1 Yoona anke dayyuwwa Manjunte ha'noxxi Mageno gammachisaaxxenna hedhoke woyyichcha tolcha assitineexxi Magenoke'e shiqishinaasha Mageniixxe mararenni ha'no'o kadhataanen. Tinninna aanne affeexxa dhugaatixxa magenooffachcho. 2 Eloxxa, gamachisaxxanna luqqitte Magenxa fedhi maacho kaddeexxa hubatine egendinno'a giddixxe ha'noxxe qalbexxe haroma'n jijireme male tenne butta labbinoqe'e.

3 Ha'no mitte mittenge Magen uwweexxe amanaxxe qixxe'n, hexxeneqicisha ifi uudde malee hexxineba'a iimidarre ifi caaqasiten heddinabaashsha ani'a uwweemeke Magenke badhaadhidhinni ha'no'o gorsa uwwaanen.

4 Mitti mitti no'ong mitte biso'n heddo qooluwwa anfeenen; kunni mitti mitting bisiink qoolwwinna mitte mitte bifaxxa huje anfemabaashanni, 5 iittanni no'o heddokke kandeenni he'nenexxi Kiristoosi darre'n mitte bison; no'o mitti mittig wele manjike bisike qoola. 6 No'o'a uwwemeeke dadhaadhishanni gargaritti hexxeexxe uwwa anfe'enne. Mitteke uwwendeexxi uwwa raaga haaso'ate kaddoole ifixxe amanaxxe qixxe'n wabeekuma haaso'owaal. 7 Ergatemate kaddo'oole ergatemowaal; barssisate kaddo'ole barsiisowaal; 8 Uwwendeexxi uwwa gorsa uwwate kaddo'oole gorsowaal; gopheeke qoodate kaddo'ole birsa'ise qoodowaal; galchate kaddo'oole jabaate galchowaal; mararate kaddo'oole gammashot mararowaal.

9 Eeyya ha'noxxi dhugaatike kaddowaal; fuggoxxa yaane xireefatte; eloxxe yaanenni guduunfemme. 10 Dayyuwwinsha wel wel jabeesitine eeyye; mitte wele umo ifikenaa'n sa'isat wel wel ulfeesse. 11 Gootta ergatematee Hafuurnxi hedhonni finiqqitineeke kadde malee konne ergatenshatike si'inaa'n uduma higginoqe'e. 12 Magen uwweexxe addachiisa'n gammaddee; rakkoti wodda ossee! Jaabatine soodattee! 13 Rakkiyye amaange dayyuwwa gargaarre; keesumatanna adhdhe.

14 Ha'no shorshaaka eebisse; eebisse malee'e badindinoqe. 15 Gammadakern welt gammadde; oodhakerninna oodhdhe. 16 Weli aagineexxi hedhdhe; heenoxxa hedho hedheekirn welt hedhdhe male'e hollitnoqe'e; ifinna saadinoqqe.

17 Ayyi'anna fuggoxxixxa bado fuggoxxa hissitinoqe; manji duuchchi edo eloxxa kaddeexxa yaane asse. 18 Manji duuchchinn welti nage'ik hedhatee ifi darre'n ha'no dandeesissaxxa asse. 19 Anke dayyuwwa mufe Magenoke waalle male'e halo fuldinoqe'e; «Halo anxenni; halotanna fulamok anten» hiyyende borresende'een. 20 Tennexxe halo fulatixxa bado solo'woole naapha atika itis; dheebe'wolenna ha'wis; tenne assittotole umo isike'n giiratika kashilo tuuldato. 21 Fuggoxxa eloxxenni ijifati malee fuggoxxen injifatendoqe'e.