1 Duuchchi Woddik Gootti Muuse'e hiyyeeqic, 2 «Isira'eelika arda hite ajajatoqic: ‹Geego ha'nooke kado'a qoodendinaake Kanaanike boga'n aagginaa wodda, ha'noonna Kenaanike bogiba'a e'yitina wodda konne bogixxi gabaluwwa konnechchinni butti'a hexxeexxen.

3 « ‹Bita'ixxi ha'nooxxi gabala Eedoomixxe gabala'n hexxeexxe Tsiinixxe Qiilla gammoojjenaa'n heenoba lebbaan; boroti darree'n ha'nooxxi bita'ixxi gabala Maxinetixxe Abbaayyanaa'n kexxeexxi 4 Aqirebimika qettellinne qaxxamurate'e Tsiinqico marte gelta'n bita'i darree'n Qaadesi Barneqico'n me'itaan; ookkoo'ninna kexxeexxi Hatser Adarii'n saxxe'e Atsimoonqico'n gelta'n. 5 Atsimooni'n wirri hiteexxi Gibtseke galaanixxe bagoxxe bakka dhooqanni welti afenda'n Meediteraanixxa Abbaayya'n marete uurritaan.

6 « ‹Ha'noxxi dhidhimiinxi gabala kinni Lumoxxe Abbaayyake kasa kadaan; dhidhimi darre'n hexxeexxi ha'noxxi gabala tennenden.

7 « ‹Ha'nooxxi middi darrexxi gabala Lumoxxe Abbaayyanaa'n Hoorixxe Koobaqico'n gabalatika beessisa ugge; 8 Hoorixxe Koobanaa'n Hamaati'a e'yinama qico'ni martee geltaan; ookko'ninna gabalatinna Tsidaadiqico marte geltaan, 9 Zifirooniqico'n me'iteexxi Hatsari'ena marte uurritaan; middi darrexxi ha'nooxxi gabala tenneten.

10 « ‹Boroti darrexxe ha'nooxxe gabala'anna iittanni Hatsari'enanaa'n Seefamaqico'n gabalatika beessisa ugge. 11 Gabalatinna Seefamaa'n kexxeexxi Ayinii'n borroti darre'n hexxeexxi Ribilaxxa adaddeshummaqico'n dirriteexxi Kinereetixxe Abbaayyanaa'n boroti darre'n hexxeexxe gooruwwaqico marte geltaan. 12 Gabalatinna Yordaanoosika galaana abide me'iteexxi marte Maxinetixxe Abbaayya'n uurritaan.

« ‹Yoona ha'nok bogi qarqake'n iske'n hexxeexxe gabaluwwaninni welti konneten.› »

13 Muuse Isira'eelika arda hiyye ajajeqic: «Kunni bogi geego ha'noke kado'a hixik qoodemme; Duuchchi Woddik Gootti kunni bogi sallanekanna gamisa gosatike minuwwi'a uwwemaashsha muredheen. 14 Tinnanna Roobelike gosati minik mini haduwwi, Gaadike gosat minikinna iittanni gamisa Minaaske gosatik mini haduwwi ifi ifika geego adhdhineemmaxxeeten. 15 Kunni lami gosatik mininna gamisi gosatik mini Yordaanoosi'n borotidarre'n Iyyaariko wido arsho fuldammaddarre'n ifi ifika geego adhdhine'een» hiyye.✝ 16 Duuchchi Woddik Gootti Muuse'e hiyyee qici, 17 «Bogichcho ardakee geegoke kado'a qoodake mannik summi konnechchinni butti'a hedheeken: qeesichchi Ali'aazaarinna Newek belto Iyyaasute. 18 Ookkone boga qooddoke'n gargaraak gosa gosatike mini minii'n mitte mitte akeekisanjo aadhdhe. 19 Ookkone mannik summuwwi: Yihudake gosatike mininaa'n Yofoonika belto Kalebi'i, 20 Simoonike gaosatike mininaa'n Amihuudika belto Selami'eeli'i, 21 Biiniyaamixxe gosatike mininaa'n Kisoloonika belto Elidadi'i, 22 Daanike gosatike minik akeekisanjo Yugiika belto Buqi, 23 Yooseefika belto Minaaseeke gosatike minenaa'n sooreesa Sufeedika belto Ani'eeli'i, 24 Yooseefika belto Efireemike gosatike minina'n akeekisanjo Shifixxanika belto Qemu'eeli'i, 25 Zabilonike gosatike mininaa'n akeekisanjo Fernak belto Elisaafaanii'i, 26 Yisakoorike gosatike mininaa'n akeekisanjo Hoozaka belto Felixi'eeli'i, 27 Aseerik gosatike mininaa'n akeekisanjo Seeleemika belto Ahihuudii'i, 28 Nefitaalemike gosatike mininaa'n akeekisanjo Amihuudika belto Feda'eeli'i.»

29 Kunni Kenaanik bogi giddo Isira'eelike manni'a geego qoodaashsha Duuchchi Woddik Gootti ajajeeke mannan.