1 Mageni Muuse, 2 Aarooniinna oose isixxa «Woyyichcha summa anka battoossitinabaashsha, Isira'eelixxi oose foote ani'a shiqishshaaxxa uwwa duuchcha ulfinniki aadhdhe; ani Magenoken. 3 Isira'eelixi oose ani'a gargari foote shiqishsheexxe woyyite uwwaba qeesotiinke min hadinaa'ni ayyinna batto'eeki shiqoole Duuchchi Woddike Gootti edii'n fugusemeba'owwaal; tinni aadanna dagaake baro duuchcha'ni heqqende hexxaan; Ani Magenoken.

4 «Aaroonixxe ilanaa'ni huuni manjinna mundiinka dhukkuba yookaan bisokenaa'ni fulaaka shamina afeeki battooma bidhdha qico'ni heeneenna woyyitee uwwa itoqqen. Renshi tuqee'na battooteexxa yaane tuqeeki yookaan finnake kadammaki wodi'i fule shansheeki, 5 Iittani batto'eeka biniincha yookaan batto'eeka manjo tuqaaki; 6 Huuni qeesichchinna tenne yaanuwwa tuqaaki hashshi qico'ni batto'aan; biso isika wodi'iki anshedhaaxxee woyyitte uwwa itoqqen. 7 Arishsho e'yiteechchi uduma kinni battooma bidhdhammaxee isika qoobbo woyyitte midhatixxa uwwa ita dande'aan; 8 Reyeeka yookaan biniinchi shiyeeke horika maala itoqqen; iso itoole batto'aan; ani Magenoken.

9 «Qeesoti duuchchi ani uwwennexxa aadatixxa akeette heqqedhowaal; tenne assa gophoole kinni woyyichcha ajajixxe akeette'a ajajema gophemmaxxee balleessate kaddee'na reyaan; woyyonsaanneki ante Magenoken.

10 «Woyyotteexxa uwwa ita dande'aaki qeesichchiinke mini hado kadeeke manjo callan; weli manji kinni itoqqen; qeesichchiinxe keesumma kadeeki yookaan rundake hujaaki manji itoqqen. 11 Qeesichchi maallaqqiki hedheeki yookaan mine isike'ni ilemeeki erganji kinni qeesichchiinka qoobbo itowwaal. 12 Qeesichchoke kadebaake manjo'ni heerundeexxi qeesichchiinxi belto woyyitte uwwa ittoqen. 13 Yaane kinni anno ildebaangi aro'i reyeexxi yookaan aro'o waalde anniinke mine'ni hexxaaxxi belto qeesichchiinxi belto oosumate'ni assitammashsha anniinka qoobbo woyyitte uwwa ittowaal; kaddolenna qeesichchiinka mini hado male weli manji woyyitte uwwa itoqqen.

14 «Qeesichchiinke mini hado kadebaaki ayyi manji ege'nebaangi woyyotteexxa uwwa itoole eettene itaka wo'ma hiranna onde anganaa'ni mitte anga lebe qeesichchokee hiissowaali. 15 Isira'eeliki ardi Magenokee idagaaxxa woyyitte uwwa qeesoti, 16 ita hoyyemeeki manji ito'a uwwe battoossoqen; iitta hexxeexxi yaanne okkone manjo mura woxaashsha assitaan; uwwa duuchcha woyyoonsannoki ante Magenoken» hiyye.

17 Mageni Muuse: 18 Aarooniinna Isira'eelika arda duuchcha «Isira'eeliki manji yookaan Isira'eelike ardixxe oddo'ni hedhaaki keesuntichchi werreegi werreegemmaki muuxemee'na yookaan eeyyante isixxinni ciincatika tolcha shiqishoole, 19 Tolchikinna adhdhemaashsha mitte fayyaka gedhechcho yookaan recco labbake kadowwaali. 20 Hooneenna batto'eeka hore shiqishinoole Mageni adhdhabaan.✝ 21 Ayyi manjinna worreegi muuxemee'na yookaan eeyyanete ifixxenni mittoomiinka tolcha Magenokee shiqishoole, Mageni edo adhdhemaashsha shiqishaaki fayyake kadowwaal. 22 Balla'a, enqemeeka yookaan naafa yookaan malaata'neexxa mada afeeka, qanxo yookaan fissi hiyyeechcho afeeka hooneenna hore Magenoke tolcha assite shiqishshoxxen; iitta hedheeka hore tolchimalchoke'n itatike tolcha assite shiqishshoxen. 23 Kooko'ichcha yookaan dhagga ba'eeka hore fedhi ifixxike tolcha assine shiqisha dandesissan; yaane kinn werreegemmaxxi yaane muuxendeeki manji iitta hedheeka hore tolchake asse shiqisho'a dande'abaan. 24 Boga atike'ni midhatte miidhendeeka yookaan afebaaka hore Magenokee tolchake assite shiqishshoxxeni.

25 «Wele bogike manjika hore Magenoke tolchake assite shiqishshoxen; iitta hedheeki horuwwi batto'eeshsha laakko'emammaxxee Mageni edo adhdhemabaan.»

26 Mageni Muuse, 27 «Jabbe yookaan gedhebiinxi yookaan re'etixxi beltanna ilendaa wodda torbaane barra amati turtowwaal; saddeteessoxxe barranaa'ni ke'issine Magenoke ciincatike tolcha assine shiqisha dandesissaan. 28 Saayya jabbeti welti, gedhechcho beltanjoti welti yookaan recco beltanjoti welti mitte barra'ni tolchitoxxen; 29 Magenoke galatiinka tolcha shiqishshatto wodda Mageni edo adhdhemaashsha akeette aadatixxa heqqi; 30 Langa bari'a galchiteboxxongi duuchchiinga tolchemeexxe barra'ninni ite biri; ani Magenoken» hiyye.

31 Mageni «Ajaja anka muuxxe; ani Magenokeni; 32 Woyyichcha summa anka salphisinoqen; Isira'eeliki ardi duuchchi ani woyyichchake kadennexxa ege'ne ulfeessowaal; woyyoonsanoki ante Magenoken; 33 Mageno ha'nooke kadonnaa'a Gibtseke boganaa'ni fulchchenneki ani Magenoken» hiyye.