1 Mageni Muuse, 2 «Aarooni'ninna oose isixxe'ni, iittani Isira'eelike arda duuchcha'ni ‹Mageni ajajeeki ajaji konnechchin butti'a hedheeken› hite kuli; 3 Isira'eelike ardanaa'ni ayyinna jibichcha yookaan gedhebo yookaan recco Magenoke tolchake asse olla'i giddo yookaan olla'in gadho gorra'oole, 4 Woyyichcha booncho'ni Magenoke uwwate asse Mageni ulfinniki leellammake duunkaaniinxe huddumebaa iyyedaga gophoole, munde tola dunemmaxxee'e ifike ardi giddii'n fulowwaal.

5 «Tennexxee Isira'eelik ardi diidake'ni dulaaka hore Mageni ulfinniki leellammake duunkaaniinxe huddumebaa iyyedagowwaal; qeesichchikinna Duuchchi Woddike Gooti'a mittummatike tolcha asse tolchowwaal. 6 Qeesichchikinna duunkaani giddi'a e'yinammaxxe hulaba tolchimalchii hana munde fixowwaal; Magenoke gammachchiisaakenna fishshaake foole kadaashsha ha'yotanna ciinceesowaal; 7 Isira'eeliki ardi adde Magenoke'ni afeexxenaa'ni bayyisaake durrisi'a hore insa'neeka diida duuchcha'ni dulati Mageno insa'neeka yaadisiyyo hasissabaan; Isira'eeliki ardi seera konne duuchchi wodda heqqedhowaali.

8 «Insa'ne'ninna ‹Huuninna Isira'eeliki manji yookaan ardiinxe oddo'ni hedheeki keesuntichchi ciincatika tolcha yookaan wele tolcha shiqishoole, 9 Magenoke tolcho'a Mageni ulfinniki leellammake duunkaanibaa iyyedaga gophoole ifike ardi giddii'n fulowwaal› hiyyeen hite kuli.

10 «Huuni Isira'eeliki manji yookaani ardiinxe oddo'ni hedhaaki keesuntichchi munde cingitebaaka maala itoole uudee'na isinni ane'ne elabaan; okkone manjonna anke manjishsha uudabo'non.✝ 11 Hedho afeechchi duuchchixxi lubbo hexxeeki munde giddo kaddemmaxxe tolchimalcho'ni dunendeexxi munde duuchcha cubbo biratee kaddaashsha Mageni ajaje'een; munde hedhote kaddemmaxxe cubbo bidhdhinaachchon.✝ 12 Tennexxee Isira'eelike ardi'a hiyyaannexxi ha'nonaa'ni mittikinna, yookaan oddo ha'nooxxe'ni hexxaaxxe keesummanaa'ni ayyinna munde cingitebaaka maala itabaashshaten.

13 « ‹Huuninna Isira'eeliki manji yookaan ardiinxe oddo'ni hedhaaki keesuntichchi indaaka biniinchcha yookaani ci'a fonxore abidoole munde butta duneexxi buttina buyyowaal. 14 Hedho afeechchi duuchchixxi lubbo hexxeeki munde giddon kaddemmaxxee Isira'eelika arda munde cingitebaaka maala itabaashsha ajajeenen; munde cingitebaaka maala itaaki duuchchi ifike ardi giddii'n fulowwaal.

15 « ‹Huuninna Isira'eeliki manji yookaan wele bogiki manji reyeeka yookaan biniinchi shiyeeke biniinchika maala itoole galgali qico'ni batto'aan; seemma borcedhe bisokanna anshedhowwaali; okkoo'ni battetenaa'ni ca'a hiyyaan; 16 Biso anshedha gophe seemmatanna borcedha gophoole cubbote isi'a kaddaan› » hiyye.