1 Yoona maa hinnanno? Badhaadhi bira sa'aashsha cubbo hunja'ni he'noo? 2 Haranga waawwo'o, no'o cubbotee renneennen, hittata edi'a cubbo hunja'n he'nanno? 3 Yessuusi Kiristoosinni welti mitteke kandonna'a xammaqqemmeennek duuchchi, isixxe reyonni mitteka kandonna'a xammaqqemmennexxa egendineebaata? 4 Tennexxee Kiristoosi Aabike ulfinninni reyotenaa'n keemmashshanni iittanni no'onna haaroxxe hedhonni he'nonnaa xammaqematixxe reyonni isinni welti mooggemmeennen.

5 Isixxe reyonn isinni welti mitteke kandennechchinni isixxe ke'anni iittanni isinni welti mittoommannoxxi kokaken. 6 Yoona cubbotixxe garboole kandabe'noshshanna no'oxxi cubbotixxi manjumma baxxaashsha dullate no'oxxi manjumma Kiristoosinni welti fannisendeexxa egenneennen. 7 Tinninna kaddaachchi reyeek manji cubbotenaa'n leexa fuleemmaxxeeten.

8 Yoona Kiristoosinni welti renno'oonnole isininni welti hedhoti he'nannoxxa amanaannen. 9 Kiristoosi reyotenaa'ni keemmaxxee, langaxxa reyabaaxanna reyo iso'n langaxxa mootabaaxxa egenneennen. 10 Isi cubbote langaxxa reyabaa qicinni mittele reyedheen; ta'a hedhoti hedhaa kinni Magnokee hedha. 11 Iittanni ha'no cubbotee rertine'eeshsha, yaane kinni Yessuusi Kiristoosi darree'n Magenokee hedhoti hexina'neeshsha ifi uudde!

12 Tennexxee fuggoxxa isixxa halcha muuxxino'a reyaake ha'noke maala'n cubbo mootaashsha assitnoqqe'e. 13 Iittanni ha'nooke bisika qooluwwa fuggoxxa assatike miya assitineexxi cubbotee shiqishshinoqqe'e; Yaane kinni reyotenaa'n kexxineexxi hedhoti hexxineeshsha ifi uudati Magnokee ifi uwwe; ha'noxxe bisika qooluwwanna qullumatike miya assitine Magenokee ifi shiqishshe. 14 Ta'a ha'no hexxina'neek badhaadhi hunda malee'e Muuseke seeri hunda kada gophpheemmaxxee cubbo ha'no'n mootoqqe'e.

15 Yoona heente kadda? Seeri hunda kada gophati badhaadhii hunda he'nennexxee cubbo hunjoota? Haranga waawwo'o. 16 Mitte manji'a garbake kaddine ajajendino'aa ifi uutinaa wodda ookkone ajajendina'neeke manji'a garba kaddineexxa egendineebaata? Iittanni cubbotee ajajendinaa wodda reyote'n ha'noo geessissaaxxe cubbo'a garbake kaddinaan; Magenoke ajajendinaa wodda kinni qullumma alfitinaan. 17 Yaane kinni ha'no edo cubbotixxe karboole kadineemmake kaddinoole midde ta'a adhitineexxe barachcho'a wo'ma qalbenni ajajendineeke kaddineemmaxxee galat Magenokee kadowwaal. 18 Cubbitixxe garbumanaa'ni leexa fuldineexxi qullummatixxe garboole kaddine'een.

19 Ha'no maalik qalbeefachchotixxe gonphe affineemmaxxee manjiinke haaso'ishsha haaso'aannen. Edo ha'no ha'noke bisika qooluwwa garbummati battumateenna bira saxxa'n me'itaaxxe fuggaalessuma'a shiqishinenmashshanni iittani ta'a ha'nooke bisik qooluwwi qullooma'a qullumatike garba assine shiqishshe. 20 Cubbote'e garbake kadineemma wodda qullumatenaa'n leexa fuldineemman. 21 Ta'a ha'no itti shookkina'neexxe yaane'n ookkone wodda isenaa'n maa la'o afineemma'a? Eettene yaanek muuxami reyoten. 22 Ta'a kinn cubbotixxe garbumanaa'ni leexa fulat Magniinke erganjuwwa kadat qullumma alfitinaan; qullummati muuxaminna duuchchi woddixxe hedhon. 23 Cubbotik rund reyote. Mageniinxi uwwa kinn Gootta no'oke Yessuusi Kiristoosi darree'n duuchchi woddixxe hedhon.