1 Gele'adi'i Makiri'i, Minaase'e Yooseefike gosatike mini mini hadik akeekisanjuwwi Muuseba'anna Isira'eelitotike mini haduwwike akeekisanjuwwa kadeeke manniba'a shinqeexxi, 2 hine qic: «Ookkone hixiki Isira'eelike ardi'a qooddota'a Duuchchi Woddiki Gootti atee'e gootta no'oka ajajeeshanni dayyo no'oke Selephe'adika qadaada dubaara isikee uutattoshsha ajaje'eeni. 3 Ta'a insa'ne wele Isira'eelixxe gosa gosatike minike manna'n heerummoole, qadaadi insa'neek no'oke annuwwike qadaadinaa'n adhdhemeexxi insaa'ne heerummemmake mannike gosatike minuwwike qadaada'n lebemaan. Iittate kaddoole kinni hixik no'o'o geyeemmaak qadaadi no'o'a heeno'mo'aaten. 4 Isira'eelitotik Iyyobelyuxxi woga daggaa wodda Slephe'adeke dubarrik qadaadi insa'neke aro'uwwike gosatike minike qadaada'n lebemaan; iita kaddoole insa'neek qadaadi no'ok annuwwike gosatike minike qadaadinaa'n adhdhdhemaan» hine.

5 Ookkonechchi uduma Muusse Duuchchi Woddiki Gootti iso'o kulemmaxxa Isira'eelika arda hiyye ajajee qici: «Yooseefike gosatike minixxi horte haasotteek haaso'i dhugaaten. 6 Tennexxe'e Selephe'adika dubaarra uuddaaxxenni Duuchchi Woddiki Gootti: insa'nee ifike annike gosatike mine kadeeke eeneeke manjo'ninna heruma dandeennaan. 7 Mitti mitting Isira'eelichchi edike ifike annuwwinaa'n dhaalemaake qadaada'ninni gatowwaal. Isira'eeli'n mitte gosatike mininaa'n mitte gosatike miniba'a sa'aak qadaadi hedhebaan. 8 Mitti mitting Isira'eelichchi ififike anuwwika qadaada dhaaliyyo hasissaammaxxee, hoone Isira'eetotike gosatike mini giddo qadaada dhaaldaaxxi dubarcho ifike annixxe gosake minike manjo'n heeruma hasissaan. 9 Mitti mitting Isira'eelitotik gosati mini dhaalemmake qadaada'n gatiyyo hasissaammaxxe qadaadi mitte gosatike mininaa'n mitte gosatike miniba'a sa'abaan.»

10 Tennexxe'e Selephe'adik dubarri Duuchchi Woddiki Gootti Muuse'e ajajemashshanni asse. 11 Selpha'adike dubar Mahilahi, Tirtsa, Hogila, Milkanna Nu'a anna ifike dayyuwwixxe oose'n heerumme. 12 Insa'ene Yooseefika belto Minaaseke gosatike minixxe horte'n heerummeemmaxxee qadaadi insa'nek anna ifikixxe gosatike minike qadaadi giddo gate.

13 Iyyaariko widdo Yoridaanoosike galaani bira Mo'aabike diida'ni Duuchchi Woddiki Gootti Muuse darree'ni Isira'eelitote'e uwweeki ajajuwwinna seeruwwi konneten.