1 Anke dayyuwwa Isira'eelixee anxe qalbexxi halcha Magenokanna soodataannek insa'ne anjirremaashaten. 2 Insa'ne Magenoke hinaafa'nexxa insa'nexxe dhuga kula'nen danda'anon; yaane kinni insa'nexxi hinaafe ege'nabeloxxe. 3 Mageniba'n daggaxxa qullumma ege'nagopheyyotinna ifika qullummaika ora halsa hanseexxe Mangexxee qulluma ifi uuneba'a. 4 Iso'n amanaak duuchchi anjiremo'a Kiristoosi seeriinke muuxaman.

5 Muuse Seerdarre'n daggaaxxe qullumaxxee «Seer ajajeexxa assaak ookkone seern hedhaan» hiyye'een. 6 Amanati daggaxxi qulluma kinni hitaaqic, «Qalbe giddo, ‹Ayyete iimi'a me'a?› hitoxxee!» Tinninna Kiristoosi'i iimi'n dirrisaten. 7 «Yookaan, ‹Qalbe giddo wiiddi hundixxe balle'n butta ayyete mara?› hitoxxe, tinninna Kiristoosi'i reyotenaa'n ke'isateeten.» 8 Higgeen hiyyende borreesendeeqic, «Magenk hiyyichchi iti bira hedheen; matanga afo'o atoke'ninna qalbe atixxi giddo hedheen» kunninna no'o lalanba'eneke amanatike hiyyichon.

9 «Yessuusi Goottaken» hite'e afo'i atikenni dhugaa kuldotole, Magenikinna iso'o reyotenaa'n ke'iseexxa qalbe atixxi giddo amandotole anjirendatto. 10 Tinninna kaddeechchi manji qalbe ifixxi giddo amanoole qulloma, afo'o ifikeninna dhugaa kuloole anjiremamaxxeeten. 11 Woyyichchi Maxaaf hiyya'neqic, «Iso'ni amanaak duuchchi shookaba'a.» 12 Ayihudikenna Ayihudake kadebaake mannixxe oddo'n gargarumma hexxeba'a; iikki mitti Gootti duuchingike kademaxxe isoo ye'akaka duuchchanna birasa'ise eebisa. 13 Tinninna kaddeechchi, «Goottinka summa ye'aak duuchchi anjiremaan» hiyyende borresendemaxxeeten.

14 Amannebaakata hitta isoo ye'a dandeena? Lsixxe lanqebaank hitta iso'n amana dandeena? Insa'ne'n lalabaak hedhebaak hitta laqa dandeena? 15 Ergemmebaak hitta lalaba dandeenna? Tinninna, «Eloxxa odo lalabaake mannixxa daga hittatta oloxxe» hiyyendeexxi borresendemashaten. 16 Yaane kinn Issayaasi, «Anke Gootta no'oxxa erga ayyete adhdhe?» hiyyeexxi haaso'emashaqicinni tenne eloxxa odo duuchchi adhdheba'a. 17 Yoonna amana daggaak erga lataqatenaa'nten; tinni ergak hiyyichinna Kiristoosixxe kulemeeke hiyyechinaa'niten.

18 Ani qore, insa'ne hiyyicho lanqeeban hiyyoteteta? Dugaten, laga lanqeneen;

«Hiyyichchi insa'nek butta duuchcha'n laqis,

haaso'i insa'nekinna buttatixxe gabalaqico'n geye.»

19 Higeenn qoro, Isira'eelik ardi qalbefatebayoteeta? Muuse eediseen,

«Anke arda kadebaake ardinni ha'noo hinaafinshsha assanon;

qalbeefatabaake ardinninna ha'no mufachiisano»

20 Issayaasinna, «Ane'e hasebaake manni'a afemenne, qorebaakeri'anna leellenne» hiyye afo'o wo'me haaso'edheen.

21 Yaane kinni Isira'eelike ardixxee isi, «Ajajemabaakenna

xaqartchi ardi anibaa dagaasha insa'neba'a

barra duuchcha anga anxa diriirisene» hiyya.