1 Siretike agenjo'n Isira'eelik duuchching orgi Tsinixxe qiilla gammoojje giddo dageexxi Qaades offo'le; ookko Maaryaami rerte, ookkonna moogende.

2 Eettnee yanna, orgakee wodi'i hedhemmaba'a ardikinna Muuseenna Aaroonii'i aallachchoti bukki hiyye. 3 Ardikinna Muuse'n ke'e hiyyee qici, «No'ok dayyuwwi Duuchchi Woddike Goottike dunkaani edo reyyeemma wodda maa hedhema silaati no'onna eettene yanna renneennele. 4 Duuchchi Woddike Goottika orga kaba iyyedagineechchi mayaate! Hore no'okenni no'o kaba mundonnaatee? 5 Gibtsee'n no'oo fulchitineexxi midha yookaan balase, woyine yookaan roomaane hexxebaake konne rakkichcha booncho'n no'oo mayee iyyedaggine? Ha'watee midde wodi'i gophemaa!»

6 Muusenna Aarooni ardi giddii'n ke'ne'e afenshati duunkaanixxe wuddumebaa marreexxi albik gonbissemme; Duuchchi Woddike Goottik ulfinninna insa'ne'n leelle.

7 Duuchchi Woddik Gootti Muuse'n, 8 «Siqqichcho aadhi, dayyo atike Aarooninni arda bukki asse; insa'ne uunda'naa'a eettene rassa'n haasso'we; iitti rassanna wode'e fulchitaan; ati ardakee rassatenaa'n wode'e fulchitee'na'a insa'nenna insa'nek hor ha'waan.»

9 Tennexxee Muuse ajajemeemmashanni Duuchchi Woddike Gootti edii'n eettenee siqqichcho aadhe.

10 Isinna Aarooni arda, eettene rassa edo bukki assine; Muusenna arda, «Koo ha'noo jallichcha mannaa caaqasse; no'o ha'noo'a tenne rassanaa'n wode'e fulchiyya hassissama'a?» Hiyye. 11 Ookkoneechchi uduma Muuse anga qophphi asseexxi siqqichchoti rassa lamele gane; wodi'ikinna rassatenaa'n phu'isee'naa'a, ardi hore ifike duuchchinni ha'we.

12 Yaane kinn Magen Muusenna Aaroonii'i, «Isira'eelike aridi edo anee'e woyyuma anxee'e ulfesatee ane'n amana gophineemmaxxee, tenne tuuta insa'ne'a uwwanneke boga'n iyyemartine geessissinabaan» hiyye.

13 Isira'eeliki manni Magenik welti lolemeebi, isinna woyyumma ifixxa insa'nexxe oddo'n leellisheeb konne Meribake wodeemman.

14 Muusse Eedoomike Moyanjiba'a Qaadesii'ni erganjuwwa hiyyeexxi ergee qici: «Dayyi atiki Isira'eeli, hiyya'nee qici: no'o'n gelteexxa rakko duuchcha laqqeetten; 15 Edik no'ok annuwwi adadde Gbitse'a me'een; no'onna ookko heddo wogga turrenne; Gibtsek manninna no'oonna annuwwa no'oka jaba qicinni rakkise. 16 No'onna no'oo gargaaraashsha Duuchchi Woddike Goottiba'a raarree'na'a, isi raare no'oxxa laqe'e iimika erganjo ergeexxi Gibtsee'n no'oo fulche.

«Ta'a no'o he'nennebi, kaba atike bogixxe galchake kasa'n hedheeke Qaadesike qachcha'nten. 17 Tennexxee atike bogi giddii'n sa'nonna'aa maganneten eeti no'aa uwwi; hoone fichchi giddi'aanna yookaan woyinetike hiddichchi giddi'a gorrabe'non; heene baleka wode'enna ha'winabe'non; moyanjiinka lumoka ora abixxine me'a malee'e galcha atixxe giddii'n me'ine sa'nano qico midda bita'aa gorrabe'non.»

18 Yaane kinni Eedoomito, «Kabaa'n saxxinaba'a; sa'nee me'innannon hitina'neexxe kaddoole googessine, fullee'e ha'noo wolantichchik birranno» hite.

19 Isira'eelik aridinna, «No'o'o badaasuma ora abixxine me'innannon, akimagaada no'o yookaan hori no'ok ha'nooka hoonee wode'enna ha'woole, hira ha'noo'a uunnannon; no'o lekka callinni giddii'n sa'nee me'a malee'e weli mittichchi hansannolchi hedhebaan» hiyyeexxi hiisse haaso'e.

20 Eedoomito langaxxa, «Kabaa'n saxxinaba'a!» Hiyyaaka hiissichcho insa'ne'n hiisite haasote.

Ookkoneechchi uduma Edoomi heddo jajjabba loliinka manna adhdheexxi insa'nee lolo'a fule. 21 Eedoomik manni ifi bogi giddii'n sa'ne me'inabaashsha hoyyemmaxxe tenne buutto'a Isira'eelik manni insa'nebaa'n ille iima hige.

22 Isira'eelixxi duuchchiinxi tuuta Qaadesii'n kexxeexxi Horexxe Koobaba dagge gelte. 23 Duuchchi Woddike Goottinna Eedoomixxe gabala bira hexxeexxe Horexxe Kooba'n Muusenna Aaroonii'i hiyyee qici: 24 «Arooni Isira'eelike manni'a uwwannoke boga'n e'yabaan; ha'no lamiing Meriibake wode'n ajaja anke'n jallittineemmaxxee Aarooni reyaan. 25 Aarooninna belto isika Ali'aazaarii'i aaxxetexxi Horexxa Kooba qabati. 26 Aarooni reyemake ifike hadibaa bukki hiyyaammaxxee'n isixxe qeesummaxxa seemma isii'n fulchiteetexxi Ali'aazaar belto isike'n oddeessi; Aarooninna ookko reyaan.»

27 Muuse Duuchchi Woddiki Gootti isoo'o ajajemmashshanni asse; duuchchiinxi tuuta insa'ne'e uda'naa Horexxe Kooba qabante. 28 Muusenna Aaroonixxa seemma fulcheexxi isika belto Ali'aazaari'n oddeesse; Aarooninna ookkonni koobatixxe xungo hana reye; ookkoneechchi uduma Muusenna Ali'azaari kobatinaa'n dirrine. 29 Duuchchiinxi tuuta Aarooni reyeexxa egendeexxi Isira'eelik manni duuchchi sase tomme barra isi'a oodhe.