1 Duuchchi Woddik Gootti Muuse'e, 2 «Isira'eelike arda ‹Fishshe ane'e gammachiissaashsha ita giirate'n ani'a tolchendaaxxa ita murendeexxe yanna'n ani'a shiqqishshe› hite'e ajaji. 3 Lebbettexxi insa'ne'e hitattoqic: ‹Duuchchi Woddike Gootti'a giirate'n tolchitinaak tolchi konnechchinni butti hedheeken: lame fafa afebaaka mitte mitte woggaka gedhebiinka buruusa barra barra'n shiqamake cincatike tolchi'a barra brra'n shiqishshe. 4 Mitte buruusa gorsa mitte kinni galagala shiqishshe; 5 mitte mittenge buruusinni welti tumeme qulleessemeeke ejersixxa mitte liitire zayitenni qushshendeexxa mitte kiilo eloxxe bullenni midhatika tolcha qophpheesse. 6 Kunninna fishshe isixxi gamachchisaake giirate'n Duuchchi Woddike Gootti'a shiqaake tolcha kada wodda Siinaxxe kooba'n muremeeke barra barrake ciincesemaake tolchan. 7 Siretike buruusinni welti mitteba shiqaak ha'watik tolchi danfite fuldeexxe mitte liitireke ha'wo kaddaan; ha'watika tolchanna woyyitte bakka'n Duuchchi Woddike Gootti'a dhangalaasse. 8 Langaka ookkonee buruusa gorsika tolcha qophpheessitinemmaxxe biffa'ni midhatike tolchinninna ha'watike tolchinni welti galgala qophpheesse; isinna fishshe Duuchchi Woddika Gootta gammachchiisaake giirate'n shiqaake tolchan.

9 « ‹Edi Sanbatixxa barra mitte mitte woggaka fafa mitte afebaaka lame gedhebiinka buruusa welti shiqammake ha'watike tolchinna midhatike tolchi'a zayiteti qushshendeexxa lame kiilo eloxxe bullenni welti shiqishshe. 10 Kunni ha'watike tolchinni welti barra barra'n shiqammak ciincatike tolchi lebeme edi sanbatixxa barra shiqaake ciincatike tolchan.

11 « ‹Agenji agenjiinxe sirtixxe barra'n fafa afebaaka lame jibichcha, mitte gedhebiinka korbeesanna torbaane mitte woggaka gedhebiinka buruusa ciincatike tolchi'a Duuchchi Woddike Gootti'a shiqishshe. 12 Mitte mittinge jibichchinni welti midhatike tolchi'a zayiteti qushshendeexxi sase kiilo eloxxi bulle, gedhebiinke korbeessinninna welti midhatike tolchi'a zayiteti qushshendeexxi lame kiilo eloxxi bulle shiqqaan. 13 Iittanni mitte mittenge gedhebiinke buruusinni welti midhatike tolchi'a zayiteti qushshendeexxa mitte kiilo eloxxa bulle shiqishshe; kunninna ciincatike tolcha kadaa wodda fishshe isixxi gammachchisaake giirate'n Duuchchi Woddike Gootti'a shiqaake tolchan. 14 Mitte mittinge jibichchinni welti ha'watike tolchi'a lame liitire woyinetixxa booka shiqqowwaal; gedhebiinke korbeessinn welti mittenna gamisa liitire, mitte mittinge gedhebiinke buruusinninna welti mitte liitire woyinetixxi booka shiqqowwaal; kunninna agenji agenjiinxe siretixxe barra'n wogga duuchcha shiqaake ciincatike tolchan. 15 Ha'watike tolchinni welti barra barra'n shiqammake ciincatike tolchi gadhidarre mitti re'etik korbeessi cubbotike tolchi'a Duuchchi Woddike Gootti'a shiqowwaal.

16 « ‹Taakkaki agenji e'yeexxe tommenna sholgeessoxxe barra'n Duuchchi Woddike Goottik sa'atik ayyaani ulfeessemaan. 17 Konne agenjixxe tommennna ondeessoxxe barra'n ayyaanake kadaan; torbaane barra gamami makemebaaxxe bullexxa kebbo itte. 18 Ayyaaniixxe taakkeessoxxe barra'n magenoffachchotee bukki hiyye; mittelchonna eetene bara'n hujjinoqqe'e. 19 Fafa afebaaka lame jibichcha, mitte gedhebiinka korbeessanna mitte mitte woggaka torbaane gedhebiinka buruusa cincatike tolchi'a Duuchchi Woddike Gootti'a shiqishshe. 20 Mitte mittinge jibichchinni welti midhatike tolchi'a zayiteti qushshendeexxa sase kiilo eloxxa bulle; gedhebiinke korbeesinninna welti lame kiilo eloxxa bulle shiqishshe. 21 Torbaaninge gedhebiinka buruusa, mitti mittingenninni welti mitte kiilo zayiteti qushshendeexxa sase kiilo eloxxa bulle shiqishshe. 22 Iitanni cubbo biratee mitte re'etika korbeesa cubbotike tolchi'a shiqishshe. 23 Konnechcho duuchcha barra barra'n gorsa gorsa shiqamake ciincatike tolcha'ni lebbine'e shiqishshe. 24 Konneqici'n fishshe Duuchchi Woddika Gootta gammachchissaaxxe itaka tolcha barra barra'n torbaane barra'a giirate'n qophpheesse; kunninna ha'watike tolchinni welti barra barra'n shiqammake ciincatike tolcha'n lebemeexxi shiqaan. 25 Torbeesoxxe barra baro magenooffachchote'e bukki hiyye; mittelchonna eettene barra'n hujjinoqqe'e.✝

26 « ‹Torbaane torbuwwa'n ulfessemaake ayyaana'n haaroxxe midhaka umo Duuchchi Woddike Gootti'a shiqishshinaake haaroxxe gummaxxe uumixxa barra magenooffachchote'e bukki hiyye; mittelchonna eettene barra'n hujjinoqqe'e. 27 Lame jibichcha, mitte gedhebiinka korbeessanna torbaane mitte mitte woggaka gedhebiinka buruusa fishshe Duuchchi Woddika Gootta gammachiissaaka ciincatika tolcha shiqishshe. 28 Mitte mittenge jibichchinni welti midhatike tolchi'a zayiteti qushshendeexxa eloxxa sase kiilo; gedhebiinke korbeessinni welti lame kiillo eloxxi bulle shiqqaan. 29 Torbaaninge mitte mittinge gedhebiinke buruusinni welti midhatike tolchi'a zayiteti qushshendeexxi mitte kiilo eloxxi bulle shiqqowwaal. 30 Iittanni ha'noxxa cubbo biratike tolchi'a kadaashsha mitte labakka re'etika korbeesa shiqishshe. 31 Konnee duuchcha, ha'watike tolchuwwa'n lebbine'e barra barra'n shiqammake ciincatike tolchininna midhatike tolchinni shiqishshe; iikki shiqishinaak hori fafa afeeke kadabaashsha kokke.✝