1 Magenikinna Muuse, 2 «Manji mitti mundiinke dhukkubinaa'ni fayyoole battooma bidhdhatiki seeri konnechchin butti'a hedheeken; manji mitti battooma bidhdheexxa ege'ninshaa baro qeesichchiinba isoo shiqinshowaal:✝ 3 Qeesichchikinna olla'akenaa'ni gadhi'a fulchcheexxi uudowwaal; dhukkubikinna fayyo'oole, 4 Manjichchikinna fayyaxxa lame ci'anna eloka foole afeeke haqichchika kutemalchcho, diimmoka shimalanna hisoophite hinaaxxe badda'aka shafa idagaashsha qeesichchi ajajowwaali. 5 Okkonechchi uduma qeesichchinna ca'ichcha wode'e afeeke fariinke miya'ni ciichcho mitte gorranaashsha ajajowwaali; 6 Gatteexxa langaxxa ciichcho aadheexi eloka foole afeeke haqichchike kutemalchchini, diimoke shimalinninna hisoophite hinaaxxe badda'ake shafini mitteba sirete'ni gorranemmaxxe ciiichchoxxe munde'ni cuuphowwaal; 7 Mundetanna mundiinke dhukkubinaa'ni fayyeeke manjo'ni torbaanele fixowwaal; okkonechchi udumi'a battumma bidhdheexxa ege'nishowwaal; gorra'endebaaxxa ciichcho me'ito'a wocci assowaal.

8 «Dhukkubakenaa'ni fayye manji seemma isixxa borcedhaan; umokanna haaxxaani; bisokanna anshedhaan; okkonechchi uduma battooma bidhdhe olla'i giddi'a e'yaani; yaane kinni torbaane barra qico'ni seemmati giissineeke fooqi isiki gadho turowwaal. 9 Torbaane barra uduma higgeenna umo, areeda, gaara iimikanna bisoke'ni weleba hexxeexxa orda duuchcha haxxeexxi seemmatanna borcedhowwaal; bisokanna anshedhowwaal; okkonechchi uduma battooma bidhdheeke kadaan.

10 «Saddeetixxe barra'ni fayyaka lame gedhebiinka buruusanna mitte woggaxxa meyyaxa gedhechcho idagowwaal; jaane kiilo kaddaaxxa ejersiinxe zayiteni qushshineexxa bullenna buttule mitte kaddaaxxa ejeersiinxa zayite idagowwaal. 11 Qeesichchikinna manjichchi idageexxe uwwan welti Mageni ulfinnik leellammake duunkaaniinxe hulabaa iyyemare Mageni edo shiqishaan.

12 «Ookkoneechchi uduma qeesichchi labbake gedhebinaa'ni mitte, mitte buttule ejeersiinxe zayiteni welti balleessa biratike tolcha asse shiqishaan. Qeesichchikinna Magenoke lele'misatike tolcha asse shiqishaan. 13 Isinna ookkone gedhecho cubbotike tolchinna ciincatika tolchi gorra'eemammake ookkene hara woyyichcha booncho'ni gorra'owwaal; kuunni cicincatik tolchinna ookkone qeesichchi'a uwweemaammashshanni kunni balleesatik tolchinna ookkone qeesichcha uwwemowwaal; kunni hara woyyoomeeken. 14 Qeesichchikinna labbake gedhechchixxe mundenaa'ni shiixxoxxa aadheexxi battumma bidhdheexxa ege'nisha'neeke manjixxe middixxe manshshake kasa'ni, middixxe angakenna middixxe lekkake abugudduwwa'ni issowwwaal. 15 Qeesichchikinna ejeersiinxe zayitenaa'ni shiixxoxxa aadheexxi bita'ixxe anga isixxike ba'lincha'ni cossowwaal; 16 Zayite eettenenaa'ni shiixxoxxa middixxe angaxxe qubbani cuupha'ni Magenii edo torbaanele fixowwaal; 17 Ba'lincha isike'ni hexxeexxe zayitenaa'ni shiixxoxxa aadha'n battooma bidhdheexxa ege'nisha'neeke manjichchixxe middixxe mashshake kasa'ni, middixxe angakenna middixxe lekkake abugudduwwa'n issowwaal; 18 Angate'ni gattemmaxxa zayite battooma bidhdha'neeke manjike umo'ni issowaal; konne qici'ni qeesichchi Magenii edo cubbo biraan.

19 «Ookkoneechchi uduma qeesichchi cubbo biratika tolcha shiqishati battooma biratika seera muuxaan; ookko'ni ciincatike tolchika hore gorra'aan; 20 Gorra'eeka horenna midhatike tolchchini welti tolchchimalchoke'n ciinceesaani; konne qicini qeesichchi cubbo biraani; manji ikkinna battooma bidhdhaani.

21 «Manjichchinna konnecho duuchcha iyyedagatee dande'a gopha'noole, balleessa biratike tolchi'a kadaaka Duuchchi Woddike Gootti'a lele'misatike tolcha asse mitte gedhebiinka buruusa iyyedagowwaal; isini weltinna ejeersiinxe zayiteni welti qushendeexxa lame kiilo kaddaaxxa shaqqinshe danneexxa bullenna mitte buttule ejeersiinxa zayite idagowwaal; 22 Iittani dande'e qico'ni lame guugejo yookaan lame shiixarama guugenjo, mitte cubbo biratike tolchchi'a helxene ciincesatike tolchi'a shiqishaan.

23 «Battooma bidhdhatiki seeri muuxemmaaxe saddeteesoxxe barra'ni konne duuchcha idage Magenii ulfinniki leellammake duunkaaniinxe hula'ni Magenii edo qeesichchoke'ni uwwaan. 24 Qeesichchikinna gedhechiinka buruusanna ejeersiinke haqichchixxa zayite buttulle mitte aadheexxi Duuchchi Woddike Gootti'a lele'misatike tolcha asse shiqishaan. 25 Qeesichchikinna konne balleessatike tolchi'a shiqeeka gedhebiinka buruusa gorra'owwaal; mundetenaa'ni shiixxoxxa aadheexxi battooma bidhdha'neeke manjixxe middixe manshshake kasa'ni, middixxe angake'nina middixxe lekkake abugudduwwa'ni issowwaal; 26 Qeesichchi zayitetenaa'ni shiixxoxxa middixxe anga isixxe'ni cossedhaan; 27 Isenaa'ni shiixxoxxa middixxe angake qubichchini cuupha'ni Magenii edo torbaanele fixaan; 28 Ballessatike tolchixxe mundeni assemmashshani angate'ni gatteexxa zayite aadheexxi battooma bidhdha'neeke manjixxe middixxe manshsha'ni, middixxe angake'nina middixxe lekkake abuguddo'ni tuqisaan. 29 Magenii edo cubbo biratee qeesichchi angate'ni gatteexxa zayite battooma bidhdha'neeke manjike umo'ni dunaan. 30 Battooma bidhdha'neek manjinna lame shiixxaramma guugenjo yookaani lame guugenjo idagowwaal; 31 Mitte cubbo biratike tolchchi'a helxenee kinni ciincatike tolchi'a shiqishowwaal, iseni welti midhatika tolcha shiqishowwaal; qeesichchikinna battooma bidhdha'neeke manji'a Mageni edo cubbo birowwaali.»

32 Mundiinke dhukkubika battooma bidhdhaaki manji tolchakee shiqishiyyo hasisaaka tolcha hiyyumma isixxenaa'ni kexxeexxa dande'a gopheeke manji'a muunxaaki seeri konneten.

33 Mageni Muusenna Aarooni, 34 «Ani ha'no'a uwwanoke boga'ni Kenaani e'yitinnaa wodda okkone boga'ni afemaake mitte mini giddo buquna uggonnole, 35 Ayyinna mine isike'ni buquni hedheexxa afeeki manji qeesichchiinba mare ‹mine anke'ni buquniinsha hedheechcho hedheen› hiyye kulowwaal; 36 Qeesichchikinna mine e'ye buquniinxa bifa uudebaa edi darre mini giddo hedheeka miya duuchcha gadhi'a fulchchinaashsha ajajowwaal; kada gophphoole mini giddo hedheechchi duuchchi batto'aan; okkonechchi uduma qeesichchi mine e'ye uudowwaal; 37 Buquniinxa bifa uudaa wodda gimo fufursha'ni itaake hanjaake yookaan diimmoxi boddi bodditte bifa leelitoole, 38 Minekenaa'ni fule torbaane barra'a cufowwaal. 39 Torbaxxe barra'ni hige higgeenna uudowwaal; buquni ba'late wele baanna geyoole, 40 Buquna affeexxa kino yookaan miniinxa gimo gonshshe aa'neexxi qachchinii gadho hedheeke battichcha boonchcho'ni hunnaashsha ajajowwaal. 41 Okkonechchi uduma haqqe giddixxa duuchchanna dhoqqe duuchcha soonfe qachchinii gadho hedheeke batto'eeke kora hunnaake boonchcho'ni hunnaashsha assowwaal. 42 Okkonechchi uduma edixxe kinoxxe bakka'ni wele kino hiissineexxi dhoqqe itti hana gannowwaal.

43 «Kino hoyyine, gimo soonfe ke'ne haaroxxe kinonni mine haaronsineechchi uduma higgeenna buquni leelloole, 44 Qeesichchi mare uudowwaal; buquni ikki ba'lata'ni wele baanna geya'ni me'a'neeke kademmaxxee mini ikki batto'eeken. 45 Tennexxee diigiyyo hasissaan; kinjo, haqichchonna dhoqqe gannema duuchcha qachchini gadho batto'eeke kora hunnaake boonchcho'ni hunnowwaali.

46 «Mine okkone cunfeechchi uduma okkone mini giddi'a e'yaaki manji hashshaa qico'ni batto'aan; 47 Okkone mini giddo diipheeki yookaan ita iteeki hedhoole seemma isixxa borcedhowwaal.

48 «Mine haaroba haaronsineexxi giissineechchi uduma qeesichchi mare uudaa wodda buquni ba'lateexxa leellishaaxxi yaane hedha gophphoole, buquni hara ba'eemmaxxee mini ikki battoomakenaa'ni ca'a hiyyeexxa qeesichchi ege'nishowwaal. 49 Miniinka battooma ca'a assatee lame ci'a, Libaanosike haqichchika kutemalchcho, diimmoka shimalanna hisoophite hinaake ansichchika shafa idagowwaal. 50 Ca'ichchi muumetiki wodi'i hedheeke faarinke miya'ni ci'atenaa'ni mitte gorra'owwaal; 51 Okkonechchi uduma Libaanosike haqichchika kutemalchcho, hisoophika shafa, diimoka shimalanna gorra'endebaaxxa ci'a gorra'endeexxe ci'axxe munde'ninna muumetike wodi'i giddo cuuphowaal; mineke'ninna torbaanele fixowwaal. 52 Konne qicini qeesichchi mine okkone ci'atixxe munden, ca'ichchi wodi'in, lubbo affeexe ci'ani, Libaanosike haqichchike kutemalchchin, hisoophike shafinninna diimoke shimalinni battoomakenaa'ni ca'a hiyyaasha assaan. 53 Okkonechchi uduma lubbo affeexxa ci'a qachchinii gadhi'a me'itaashsha wocci assaan; konne qicinni miniinxa battooma ca'a assatiki seeri muuxemaan; minikinna battoomakenaa'ni ca'a hiyyaan.»

54 Kunni mitte manjonaa'ni wele manjo'ni sa'aake mundiinke dhukkubike, 55 Seemmate'ninna mineke'ni fulaake buqunike, 56 Miseriinke, fissi hiyye bisoke'ni fulaachchikenna baararratike battooma bidhdhatike seeruwwan. 57 Kunni seeruwwi mitte yaane battooteexxanna battootebaaxxa muraake seeruwwan.

Kunni tare sa'aak bisink dhukubi iittanni seemmate'ninna mini hana hedhaake tare sa'aake dhukibi'a hujaake seeran.