1 Mageni Muuse «Ardiinxe oddonaa'ni reyeeke manjika rensha tunqe battonabaashsha Aaroonixxe ila kaddeexxe qeesole'a kuli; 2 Firunteti shiqaakika anniinka, amatika beltiinka, beltotika, dayyiinka, 3 Yookaan herundebaaxxe dayyoka malee, 4 Heerumikinna aadhati firoomeeke manjika rensha tunqe ifi batteessinoqen.

5 «Qeesoti reyeeke manji'a yaadati umo haaxxinoqen; areeda haruunsine woxxe'noqeni; alba insa'neekanna hoqe'noqen.✝ 6 Ciincatika tolchanna midhatixa uwwa ani'a Mageno isa'neeke shiqinshaammaxxee woyyoomowwaal; summa ankanna battoosinoqen. 7 Qeesoti Mageno insa'neeke foyeme woyyomemmaxxee yabaabulto dubarte, yookan dubarumma belleesineexxa dubarte, yookaan gursumeecho aadhoqqe; 8 Ardikinna qeesichchi woyyichchake kadeexxa ege'nowaal isi ani'a Mageno ha'nooke midhatika tolcha shiqisha'neeken; woyyonsaanneki ani Mageni ha'nooki woyyichchaken; 9 Qeesetixxi belto yababuldoole anna salphisaan; iseenna giirati gumbe shinnowaal.

10 «Qeesotiinki sooreessi hariirtetixxe zayiten hariiremeekinna qeessummitixxa seemma oddo'wo'a woyyoomeeke kademmaxxee manji reyaa wodda yaaddo ege'nishate umo isika haaxxoqen; seemmatanna daroqqen; 11 Hoone manjiki renshi anniinkenna kadi amatiki renshshi hedheeke miniba mare ifi batteessoqen; 12 Anxi Mageno isikixxi qeesomiinxi woyyumma iso'ni hana hexxemmaxxee woyyichcha Mageno isikike seemmati giissineeke fooqinaa'ni fule renshi hedheeke mine'ni e'ye ifi battosoqen; ani Magenoken. 13 Duuddo dubarricho aadhowwaal; 14 Aro'i reeyeexxa yookaan gursimeelchcho yookaan dubarrumma isexxa balleessineexxa dubarrichcho yookaan yabaabulto dubarte aadhoqqe; duuddo dubarrichcho gosa isixxenaa'ni aadhowwaal. 15 Duuddo dubarricho aadha gophoole oose isixxi battotaani; woyyonsaanneki ante Magenoken» hiyye.

16 Mageni Muuse: 17 «Aarooni'ni ‹Sanne atixxenaa'ni kooko'ichchi huuni manjinna anee ifike Mageni'a midhatika tolcha shiqishoqqe'e; tinni aadanna dagaake baro duuchcha'n heqqendeeshshanni hexxowwaal; 18 Kooko'ichchi manji ikkinna ille ba'eeki, yookaan naafeeki, bifa yookaan dhagga ba'eeki, 19 Anga enqemeeki yookaan lekka enqemeeki, 20 Xukkeeki yookaan hara haru'meeki manji illetixxa dhibo yookaan gargari gargariti hexxeexxa bisiinxa dhibe afeeki yookaan meyya labbichchi ani'a Magenokee itatika tolcha shiqishoqqen. 21 Qeesichcho Aaroonixxe sanne giddii'ni kooko'ichchi huuni manjinna ciincatika tolcha yookaan midhatixxa uwwa Mageno isike shiqisha dande'abaan. 22 Yoona iitta hedheeki manji lamiinxe itanaa'ni woyyootteexxanna hara woyyootteexxa itatixxa uwwa ita dande'aan; 23 Yaane kinni kooko'ichchake kademmaxxee woyyichcha golliba yookan tolchimalchiibaa shiqoqen; tenne woyyosedhenneexxa yaanuwwa battoossa hasisabaan; insa'neenna woyyosedhenneki ante Duuchchi Woddike Goottan› hite kuli» hiyye.

24 Muusenna tenne duuchcha Aarooni'ni, Aaroonixxe oose'ninna arda Isira'eelike duuchcha'ni kule.