1 Mageni Muuse Siinaxxe kooba'ni, 2 «Isira'eelika arda: ‹Ani Mageni ha'no'a uwwannoke boga'ni geltinaa wodda torbessoxxe wogga'ni mittechchonna buttinake'ni hujjinebaangi ittani galchati Mageno ulfeesitinaan. 3 Jaane wogga giddo sanne rolkkitaton; woyineti hiddichcho kaassaton; midhatanna bukki assexxaton. 4 Torbeessoxxi wogga kinni ani'a Magenoke woyyooteexxe kaddee'na buttini hafuura adhdhaaxxe yanna kaddaan. Tenne wogga'ni midha rokkaboxxon; woyinetika hiddichchonna qeccaboxxon. 5 Ronkebaangi fuldeexxa midha haande aassexoxxen; qecemebaake woyinetike hiddichchinaa'ni gumma qoccoxen; itti wogga buttini hara hafuura adhdhaaxxe yannan. 6 Buttini hafuura adhdhaaxxe wogga'ni fuldaaxxi midha duuchchi ati'a, atike erganjuwwi'a, rundiki ati'a hujaakeenna keessumumma atiba ofo'leeke duuchchi'a itatee kaddaan. 7 Hore atikeenna buttate'ni afemaake biniinchuwi'a geltaaxxa midha alfitaton; buttini fulchaachchi duuchchi indaake kadaan.✝

8 « ‹Torbaanele torbaane laakkottotole duuchchiingi laakkosi shoole tommenna sallaneka kadaan; 9 Torbeessoke agenjixxe tommeesoxxe barra'ni itti aande hossaaxxe cubbo biratixxe barra'ni boga duuchcha'ni malagata ufuufaaka manjo ergi; 10 Konne qicini onde tomme wogga geltinoole bogi giddo hedhaake duuchchi'a garbuma fula lassitinaanii; edi wodda hirememmaki bogi annichchoke yookaan aante isixxee higaani; garbake kade ergatemaashsha gurguremeeki manjinna hado isikiba higaan. 11 Tenne onde tommeessoxxe wogga'ni midha rokkaboxxon; rokendebaangi fuldeexxa midha haa'mite aassexaboxxon yookaan qecemebaake woyinetike hiddichchonaa'ni gumma qocexxaboxxon. 12 Tenne onde tommeessoxxe wogga'ni wogga duuchcha woyyoteexxe wogga kaddaan; fichcha ha'nooka hunjebaangi ifittini fichchi uwwaachcho ittinaan.

13 « ‹Konnechchi edi darre gurguremeemmaki fichchuwwi tenne wogga'ni annichchokee higaan.

14 « ‹Tennexxee fira atike kadeeke Isira'eelichchokee fichhca gurgurtootole yookan hidhdhitotole isoo miiccoxen; 15 Fichchiinka hiranna ibinsaaki higgexxi karra hiissatixxi wogga daggebaangi fichchi midha uwwa qicinnite kaddaan. 16 Heddo wogga kaddoole hirikinna iittani lebaan; shiixxoxxe wogga kaddoole hirikinna iittani shiixxedhaan; hiriiniki ibishshinna fichchi midha uwwa qicinnite kadaan; 17 Mitti Isira'eelichchi wele Isira'eelichcho'ni fuggoxxa assoqqen; Mageno sodaatte; ani Mageno ha'nooken.

18 « ‹Bogake'ni nage'iki hexxinaashsha Mageniika seeranna aada duuchcha ulfeesse; 19 Bogi geltaaxxa midha uwwaammaxxee ittinaachcho duuchcha alfitine elletinna nage'iki hexxinaan. 20 «Yaane kinni torbeessoxxe wogga'ni midha rokke bukki asse'nebo'nongi maa indano hitine qortinoole» 21 Jiyeessoxxe wogga'ni fichcha eebbisannon; tennexxee sase wogga'a kaddaaxxa midha fichchi uwwaan; 22 Saddeeteessoxxe wogga'ni midde sanne rokkinaa wodda ittinaaxxi edissine bukki assexxinemmaxxen; tenneeni okkone wodda bukki assexxinemmaxxa midha sallaneessoxxe woggaxxa midha bukki assitinaa qico'ni ittinaan.

23 « ‹Fichcha duuchchi woddi'a sa'issitine gurgurtinoqen; fichchi duuchchi anke Mageniinke male ha'nookebaan; ha'no keesummatishsha huccitino'a calla uwweenen. 24 Fichcha gurgurtinaa wodda siretiki annichchi hiissedhdhaaxxa ege'ne.

25 « ‹Mitti Isira'elichchi hiyyoome fichcha gurguroole shiqike kadeeki firi isiki hiissedhiyyo hasissaan. 26 Hiissedha dande'aaki isiki shiqiki firi hedha gophoole kinni turena karra alfa wodda isinni hiissedhiyyo dande'aani. 27 Tenneenna assa dande'aaxxe yanna'ni higgexxe karra hiissinaaxxe wogga qico'ni hexxeexxa wogga laakko'e gataaka maallaqa hidhdhemmake manjichchi'a hiisse uwwe boga hiissedhowwaal. 28 Yaane kinni hiissedhate dandeessisaaka geyaaka maallaqa afa gophoole fichchi ikki higgexxe karra hiissatixxe wogga qico'ni okkone hidhdhemmange manjixxe anga'ni turo'a dande'aan. Eetene wogga'ni fichchi fichchiinke anni'a higaan.

29 « ‹Mitti manji dalla'a giissineeke qachchi giddo hedheeka mine isika gurguroole gurgureexxe barranaa'ni woggati qico'ni hiissedha dande'aan. 30 Yaane kinni woggati giddo hire hiissedha dande'a gophoole, hire hiissedhatixxa dande'a gophaani; minikinna hidhdhemmake manji'a yookaan sanne isixxe duuchchi woddixxe karra kade gataan; karra hiissatixxe wogga'ni midde gurguremmake higabaan. 31 Dalla'a giissinebaake olla'i giddo hedheeka mine gurguraaki fichcha gurgurrammaxxe aada'ni gurguraan; miniinki anni hiissedhate dande'aan; karra hiissatixxe wogga'ni mini ikki annichchoke higaan.

32 « ‹Kaddo malee Leewwito insa'ni he'neeke qachcha'ni hexxeexxa karra insa'neexxa heene yanna'ninna hiissedhate dandeenan. 33 Leewwito hexxeeke qachcha'ni ijaadhitaaki minuwwi Isira'eelike ardixxe oddo'ni insa'neexxe karra kade hedhaan. Qachchuwwa duuchcha'ni mitte Leewwichchi mine gurguroolenna hiissedhate dande'a gophoole karra hiissatixxe wogga'ni isi'a higaan; 34 Yaane kinni Leewwitotike qachchi qarqara hedheeki hore alla'linaaki diidi hara gurguremabaan; isinna duuchchi woddi'a karra insa'neexxe kadaan.

35 « ‹Ati hexxete bira hedhaaki Isira'eelichchi umo ifika galcha dande'a gophoole ati bira shiqe hedhaashsha, shiqilsiteteke wele bogike manji'a assitataxxa isi'aanna hasissaaxxa duuchcha fedhi atixxini assi.✝ 36 Liqeesite dhala adhdhitoxxen; Mageno sodaatati Isira'eelichchi atibira hedhaashsha assi. 37 Liqeesitatoke maallaqi'a dhala laqqoxxen; indaachcho gurgurtato wodda hirtetake maallaqa'ni lebbe gurgurtoxxen.✝ 38 Kenaanika boga ha'no'a uwwonaanna Mageno ha'nooke kadonnaa Gibtseke boginaa'ni fulchchenneki ani Mageno ha'nookeni.

39 « ‹Ati bira hedha'neeki Isira'eeichchi gode atixxi hiyyeesake kade garbiinsha ati'a ergatemoo'a ifi gurguroole garbi hujaaxxa duuchcha hujaashsha assitoxxen. 40 Higgexxe onde tomme wogga qico'ni rundake huja'neeke erganjishsha ergatema'ni hedhuuni; 41 Eetene onde tommeessoxxe wogga'ni isinna oose isixxin welti atenaa'ni fule firi isikibaanna anni isikixxe karraba higaan. 42 Isira'eeliki ardi anke erganjon; Gibtseke boganna'ni fulchedhenneken; tennexxee garbake kade gurguremabaan. 43 Insa'neenna miiccamiki galchitoxen; yaane kinni anee Mageno sodaati.

44 « ‹Loola atike'ni hedhaake wele mannanaa'ni hasseteka labbakanna kadi meyyaxxa garba hidhdha dandeetaton. 45 Iittani ha'nooxxe oddo'ni hedhaake wele bogike mannixxa oose garbake assite hidhdha dandetaton; boga ha'nooke'ni ilndeexxa iitta hexxeexxa oose ifixxe karra assedha dandetinaan. 46 Insa'neenna geegiinsha oose ha'nooxxe sa'issa dandeetinaan; hedhotike baro insa'neeke duuchcha'ni ergatema'ni he'naan; Isira'eelichcho gode ha'nooxxenaa'ni ayyeenna miiccamiki galchitinoqen.✝

47 « ‹Mise giddo atixxe oddo'ni hedhaaki wele bogiki manji dureessake kadee'na Isira'elichchi gode atixxi hiyyoome okkone wele bogike manji'a yookaani isike mini hado mitte'a ifi garbake asse aago'a dande'aan. 48 Garbake kade gurguremeechchi uduma higgeeni garbumatenaa'ni fulo'a dande'aan; tennexxee dayyuwwa isikenaa'ni mitti isoo hiisso'a dande'aan; 49 Abbi yookaan abbiinki belti yookaan shiqike firinaa'ni mitti isoo hiisso'a dande'aan; geyaaka maallaqa qixxeesedhoole umo isinge'ni isi maallaqa hiisse garbumma fula dande'aan. 50 Tinninna kaddaa wodda edo hidhdheeke manjinni welti mari'atowwaal; isi ifi gurguremmaxxe wogganaa'ni daggaaxxe karra hiissisatixxe onde tomme wogga qico'ni hexxeexxa wogga laakkonowwaal; rundake hujaake manji'a uunaa qico uunde wogga laakkoneexe'ni hira fulchinowwaal. 51 Heddo wogga gatto'oole woggatike laakkosishshanni hira hiissowwaal; 52 Karra hiissinaaxxe onde tommessoxxe wogga qico'ni shiixxoxxi wogga gatto'ole gatteexxa wogga mitteba laakkonaan; woggatixxe birasa'neshanni hiissedhatika hira uwwowwaal. 53 Tinninna kadiyyo hassissaaki woggatike hiri'a hujo'a adhdheeke manjishsha hedemeeten; hujisaaki annichchinna iso miicoqqen.

54 « ‹Konne qicinni garbumma fula dande'a gophoole, daggaaxxe karra hiissecatixxe onde tommeessoxxe wogga'ni isoonna isixxa oose garbumma fulchinowwaal. 55 Isira'eeliki ardi anke erganjo kademmaxxe Isira'eelike manjo kadeeki huuni manjinna duuchchi wodda barokenaa'ni baro garbake kade gatoqqen. Isira'eelki ardi ani Gibtseke boganaa'ni fulchenneke ardani. Aninna Mageno insa'neeken.