1 Mageni Muuse, 2 «Isira'eelika arda, manji mitti Magenoke werreega werreegee'na itti yaane kaddaa wodda werreegemmaki manji manjo uwwo'a werrego'ole manjo gatilsatika hira ati hitatoshsha kedee'na 3 Woyyichcha galmike mikisanjixxe qixxe'ni lame tomme wogganaa'ni jaane tomme wogga geyaake labbake manji'a jaane dhibba giraama geyaaka birretika sibiljo uunowwaal; 4 Lame tommenaa'ni jaane tomme wogga qico'ni hexxeexxe meyyaxxee sase tomme giraama kadaaka birretika sibiljo uunowwaal; 5 Onde woggana'ani lame tomme wogga qico'ni hedheeke labbake manji'a lame tomme giraama kadaaka birretike sibiljo uuwnowwaal; iittanni tenne wogga'ni hexxeexxe mayyaxxee sase giraama kadaaka birretike sibiljo uunowwaal; 6 Mitte agenjinaa'ni onde wogga kadaake labbake manji'a onde giraama kadaaka birretika sibiljo, iittanni tenne wogga'ni hexxeexxe meyyaxxee sase giraama kadaaka birretika sibiljo uunowwaal; 7 Wogga isixxi jaane tomme iima kadaake labbake manji'a tommenna onde giraama kadaaka birretika sibiljo, ittani wogga isexxi jaane tomme iima kaddaaxxe meyyaxxee tomme girrama kadaaka birretika sibiljo uunowwaal.

8 «Werreegemmaki manjichchi konne qico uwwattee dande'a gophoole werreege uwwemmaka manjo qeesichchiinba iyyedagowwaal; qeesichchikinna werregemmaki manji uwwo'a dande'aa qico uudeexxi uwwaashsha assowaal.

9 «Werregemeeki hori Magenoke tolcha kadaake hore kadoole gatilsatika hira uunabaan; Magenoke shiqqeexxi uwwa duuchcha Magenokee gargari foyendeexxe kaddaan. 10 Manjichchikinna ookkone horixxe bakka'ni wele shiqisho'a hasissabaani; bakka ookkone horixxa wele idagoole lamiingi hori Magenokee gargari foyemeeke kadowwaal. 11 Werreegemeeki hori Magenoke tolchake kade shiqabaake hore kadoole manjichchikinna hore ookkone qeesichchiinba iyyedagowwaal; 12 Qeesichchikinna horiinxa mayunte elokenna elobaake kadeexxa uude hira murowwaal; iikki hirinna qeesichchi mureeshshanni kadaan; 13 Horiinki anninna hore ookkone ifi'a gatilso'a hasoole dhibbake'ni lame tomme anga hirake'ni lebowwaal.

14 «Mitti manji mine isika Magenokee gargari hedhe tolcha asse uwwoole qeesichchi miniixxa ellenna elobaake kadeexxa uude hira murowwaal; iikki hirinna qeesichchi mureeshshan kadaan. 15 Miniinki anni ookkone mine ifi'a gatilso'a hasoole kinni hira muremeeke'ni dhibbake'ni lame tomme anga lebowwaal.

16 «Mitti manji fichchakenaa'ni kute Magenokee gargari foyendeexxe uwwa asse uwwoole hirikinna fichcha okkone'ni fuldaaxxe midhaxxe qixxe'ni murrowaal; mitte kiilo so'i'a onde tomme birretika sibiljo uwwowaal. 17 Fichchakanna karra hiissinammaxxee onde tommessoxxi wogga saxxeeshani hirbange'ni uwwa'noole wo'ma hira uwwowaali. 18 Fichcha uwwe'eki karra hiisse'namaxi onde tommesoxxi wogga saxxee'na tukki hiyyeete kadoole kinni qeesichchi daggaaxxe karra hiisse'nammaxxe wogga qico'ni gatteexxa yanna uudati hira hanii'ni xe'inshaashsha assaani.✝ 19 Fichcha uwwemmaki manjichchi ifi'a gatilso'a hasoole hirake'ni dhibbake'ni lame tomme lebeexxi uwwowwaal. 20 Fichchiinki annichchi Magenokee uwwee'na hira ibinseeka uwwe ifi'a gatilseba edi darre wele manji'a fichchi iikki gurguremoole hiisse ifi'a gatilssa dande'abaan; 21 Kunni annichcho siretike higabaaki fichchi higgexxe karra hiissedhatixxe onde tommeessoxxe wogga'n Magenokee gargariti foyendeexxe karra kadee gataan; fichchikinna qeesichchiinke qoobbo kadaan.

22 «Mitti manji wele manjonaa'ni hireeka fichcha Magenokee gargari foyendeexxe uwwa asse shiqishoole, 23 Qeesichchikinna qo'nise uude higgexxe karra hiissecatixxe onde tommessoxxe wogga qico'ni hedheeka hira murowwaal; manjichchikinna eettene barra'ni hira fichchiinka uwwowaali; maallaqikinna Mageniinxe huje'a gargari foyemeeke kadaan. 24 Karra hiissecatixxe onde tommessoxxe wogga'ni sirete'ni fichcha gurguremmake fichchiinke anni'a yookaan fira isike higaan.

25 «Hira duuchcha ibinsaaki woyyichcha Mageniinke galmike mikisanjishsha kadaan.

26 «Edise ilemaaki hori sirende'ni Mageniinke kademmaxxee ayyinna eeyyuntetixxe uwwa asse shiqisho'a dande'abaan; jabbetenna kadi gedhebiinxinna re'etixxi beltanna sirende'ni Magenokee gargari foyendeexxen; 27 Tolchakee kadabaake horika edise ilemeeka kinni ege'nemeeke hira'ni dhibbake'ni lame tomme anga lenbe illeema hidhdha dandeenaan; horiinki anni hidhdhe ifi'a gatilsa gopha'noole wele manji'a kadaake hira'ni gurgurowwaal.

28 «Manji mitti ifika manjo kadi hore yookaan fichcha iittanni hedheeshshanni Mageniinxe huje'a hara woyyichcha asseechchin uduma hara gurguro'aanna kadi hidhdhe ifi'a gatilso'a dande'abaan; 29 Reyaashsha murte sa'isineeka manjo hiissine hira uune gatisiyyo hara hasissabaan; iiitta hedheeke manji'a royo hasissaani.

30 «Fichchi fulchaaxxi midha kadi gumma tommekenaa'ni mitte anga Magenokee gargari foyendeexxen. 31 Heene midhanaa'ninna kadi gummanaa'ni hisse ifi'a gatilso'a hasaaki manji ege'nemeeke hira'ni dhibbake'ni lame tomme anga lebe gatilsa dande'aan. 32 Minike horenaa'ni tommekenaa'ni mitte anga Mageniinken; hori laakko'emaa wodda tommekenaa'ni mitti Magenoke uwwemeeken. 33 Horiinki anni hore bifa bifa'ni foyaa wodda batto'eeka fayyakenaa'ni foyoqqen; isixxe bakka'ninna wele fulchoqei. Mitte horixxe bakka'ni wele hore fulchoole kinni lamiingi hori Magenokee foyemeeke kadowwaal; illemanna hira uuwwee'naa higoqqe» hite kulli hiyye.✝ 34 Muuse Isira'eelike ardi'a kulaashsha Siinaxxe kooba'ni Mageni Muuse'ni uwweeki ajaji konneten.