1 Duuchchi Woddik Goottinna Muuse'e, 2 «Agenjo agenjoke'ni leelitammaxxi ‹dubartetixxi aada leelitee'na torbaane barra qico'ni battotammashsha, dubarte siila'wite labba belto ildoole torbaane barra qico'ni battootaan; 3 Saddeetteeso baro belti ilemeeki jila ofo'lowaal.✝ 4 Okkonchi udumi'a lebbe gadabi uurraaxxe sase tommenna sase barra qico'ni, Magenoke foyendeexxa mitte yaanenna tuqqoqen; tinni battumma bidhdhatixxi yanna muuxendaaxxe woyyichcha boonchibaa e'yitoqen. 5 Iittani agenjo agenjoke'ni leelitammaxxi dubartetixxi aada leelitee'na battootamashshani, dubarte dubarra ildoole tommena shoole barra qico'ni battootaan; okkoo'ninna gadabi uurraaxxeenna battumma bidhdhatixxi yanna muuxendaaxxe jaane tommenna jaane barra turtowwaali.

6 « ‹Battumma bidhdhatixxi yanna muuxendeexxe yanna'ni labbake belti'aanna kadi meyyaxxe belto'a ciincatike tolchchi'a shiqaaka mitte woggaka gedhebiinka buruusanna cubbo biratike tolchi'a guugenjo yookaan shiixoxxa guugenjo Mageni ulfinniki leellammake duunkaaniinxe hulabaa idagge qeesichchoke'ni uutowwaal. 7 Qeesichchikinna uwwa shiqqeexxa aadheexxi Duuchchi Woddike Gootti edo shiqishaan; cubbo biratika seera muuxaan; munde dunda'neexxe aada dubartetixxenaa'n qulloondaan.

« ‹Kunni seerinna dubarte labbaxxa yookaan meyyaxxa oose ildeechchi uduma muuxemaaken. 8 Manjichcho gedhebiinka buruusa idaga dande'a gophphoole lame guugenjuwwa yookaan lame shiixaramma guugenjo idaggowwaal; lame giddii'ni mitte ciincatike tolchi'a mitte kinni cubbotixxe gattowwaalike tolchaan; qeesichchikinna cubbo biree'naa'a isenna battooma bidhdhitaan› » hiyye Isira'eelike ardi'a seeruwwa konne uwwe.