1 Qeesonsatixxe saddeeteeso baro Muuse Aarooniinna oose isixxa iittani Isira'eelixxa akekanoole ye'e; 2 Isinna Aarooni'i «Batte afebaaka jibichanna labba gedhechcho aaxxe, jibichcha cubbotixxe biraa'a shiqaake tolcha, gedhechokanna ciincatike tolcha assite Duuchchi Woddike Gootti'a shiqishi. 3 Okkonechchi uduma Isira'eeliki ardi cubbo biratike tolchi'a kadaaka labbaka recco, ciincatike tolchi'a kadaaka batto'ebaaka wogga mitteka jabbichchanna wogga mitteka gedhebiika buruusa shiqishaashsha kuli. 4 Iittanni mittuntetike tolchi'a kadaaka mitte jibichchanna mitte gedhebiinka buruusa idangowwaali; insa'neena zayiteti qushsheneeke midhatike tolchini welti Duuchchi Woddike Gootti'a tolchake assine shiqinshowaal; telcho Duuchchi Woddiki Gootti insa'ne'ni leellaammaxxee konnechcho duuchcha assinowaal» hiyye.

5 Insa'nenna Muuse ajajemmachcho duuchcha duunkaani edi'a iyyedange; ardi duuchchinna Duuchchi Woddike Goottiba'a shikki hiyye uurreen. 6 Muusenna insa'nee'e «Duuchchi Woddiki Gootti ulfinni isikinni ha'no'a leellammaxxee; tenne duuchcha assitino'a Duuchchi Woddiki Gootti ha'noo ajaje'eeni» hiyye. 7 Okkonechchi uduma Muuse Aaroonii'i «Tolchimalchiiba shikki hite atixxanna ardiinxa cubbo biratee shiqaaka tolchanna ciincatika tolcha shiqishi; konne tolcha duuchcha ardiinxa cubbo biratee Duuchchi Woddiki Gootti ajajemmake seerishshanni tolcha tolchi» hiyye.✝

8 Aarooninna tolchimalchiba mareexxi edise isixxa cubbo birate shiqaaka jibichcha gorra'e; 9 Oose isixinna munde isibaa iyyedagge; isinna mundete'ni qubichchiki cuuphpha'ni tolchimalchoke'ni hedheeke cunnuchchuwwa'ni isse; gatteexxa munde tolchimalchii hunda dune; 10 Ookkoneechchi uduma Duuchchi Woddik Gootti Muuse ajajemmashshani Aarooni mooro'o, lame kalattuwa arrabinxa tidho tolchimalchoke'n ciinceesseen; 11 Maalakanna goga kinni okkone olla'i gadho bayyise gube.

12 Ciincatike tolchi'a shiqaaka hore gorra'e; oose isixxinna munde isibaa iyyedagge; isinna munde eettene tolchimalchiinke shooliinge kasa'ni dune. 13 Umokanna wele maala mikinte mikinte isiba idange; Aarooninna duuchchinga maala tolchimalchoke'n ciinceesse. 14 Ookkoneechchi uduma godobi giddiranna lukuwwa ansheexxi ciincatike tolchin booncho'ni ciinco'a'neke tolchi hana ugge ciinceesse.

15 Ookkoneechchi uduma qeesichchi ardiinxa uwwa shiqishe; ardiinxa cubbo biratike tolchi'a shiqemmaka labbaka recco aadhe gorra'e; isoonna ifixxa cubbo biratee tolchemmake tolchishshan tolche. 16 Ciincatike tolchi'a tolchemmaka hore idage seera tolchiinke seerishshanni tolche. 17 Midhatixxa uwwa shiqishe; bulletenaa'ni mitte qeerro aadheexxi tolchimalchoke'ni ciinceesse; kunninna gorsa gorsa shiqammake ciincatike tolcha'ni lebemeeke hiyyoten. 18 Ookkonee jibichchakanna ookkonee labbaka gedhechcho gorra'eexxi ardiinke mittoomiinke tolcha asse shiqishe; oose isixxinna munde isibaa iyyedagge. Isinna munde eettene aadheexxi tolchimalchiinke shooliinge kasa'ni dune.✝ 19 Aaroonixxi labbaxxi oose jibichchiinxanna gedhechchiinxa ha'yo dubatanna, godobi giddiira buqaka mooro'o, lame kalattuwwanna arabiinxa tidho aaxxeexxi, 20 Tolchemeeke horixxe cormme hana uggite; Aarooninna mooro'o tolchimalchoke'n ciinceesse; 21 Muuse ajajemmashshanni cormmetanna middixxa luka Duuchchi Woddike Gootti'a lele'misatike tolcha asse shiqishe.

22 Aarooninna cubbo biratika tolcha, ciincatika tolchanna mittoominka tolcha shiqisheechchi uduma, anga isixxa ardiinba diriirisse eebbise tolchiinke boonchinaa'ni dirre.✝ 23 Muusenna Aarooni Duuchchi Woddiki Gootti ulfinniki leellammake duunkaani giddi'a e'yine; fullaa woddanna arda eebbinse; Duuchchi Woddike Goottiiki ulfinninna arda duuchcha'ni leelle; 24 Dedhanga Duuchchi Woddiki Gootti ergeexxi giira tolchimalchoke'ni hedhemaka tolchanna mooro'o duuchcha itte; ardikinna tenne uude wodda ilili hiyye albiki buttina tuqa qico'ni heeshshi hiyye.