1 Mageni Muuse: 2 «Isera'eelika arda ha'notenna kadi ha'nooxxe oddo'ni hedhaaki wele bogiki manji ayyinna Moleekite hinaaka mageno magenonfatatee oose isixxenaa'ni tolchakee uwwoole ardi Isira'eeliki okkone manjo kinoti cancaqe shiyowwaal. 3 Ayyi manjinna oose isixxenaa'ni mitte Moleeki'a sa'isse uwwe woyyichcha seemmati giissineeka fooqo anka batteesoolenna woyyichcha summa anka yowwisoole ikki manji uudee'na isinni ane'ni elabaan; manji ankishshanna uudabo'non. 4 Yaane kinni ikki manji asseexxa duuchcha ardi maa ane dhibe hiyye waaloolenna iso kinoti cancaqe shiya gophphoole, 5 Ani umo anke'ni okkone manjo'ninna mini hado isike duuchcha'ni ittani ane'ni addatema gophe Moleeki magenoonfatati isinni welti mittoomaake duuchcha'ni farra elobaaxxa idaganon; okkonechchi udumi'a ifike ardi giddii'n fulowaal.

6 «Huuni manjinna gorsa laqedho'a ekedha haasosamma mannanna moraake manniba maroole okkone manjo'ni mufatanon; ifike ardi giddii'n fulowal; 7 Ani Mageni ha'nooke Magenon; hedho ha'nooxxa ani'a gargar footine ifi woyyoonse; 8 Seeruwwa anka saxxinoqen; ani ha'noo woyyonsanoke ha'nooke Magenon» hiyye.

9 « ‹Ayyinna anna yookaan ama yowwoole shiwwe; anna yookaani ama yowwemmaxxee reyo ifi'a mudhdheeki isonden.✝

10 « ‹Mitti manji wele manjixxe arenni yababuloole yabaabulemmakanna yabaabuldemaxxa lamiinga shiwwe.✝

11 « ‹Manji mitti anna isikixxe arenni diiphoole anniinka biso saali belo gatisemmaxxe isonna manjichcho eettene shiwwe; reyotixxi murtenna uwwendeechchi balleessa insa'nexxinniteni.

12 « ‹Mitti manji beltiinxe arenni diiphoole lamiinga shiwwe; maalinxa firunte yabaabulati battoosinemmaxxee reyo insa'neexxe laqemmaaki insa'nenden.

13 « ‹Mitti labbaki labbakinni melaalleti diiphammashsha diiphoole battitte yaane assinemmaxxee lamiinga shwwe; reyo insa'neexxe laqemmaaki isna'nenden.

14 « ‹Mitti manji amatanna belto aadhoole assineexxe fuggoxxe huje'a sasiinga giirati gubbine shiwwe; iitta hexxeexxi yaane oddo ha'nooxe'ni kadiyyo hasissabaan.✝

15 « ‹Manji mitti mayyaxxeni diiphammashsha meyyake horini afemoole isoonna okkone hore shiwwe.

16 « ‹Mitte meyyaxxi manjo labbake manjini dhiiphphamashsha labbake horini afendoole iseenna hore okkone shiwwe; reyo insa'neexe laqemmaaki insa'nenden.✝

17 « ‹Manji mitti dayyoti yookaan anniinbaa'ni yookaani amati darree'ni dayyote kaddaaxxa aadhe isenni diiphoole, tinni shookishshaaxxe yaane kaddemmaxxe ardi giddii'n fullowaal; dayyoti welti diiphemmaxxe'e cubbote isi'a kaddaan.✝

18 « ‹Manji mitti melaalletixxi aada dagge saxxebaaxxe yanna'n mayyaxini diiphoole melaalletixxe aadaka ulfinna shollinsemmaxxee lamiingi ifike ardi giddii'n fullowwaal.✝

19 « ‹Manji mitti adaadati yookaani lankaamati diiphoole maalinxa firunte diingemmaxxee lamiingi farrinaan.

20 « ‹Manji mitti abbiinxe arenni diiphoole abbo isika salphisemmaxxee cubbote insa'ne'a kaddaan; ilabelonna gantaan.✝

21 « ‹Manji mitti dayyiinxa are aadhoole, tinni battooteexxe yaane kaddaan; dayyo isika salphisemmaxxee manjichchotinna isi ila belo gantaan.✝

22 « ‹Magenikinna dhaaldinaashsha assanneki Kanaaniki bogi ha'noo hoo'o hiyye tufabaashsha seeranna aada anxa heqqe; 23 Ha'no edii'ni shorraanneke ardixa aada hordofinoqen; tenne yaane duuchcha assinemmaxe insa'ne jibbeenen. 24 Yaane kinni boga insa'neeka dhaaldinaani; malebikinna ado callini wo'mmeka boga dhaaldinaashsha uwwaanen; wele ardinaa'ni gargari higginaashsha assenneki ani Mageno ha'nooken.

25 « ‹Tennexxee fayyakenna batto'eeke horixxenna ca'axxe oddo'ni gargarunte ugge; ani battitteteni hiyye foye ege'nishennexxenna buttate'ni hedheeke biniinchchuwwini, ci'uwwanninna wele yaanuwwa duuchchani ifi battositinoqen; 26 Ani Mageni woyyichchake kadennaxxeenna ha'no anke arda kaddinaashsha arda welenaa'ni foyeennen, tennexxee ha'nonna woyyoomme.

27 « ‹Labbaki yookaan meyyaxxi ekedha haasossaaka yookaan moraaka kingiki cancaqine shiwwe; reyotixxi murte uwwendeeki balleessa insa'neexxeeten› » hiyye.