1 Duuchchi Woddik Gootti Muuse, 2 «Isira'eelixxe oose'ni kuldattoxi: ‹ayyinna dedhiki cubbo hujoole yookaan haakitiki Duuchchi Woddik Gootti uwweeke ajajuwanaa'n mitte sa'oole konnechchi butta hexxeexxa aada muuxowwaal.

3 « ‹Qeesetiki sooreessi cubbo hujee'naa itti cubbo arda duuchcha daaffaaxe kaddoole, fayyaka jibichcha iyyedagowwaal; cubbo isixxa biratee Duuchchi Woddike Gootti'a tolcha shiqishowwaal. 4 Jibichchakanna Mageni ulfiniki leellammake duunkaaniinxe hulaba iyyedage anga isixxanna jibichchiinke umi hana ugge Duuchchi Woddike Gootti edo gorra'owaal. 5 Ookkonchchi uduma hariiremeeki qeesetik sooreessi, jibichchiinxe mundenaa'n shiixxoxxa aadheexi duunkaani giddi'a e'yati, 6 Munde eettene giddo qubichcho isika cuupha'n Mageni ulfiniki leellammake seemmati giissinemake fooqike golo'ni torbaanele fixowwaal. 7 Umi qeesichchi eettene mundenaa'n shiixxooxa aadheexxi duunkaani giddo Magenoke hixaana gunbamalcho'ni issowwaal; gatteexxa munde kinni duunkaanibaa e'yatixxe huddume'ni ciincatika tolchimalchi hunda dunowwaal. 8 Cubbotike tolchi'a shiqqeexxa Jibichiinxa ha'yonna godobi giddira buqaaka mooro'o, 9 Lame kalattuwwa, tenne kalatuwwa hananna ciinachuwwinke qarqara'n hedheeke mooro'o, iittan tidhoti hana hedheeka saapha kalatuwwati welti fulchowwaal. 10 Qeesichchi tenne ha'yo duuchcha aadhe tolcha ciincesinamma tolchimalcho'n ciincesowwaal; konne tolchiik seeri muuxemaa qici mittoomiinke tolchi'a shiqammake horenaa'n ha'yo aa'ne ciincesinammake seershsha kadowwaal. 11 Yaane kinni goga, maala duuchcha, umo, ha'yonna lukuwwa, madhumatanna godobi giddiira duuchcha, 12 Olla'akenaa'n bayyise bululo hunnaaba batto'ebaake boonchiba mare'e haqqe bukki asse'e giira ha'isheexxi gubowwaal.

13 « ‹Isira'eelik ardi haakitik cubbo hujoole, cubbo ittinna arda duuchchanaa'n sho'ondoole, tinninna Duuchchi Woddike Goottike seeruwwanaa'ni mitte sa'atixxe cubbo kaddoole, 14 Hujendeexxi cubbo ege'nendeenge hirba'ni ardi cubbo biratee kadaaka mitte jibichcha iyyedagowwaal; isoonna Mageni ulfinnik leellammake duunkaani edo shiqinshowwaal. 15 Ardiinxi hayyoolenna Duuchchi Woddike Gootti edo, anga insa'nexxa jibichchiinke umo'n hana uggiteexxi Duuchchi Woddike Gootti edo gorraatowwaal. 16 Qeesetiki sooreessi jibichchiinxa munde shiixxoxxa aadheexxi duunkaani giddi'a e'yowwaal; 17 Munde ettene'n qubuchcho cuupha'n Mageni ulfiniki leellamake seemmat giissinemmake fooqike goli edo torbaanele fixowwaal. 18 Iittann shiixxooxxa munde aadheexxi Mageni ulfinniki leellammake duunkaani edo hedheeke hixaaniinke gubemalchike cunnuchuwwa'n issowaal; okkoo'n gatteexxa munde kinni duunkaanibaa e'yatixxe huddume'n tolchimalchi hunda dunowwaal. 19 Ookkoo'n itti aanche'e konne jibichchixxa ha'yo duuchcha aadheexxi tolchimalchoke'n ciincesowwaal. 20 Tolcha konnee muuxati seerinna cubbo biratee shiqinshammaka jibichcha tolchinammake seerishsha kaduun; konne qicinni ardiinxe cubbo'a tolcha tolchinaan; ardikinna cubbo isixxe gattowaalii alfaan. 21 Ookkoneechchi udumanna jibichcha olla'akennaa'n bayyiseexxi ifixxe cubo'a shiqishemmaka jibichcha assemashan konneena gubowwaal; kunnina ardiinxa cubbo biraake tolcha kadaan.

22 « ‹Cubbo haakitik huje Duuchchi Woddike Goottika ifike Mageniinka seera sa'eeki ardiinke hayyichcha kadoole balleesanjoken. 23 Cubbo hujeexxa ege'neenge hirba'n fayyaka recco cubbo biratike tolchchi'a iyyedagowwaal. 24 Anga isixxanna recciinke umi hana ugge, tolchinammake boonchibaa'n middi darre'n ciincatike tolchi'a iyyedangaaka hore gorranammaba Duuchchi Woddike Gootti edo gorra'owwaal; kunninna cubbo biraake tolcha kadaan. 25 Qeesichchikinna cubbo biratee shiqemmake horixxe munde'n qubichcho cuupha'n tolchimalchinke shooliinge kasike cunichchuwwa'ni issowwaal; gatteexxa munde kinni tolchimalchi hunda dunowwaal. 26 Ha'yo duuchcha tolchimalchi hana ciincesowwaal; konne tolcha tolchchina seeri mittoominke tolchi'a shiqaake horixa ha'yo ciincesamake seerishsha kaduun; konne qicin qeesichchi ardiinke hayyichixe cubbo'a tolcha tolchati cubbo biraan; hayyichchikinna cubbotixxa gattowaal alfaan.

27 « ‹Ardi giddii'n mitti manji haakitiki cubo huje Mageniinke seeranaa'ni mitte sa'oole balleesanjoken. 28 Cubbo hujeexxa ege'neenge hirba'n fayyaxxa recco cubbo biratike tolchi'a shiqishowaal. 29 Anga isixxanna reccotike umo'n uggowaal; tolcha tolchinamma boonchonaa'ni middi darre'n tolchake shiqaaka hore gorranammaba gorra'owwaal. 30 Qeesichchikinna reccotixxe munde'ni qubichcho cuupha'n ciincatika tolchimalchiinke shooliinge kasaa'n hedheeke cunnuchchuwa'ni issowwaal; gatteexxa munde tolchimalchi hunda dunowwaal. 31 Mittomiinke tolchi'a shiqammake horixxa ha'yo aa'nammashsha tenne reccoxxanna ha'yo duuchcha bukk asse aadhowwaal; konneke tolchik fooli Mageno gammachiisaake kadaashsha tolchimalchoke'n ciincesowwaal; konne qicini qeesichchi ookkone manjichchixxa cubbo biratika tolcha tolchaan; ookkone manjixxi cubbonna gattowaal hiyyendaan.✝

32 « ‹Cubbo baratike tolchi'a gedhebiinka tolcha shiqishoole, fayyaxxa gedhechcho shiqishowwaal. 33 Isinna gedhochchotike umi hana anga isixxa uggowwaal; tolcha tolchimalchoke'n middi darre'n ciincatika tolchi'a shiqinshammaka hore gorranammaba gorra'owwaal; 34 Qeesichchikinna gedhechchotixxe munde'n qubichcho cuupha'n ciincatika tolcha tolchimalchiinge shooliinge kasa'n hedheeke cunuchchuwa'ni issowwaal; gatteexxa mundenna tolchimalchi hunda dunowwaal; 35 Ookkoneechchi uduma mittoomiinke tolchi'a shiqamma horixxa ha'yo aa'ne bukki assinamashshan tenne gedhechchoxxa ha'yo duuchcha bukki asse aadhowwaal; ha'yotanna Duuchchi Woddike Gootti'a shiqaake tolchuwwinni welt tolchimalchoke'n ciincesowwaal; konne qicini qeesichchi okkone manjichchi'a cubbo biratika tolcha tolchaan; okkone manjichchixxi cubbonna gattowaal hiyyendaan.