1 Duuchchi Woddiki Gootti Muuse'e; 2 «Aarooniinna Aaroonixxa labaaxxa oose, iittani qeetixxa seemma, hariirtaaxxa zayite, cubbo biratika jibichcha, lame gedhebiinxa korbeeyye, gamami tuqebaaxxa kebbo qorete'ni uggite iyyedagi; 3 Okkoo'ni Isira'eelika arda ani ulfinniki leellammake duunkaanibaa e'yatixxe huddumme edo bukki assi.»

4 Muusenna Duuchchi Woddiki Gootti isoo ajajemmashshanni asseen; ardikinna duunkaanibaa e'yatixxe huddumme edo bukki hiyye. 5 Muusenna bukki hiyyeka arda «Tinni ta'a assaannexxi yaane Duuchchi Woddiki Gootti ha'no assitinaashsha ajajeexxen» hiyye.

6 Muusenna Aarooniinna Aaroonixxa labbaxxa oose isiba'a shiqqishshe wodi'iki anshe. 7 Aarooni'ni qeesetixxa seemma iimii'ni butta geltaaxxa oddeesse sabbatik usure, higgeeni iimi'ni butta geltaaxxa harumaaxxa seema lebe oddeesse, itti hana landetishsha oddo'winaachcho efuudite hinaachcho angatixxa oge muxxe'ek manni seesse giisse'eke sabbatinn usure; 8 Efuudite'ni qomatibaa kiise gobeexxi* 9 Umoke'ninna ruufa usurreexxi ise'ni hana Duuchchi Woddiki Gootti Muuse ajajemmashshanni Magenoke foyematika beessisa worqeti seense giissineeka kallachcha ugge.

10 Okkoo'ninna Muuse hariirtetixxa zayite aadheexxi Duuchchi Woddiki Gootti ulfinniki leellammaka seemmati giissinemmake fooqa'ninna isi giddo hedheechcho duuchcha'ni isse; konne qicinni duuchchingechcho Duuchchi Woddike Goottixxe huje'a woyyonse. 11 Duuchchi Woddike Goottixxe hariirammaxxe zayitenaa'ni shiixxoxxa aadheexxi tolchimalchoke'ninna torbaanele fixe; ookko'ninna tolchimalchoke'ninna isike miyuwwa duuchcha'ni anga anshshe'nammaxxe qore'ninna qore ettene ugginammaka ofo'lisanjo Duuchchi Woddike Gootti'a woyyonsatee hariire. 12 Aaroonike umo'ninna hariirtetixxa zayite cosse hariireexxi Duuchchi Woddike Goottixe huje'a woyyonse qeesoonse. 13 Okkoo'ni, Muusenna Duuchchi Woddiki Gootti ajajemmashshani Aaroonixxa labbaxxa oose edo sa'isse qeesumummatixxa seemma oddeesse; hidha insa'neeke'nina sabbata ka'lishe umoke'ninna ruufa ugge.

14 Okkonechchi uduma Muusenna cubbo biratike tolchchi'a jibichcha idage; Aarooninna labbaxxi oose isixxi jibichchiinke umo'ni hana anga isa'neexxa uggine; 15 Muusenna jibichcha ookkone gorra'e; qubichcho mundete'ni cuupheexxi tolchimalchiinke shooliinge kasa'ni hedheeke cunnichchuwwa'ni isseexxi gargari hedheeke booncho asse foye; ookkoo'ni gatteexxa munde tolchimalchi hunda dune; konne qicini tolchimalchiinxa cubbo biratika tolcha shiqisheexxi ookkonnee tolchimalcho woyyoonse; 16 Muusenna hore okkoneka godobi giddira buqammaka mooro'o duuchcha, tidhoti saapha, Lame kalattuwwa'ninna hedheeka mooro'o tolchimalchoke'n ciinceesse. 17 Jibichiinka goga, wele gateeka maalanna godobi giddiira aadheexxi, Duuchchi Woddiki Gootti Muuse'e ajajemmashshani olla'akenaa'ni bayyise gube.

18 Ookkonchi uduma Muuse ciincatike tolchi'a gedhebiinka korbeessa idage; Aarooninna labbaxi oose isixxi korbeesiinke umo'ni hana anga insa'neexxa uggite; 19 Muusenna korbeessa okkone gorra'e; mundetanna tolchimalchiinke shooliinge kasa'ni dune; 20 Korbeesiinka maalanna mikita mikitake'ni woxe fulcheexxi; mikitemmaka maala, Muusenna umo isikanna mooro'o ciinceesse. 21 Duuchchi Woddiki Gootti ajajemmashshanni Muuse korbeesiinka godobi giddiranna manne ansheexxi ittan maaliki welti tolchimalcho'n ciincatike tolcha ciinceesse; kunni foolinna Duuchchi Woddika Gootta gammachchiisaaken.

22 Muusenna higgeeni qeesonsatee shiqammaka langaka labbaka gedhebiinka korbeessa idage; Aarooninna labbaxi oose isixxi anga insa'neexxa gedhechchoke'ni hana uggine; 23 Muusenna korbeessa gorra'eexxi mundetenaa'ni aadhe Aaroonixxa middixxe manshake hundi darreke kasa'ni, middixxe angake abuguddo'ninna middixxe lekkake abuguddo'ni isse; 24 Ookkoneechchi uduma Aaroonixxa labbaxa oose edo shiqisheexxi middixxe manshake hundi darreke kasa'ni, middixxe angake abuguddo'ninna middixe lekkake abuguddo'ni Muusenna munde isse; gatteexxa mundenna tolchimalchiinke shooliinge kasa'ni dune. 25 Ha'yo, duba, godobi giddira buqammaka mooro'o duuchcha, tidhoti saapha, lame kalattuwwa'ni hedhemmaka mooro'onna middixxa luka aadhe; 26 Duuchchi Woddike Gootti edo hexxeexxe qorenaa'ni gamami tuqebaaxxa mitte kebbo aadhe; zayite qushshine ra'iseneexxa kebbonna mitte hephphaka xalta adheexxi mooro'onna middixxe lukake maala'ni hana ugge; 27 Tenne ita duuchcha aadheexxi Aarooni'ninna isixxe labbaxxe oose'ni anga, anga uwwe; isne'nenna tenne ita Duuchchi Woddike Gootti'a lele'misatike tolcha assine shiqinshe. 28 Ookkonchi uduma Muuse ita eettene insa'nenaa'ni aadhe; qeesonsatixxe hariirteka tolcha kadaashsha ciincatika tolchi ciinceeseemmamake tolchimalcho'n hana uggeexxi ciinceesse; kunninna Duuchchi Woddika Gootta gammachchiisaake itatike tolchammani. 29 Okkoo'ninna Muuse corme aadheexxi Duuchchi Woddike Gootti'a lele'misatike tolcha asse shiqishe; tinni qeesonsatixxe hariirte'a shiqemmake korbeesixxi corme Muuseke qoobbomman. Muusenna Duuchchi Woddiki Gootti ajajemmashshani duuchchinxa yaane asse.

30 Muusenna hariirtetixxe zayitenaa'ninna tolchimalchoke'n hexxemmaxxe mundenaa'ni shiixxoxxa aadheexxi Aarooni'ninna isixxe seemma'ni iittani Aaroonixxe labbaxxe oose'ninna isnsa'neexxe seemma duuchcha'ni fixe; konne qicini Muuse insa'neenna seemma insa'neexxa Duuchchi Woddike Gootti'a woyyoonse.

31 Muuse, Aarooniinna labbaxxa isixxa oose hiyyee qici, «Duuchchi Woddiki Gootti ulfinniki leellammake duunkaaniinxe e'yatixxe hudume edo maala gaffe; Duuchchi Woddiki Gootti ‹Aaroninna oose isixxi labbaxi ittuuni› hiyye ajajemmashshani qeesonsatixxe hariirteke tolchixxe qore'ni hexxeexxe kebbonni welti itte. 32 Ittinee'na gatteeka maalanna kebbo giirate'ni gubbe; 33 Ha'no qeesonsatik seeri muuxematee'e torbaane barra adhdhaammaxxe barra itti muddaa qico'ni Duuchchi Woddiki Gootti ulfinniki leellammake duunkaaniinxe e'yatixxe hudumenaa'ni kexxinabaan. 34 Kunni telcha assineenneki cubbo ha'nooxxa biratike tolchiki seeri Duuchchi Woddiki Gootti muunxannoshsha ajajeeken; 35 Tennexxee Duuchchi Woddiki Gootti ajajemmaxxa duuchcha muuxxina'ni torbaane barranna torbaane hashsha Duuchchi Woddiki Gootti ulfinniki leellammake duunikaaniinxe e'yatixxe huddume'ni turtinaani; tenneenna assa gophinoole reya rertinaani; kunni Duuchchi Woddiki Gootti anee ajajeeke seeran» hiyye. 36 Tennexxee Aarooninna labbaxxi isixxi oose, Muuse darree'ni Duuchchi Woddiki Gootti ajajeexxa duuchcha muunxe.