1 Duuchchi Woddik Gootti Muuse, 2 «Isira'eelixxe oose'a ‹Ani Mageno ha'nookeni. 3 Hexxinemmake Gibtseke bogiki ardi yookaan ta'a dhaalchchisaanneke Kenaanike boga'ni hedha'neeki ardi assaaxxa busha yaane assitinoqe; seera insa'neekanna hordofinoqqen. 4 Aada anxa muuxxe; seera anka heqqe. Ani Mageno ho'nooken. 5 Ani ha'no'a uwwannoxxa aadanna seera heqqe; tenne assitinoole hedho ha'nooxxa fayyilsitinaan; ani Magenoken› hiyyeen hite kuli» hiyye.✝

6 « ‹Huuni manjinna fira ifike kaddeexxe meyyaxxen welti yababuloqqen. Ani Magenoken.

7 « ‹Ama atixxenni welti yababulde anna atika salphisoxxeni; ama atixxe kaddemmaxxe seemma isexxa faashshoxen.

8 « ‹Langaxxe ama atixxenni yababulde anna atika salphisoxxen.✝

9 « ‹Dayyo atixxenni yookaan, mine yookaan gadho ilendeexxe langake anna atikixxe beltonni yookaani langaxxe ama atixxixxe beltonni welti yababuldoxxen.✝

10 « ‹Salphataboxxoshsha oose atixxike dubarrinni yababuldoxxen.

11 « ‹Langake annixxi yookaan langaxxe amaxxi belto ati'a dayyote kaddemaxxe iseni welti yababuldoxxen.

12 « ‹Anna atikixxi dayyo ati'a adaadate kaddemmaxxe isenni welti yababuldoxxen.

13 « ‹Ama atixxixxi dayyo ati'a lankaamate kaddemmaxxee isenni welti yababuldoxxen.

14 « ‹Abbi atikixxi are ati'a abbote kaddemmaxxe isenni welti yababuldoxxen.✝

15 « ‹Belti atikixxi are beltote kaddemmaxe isenni welti yababuldoxxen.✝

16 « ‹Dayyi atikixxi are ati'a herelchchote kaddemmaxxee isenni welti yababuldoxxen.✝

17 « ‹Hossetexxe manjichchoxxe beltonni yookaan manjichchotixxe oosexxe oosen welti yababuldoxxen; insa'nenna shiqike fira atike kandemmaxxee cubbote ate'a kaddaan.✝

18 « ‹Are atixxi lubboti hexxee'na dayyo isexxi ise'a ginate kaddabaashsha dayyo isexxa aaxxoxeni; isenninna yababuldoxxen.

19 « ‹Melaalletixxe aadani hexxeexxi dubarte battooteexxe kaddemmaxxee isenni welti dhiiphphoxen.

20 « ‹Wele manjixe areni yababulde ifi battesitoxxeni.✝

21 « ‹Duuchchi Woddike Gootta atike Magenika summa yowwisaboxxoshsha oose atixxenaa'ni mittetanna Moolekite hinaake dharichcha mageni'a ciincatike tolcha kaddo'a uutoxxen; ani Magenoken.✝

22 « ‹Magenii edo jibbendeexe yaane kaddemmaxxee labbaki melaalleti welti diinphammashsha labbaken diiphphoxxen.✝

23 « ‹Labbake kade meyyaxxi huuni manjinna biniinchikinna horik diiphphe ifi battoosoqqen; iitta hexxeexxi yaane dadatika seera balleessitaaxen.✝

24 « ‹Boga adde uwwemake'ni hedheeki ardi ifi battoossemashsha okkone mannixxe aada'ni galdine ifi battoossitinoqen; Mageni boga okkonenaa'ni insa'ne balleesse bira'neeki, ha'no boga okkone'ni aagginaashaten. 25 Balleessa isexxenaa'ni kexxeexxa bogi battoo'een; Magenikinna mufeti boga insa'neeka ganennen; bogikinna insa'nee hoo'o hiyye tuffeen. 26 Ajajanna seera anka saxxinoqen; ha'notenna kadi ha'nooxxe oddo'ni hedhaaki wele bogiki manni tenne batte yaanuwwanaa'ni mittetanna assoqen. 27 Boga okkone'ni hedha'neeki manni tenne battuwwa yaane duuchcha asse boga battoose'en. 28 Boga okkone'ni hedha'neeka manna bogi hoo'o hiyye tufemmashsha ha'noo hoo'o hiyye tufabaan.

29 « ‹Tenne batte yaanuwwa assaaki ikki manji ifike ardi giddii'n fulowaal. 30 Magenikinna ajaja anka duuchcha muuxxe; ha'no edi gama bogake'ni hedhemmaki manni assammaxxa battitte aada hordoffinoqen; tenne salphitte yaanuwwanaa'ni mittetanna assitine ifi batteessitinoqen; ani Mageno ha'nookeni› » hiyye.