1 Iyyaariko wido Yordaanoosike galaani bira Mo'aabike diidda'ni Duuchchi Woddik Gootti Muuse'ni hiyyeeqic, 2 «Isira'eelito dhaaldaake qadaadinaa'n Leewwitote'e hexxaaka qachchuwwa insa'ne'a uunaashsha Isira'eelika arda ajaji; qachchuwwi qarqaranna hori bobbaalsatika boganna insa'ne'a uwwee. 3 Iikki qachchuwwi insa'ne he'naake kadaa wodda, hori bobba'ak bogi kinni insa'neeke lali'a, gedhebi'a, re'uwwa'anna wele horuwwike galduma'a kadaan.

4 «Qachchi qarqara Leewwitotee uutinaak horiinxe bobba'iik bogi, ookkone qachchinke dalla'ii'ni mitte kuma ciqile kadowwaal 5 Iitanni qachchi oddo gateena'a dhidhimi darree'ni lame kuma ciqile, bita'i darree'ni lame kuma ciqile, boroti darree'ni lame kuma ciqile, middi darree'ni lame kuma ciqile qachchakenaa'n gadhi'a mike; Insa'ne'e konnee boonchuwwa qachchiinka hore bobba'atixxe bakka asse'naan.

6 «Leewwitotee uutinaake qachchuwwana'ni jaani, manjo anga sa'eeki manji baaje ofo'laake gollatatike qachchuwwa kadaan. Higgeenni shoole tommenna lame qachcha insa'ne'a uwwe. 7 Hore bobaalsinaake quchchuwwinnin mitteba shoole tommenna saddeeta qachcha Leewwitote'e uwwe. 8 Isira'eelik ardi dhaaleke boginaa'ni Leewwitotee uutinak qachchuwwi mitti mittenge gosa gosak mini hadi afeeke qadaadixxe qixxe'n kadaani. Hoddo laakkossike gosatike mininaa'n heddo qachchuwwa, heenoke laakkossikenaa'n kinni shiixxoka qachchuwwa aaxxine uwwe.»✝

9 Ookkoo'ni Duuchchi Woddik Gootti Muuse'e hiyyeeqic: 10 «Isira'eelika arda hitattoqic, ‹Kenaanike bogiba'a e'yatee Yordaanoosika galaana fooffinaa wodda, 11 danoti manjo anga sa'eeki manji baaje ofo'laaka qachcha kadaashsha golatatika qachchuwwa fi'le. 12 Kunni qachchuwwi mitti lubbo manjiinxa balleesek manji ardiinxe oddo'ni murtete'e shiqebaa edo reyabaashsha halo fulammakena'ni gollataake qachchuwwa kadaan. 13 Kunne Leewitote uutina'naake quchchuwwinaa'n jaani ha'noke golatatike qachchuwwa kadaan. 14 Tennexxe'e sase Yordaanoosik galaani kayya ittanni sase Kenaani giddo gollatike qachchuwwa kado'a uwwe. 15 Danoti manjo anga sa'eeki huuni manjinna baaje giddo ofo'laak kunni jaani qachchuwwi Isira'eelike ardi'a, alagakeenna insa'e giddo hedhaake wele ardi'a gollatatike qachchuwwa kadaan.

16 « ‹Mitti manji wele manjo reyaashsha sibiljik ganoole isi mundiinke manjon; isinna shiyemaan. 17 Yookiin mitti manji manjo shiya dande'aake kinjinni manjo reyaashsha ganoole isi mundiinke manjon; isinna shiyemaan. 18 Yookaani mitti manji manjo shiya dande'aake haqichchinni mitte manjo reyaashsha ganoole isi mundiinke manjon; isinna shiyemaan; 19 Shiyememmake manji'a halo fulammak manji ookkone'e anga sa'emmaka manjo shiyowwaal; isinni afemeexxa yanna isoo'o shiyowwaal. 20 Mitti manji ege'na'ni mitte manjo gibati dhiibe ibisoole yookaani reyaasha miselcho iso'ni darboole, 21 yookaani iso gibiyyoti angati ganee'na'a reyoole, ikki manji shiyemowwaal; isi mundiinke manjoni; shiyemeeke'e halo fulammak manjichchinna isinni afemeeba iso'o shiyowwaal.

22 « ‹Yaane kinni naaphummatite kadde'ebaang dedhik mitti manji mitte dhiibe ibisoole yookaan dedhange'n miselcho iso'ni darboole, 23 yookaan shiya dand'aaka kinjo iso'o afebaang mitte manjo'n darbee'na reyoole, naapha isike kadagopheemmaxxenna iso'o miidho'a ege'na'n asseeke kadagophemmaxxe, 24 Tuutatinna konne manjichcho'ninna shiyemeeke'e halo fulammakixxe oddo'ni murte uutaak, shiyemmakixxe'ninna halo fulammakixxe oddo'n uwwememmake seeruwwixxe aadannite kaddaan. 25 Tuutatinna manjo anga sa'ati ku'lemeeka manjichcho halo fulammake manjichchixxe anganaa'n gatisiyyoti baajemmake gollatatike qachchiba'a iso'o illeema hissitowwaal; woyyitte zayitenni hariirememmak qeesooletik sooressi reyaaqico'n ookkonni turowwaal.

26 « ‹Yaane kinni manjo anga sa'ati ku'lemeek manji, baaje ofo'la'neeke gollatatike qachchixxe gabala gadho baaje fulee'naa'a 27 halo fulammakinna qachchiinxe gabala gadho isinni afemoole ookkone'e ku'lemeemmaka shiya dande'aan; mundii manjo kadatinna laqemabaan. 28 Anga sa'ati ku'lememmakinna qeesoletik sooresi reyaaqico'ni gollatatike qachchi giddo turowwaal. Isi ifike qadaadiba'a higa dande'aak qeesoletik sooresi reyeechchi uduman callan.

29 « ‹Yoona tinni seeriinxi aada hexxinaake boga duuchcha'n ha'no'anna ha'nooxxe ila ila'a galdumake kaddaan.

30 « ‹Manjo anga sa'eeki huuni manjinna reyo iso'ni murendaaki dhuga'a kuldoole callani; kaddomale huunni manjinna mitti manji dhuga'a kuleexxe callinni shiyyemabaan.✝

31 « ‹Manjo anga sa'at shiyema hasissaake manjixxee lubbotika hira aaxxinoqqe'e; isi shiyyemuun; gatiyyo hasissabaan.

32 « ‹Golatatike qachcha'n baajeexxi e'yeeke, hoone manjixxeenna lubbotika hira adhdhiyyoti qeesoletik sooressi reyebaa edi darre ifike bogiba'a illeema higeexxi ookko hedhaashsha assitinoqqe'e.

33 « ‹Munde boga battoossitammaxxee, munde dundeeke bogixxa cubbo bira dandeessissaak wele manjixxe mundennite kadebaak ookkone mude dunemmake manjichchixxe munde callinnite kaddemmaxxe'e, giddo hexxineeka boga mundeti battoossitinoqqe'e. 34 Ani Duuchchi Woddik Gootti ha'no'o Isira'eelike ardi giddo hedha'annaxxe'e, ha'no hexxinaaka boga aninna giddo galaanneka battoossitinoqqe'e hiyyi› » hiyye.