteesendeexxe yanna'n shiqinshabe'noshsha hoyyemaannek?»

8 Muusenna insa'ne'e, «Duuchchi Woddik Gootti ha'no'o uuddaaxxenni uwwaaka ajaja laqanno qico'n egerre» hiyye.

9 Ookkoneechchi uduma Duuchchi Woddik Gootti Muuse, 10 «Isira'eelito hitatto qici: ‹Ha'nonaa'n yookaan ha'nooxxe hortenaa'n huuni manjinna rensha tuqati batto'oole yookaan bayyi ora me'eexxe kaddoole Duuchchi Woddike Goottika sa'atika ayyaana ulfeessa dande'aan; 11 Tinninna langak agenjixxe tommenna shoolgeessoxxe barra'n arishsho e'yitammaxxe yanna'n ulfeessinuun; sa'atike ayyaanika korbeessanna gamami e'yebaaxxe bullexxe kebbonninna qaraaraake shafinni welti induun. 12 Sooda qico'n eettene itanaa'n mittichchonna gatinsoqe'e; ookkone korbeessixxe miqenaa'ninna mittetanna enqinoqe'e; sa'atika ayyaana ulfeessinaa wodda isike seerishshanna isixxe aadashsha ulfeessinowwaal.✝ 13 Yaane kinni manji mitti batto'ebaang yookaan ora bayya me'ebaang sa'atika ayyaana ulfesebaang gatoole murteesendeexxe yanna'n Duuchchi Woddike Gootti'a tolcha shiqisha gopheemmaxxee iikki manji anke ardi giddi'n gargar uudemaan; iikki manji ifixxe cubboka hiranna adhdhaan.

14 « ‹Ha'noo giddo hedheek alagi manji Duuchchi Woddike Goottika sa'atika ayyaana ulfeessa hasoole sa'atike ayyaanika seeranna aadda isi muuxa hassissaan; bogiinke manji'anna kado'o alagakee kunni seeri mittengen.› »

15 Taabotiink galdumi otemeexxa barra duumanchi afenshatika duunkaana buqe; galgalinaa'n sooda qico'n Taabotiinka galduma buqeemmak duumanchi giira laba'nemman. 16 Tinni konnee qicinni iitta kadda'n me'ite; duumanchi Taabotiinka galduma buqe; hashshanna giiratixxe bifa afeemman. 17 Duumanchi duunkaanakenaa'n ke'aaxxe yanna duuchcha'n Isira'eelito me'a saffa'emman; Duumanchi urreexxe bakka duuchcha'ninna Isira'eelito kaanbe abixxitee ofolda'nemman. 18 Duuchchi Woddike Goottike ajajinni Isira'eelik ardi ke'e me'a'nemman; isike ajajininna me'a waale afo'la'nemman; duumanchi duunkaani iima turaaxxe yanna duuchcha'n insa'nee ookkone ofolleenge olla'i giddo turra'nemman. 19 Duumanchi duunkaani iima heddo barra turoolenna Isira'eelik ardi Duuchchi Woddike Goottika ajaja heqedhaama malee ke'exxi me'aammabaan. 20 Mitte mitte yanna duumanchi heenoxxe barra calla duunkaani iima tura'nemman; eettene yannanna insa'ne Duuchchi Woddike Goottike ajajinni ke'ne me'inaan; isike ajajinninna me'a waalle afollaan. 21 Mitte mitte yanna kinni duumanchi galgalinaa'n gorsi qico calla'n tura'emman; duumanchi gorsa ke'aaxxe yannanna me'a ke'naan; barrate kaddo'a hashsha duumanchi ke'oole ke'nee me'inaan. 22 Duumanchi duunkaani iima lame barranna kaddo agenjoke, yookaan qeerraxxa yanna turoole Isira'eelik ardi ofo'leemanxe kaanbe'n turaa malee ke'e me'aamabaan. Duumanchi seematik dunkaanakenaa'ni ke'aa wodda insa'ne ke'ne me'inaaman. 23 Duuchchi Woddike Goottike ajajinni Isira'eelik ardi ke'ee me'a'nemman; isike ajajinninna me'a waale afo'la'nemman; Insa'nenna Muuse darree'n uwwemeemmaka Duuchchi Woddike Goottika ajajuwwa heqe'naamman.