1 Ani Kiristoosike hedhenexxi dhuga haaso'no; sammo anxi Woyyichchi Hafuurinni ani dhara hasisabe'noxxa ane'n kokesitaan. 2 Jabaxxi yaadonna uurcho affebaaxxi wixxixxiyya qalbe anxe'n hexxen. 3 An anke dayyuwwa kade'eke anke ardixxe hiyye badinemeke kadonanna Kiristoosinaa'n gargarg higeexxi unemeeneke kadona'a ee'ya'enan. 4 Kaunni maninna Isira'eelike ardan; Magenxe oose kada, Magenke ulfina leella, kako aaggo, seernxi uwwensha, Woyyichi galmix aadanna addachiisa uwwendeemak insa'ne'atenman. 5 Edik annuwwinna insa'neken; maaldarre'n Kiristoosinna dageeke insa'nenaa'nten; isi duuching cala kadeeke duuchchi woddi'a saademeeke Magenon; Ameen.

6 Yaane kinni Magenk hiyyichchi jijiremeen hiyyoteba'a; Isira'eelixxe sannenaa'n ilemeeke duuchhci Isira'eeliteba'a. 7 Iittanni Abirihaamixxi sanne kadeek duuchchi isixxe ooseba'a; tinninna kadagophe'eechi Mageni Abirihamii'i, «Horte atixxi Yisaaqi darree'n ye'endaan» hiyyemaxxeten. 8 Iittayyo Magenxe oose hiyyemeek Abirihaamike gudeedixxi horte kaddebaag isixxe horte hiyyendaaxxi addachiiatike hiyyichchixxe oosen. 9 Tinninna kaddeechi «Yanna geltoole higee daganon; Saaranna labba belto ildaan» hiyyendemaxxeten. 10 Tenne calla kadebaag Ribqaxxi oose mitte anna afe'en; isinna anna no'oke Yisaaqiten.

11 Iitti lakkanno ilndebaang yookaan elo yo'oxxa assitebaang Magnk yaadi filati kadaasha, 12 hujet darre'n kadebang ye'ak darre'nte kaddaammaxxe «Angaf maa'nake ergatemowaal» hiyyende ise'n kulende. 13 Tinnanna, «Ya'iqoobi eeyyenne, Eesawu kinni gibene» hiyyende borresendemashaten.

14 Yoona maata hinanno? Mageni gamisaata? Harnga waawo. 15 Tinninna kaddeechi Mageni Muuse'n, «Mararona'a haseneke maranon; owwona'a haaseneke owwanon» hiyye'eman. 16 Yoona tinni manjiinke hasitisha yookaan hujeshate kaddebang Magenxe mararteshaten. 17 Tinninni kaddeechi Maxaafi Feri'oonixxee, «Hunna anxa ate'ni leelishatenna summi anki butta duuchcha'ni ege'nemasha ate'e tennexxee motatosha assene» hiyyemashaten. 18 Tennexxe Magen mararo'a haseeke marara, godoba jabeso'a hasaaka godoba jabeessa. 19 Ha'no giddii'ni mitti ane'e, «Magenixa fedhi giba dandeesisa gophenexxinni Mageni mayeeta manjo ta'iqico aalata?» hiyye qoraak hedhaxxe hexxeen. 20 Yaane kinni koo manjo ati Magenoke'n mornshatika hissicho haasotota'a isi aate? Mitte huje isee hujemaka manjo, «Maye ane'e tenne bifa'n» hujjete hitata? 21 Yookaan faarinka miyik hujall mitti miya ulfaatexxe bakka'a mitti kinni anfeeba uggumaaka miya giisatika baaloma afebaata? 22 Mageni mufe ifixxa ege'nisho'anna hunna ifixxa leelisho'a haseexxi mufe ifixxa insa'ne'n leelishaaka, ba'nete qixxesemeeka manna insa'ne osu'u maa egendette? 23 Tenneena asseechi ediseexxi ulfinnixxe bakka'a qixxesemake ookkone mararte ifixxa leelisha'neke manna'n ifike ulfixxi duruma ege'nedo'a asso'oolena'a maa egendette? 24 Magen ye'eek Ayihudike manni calla kaddebaak no'o Ayihudake kadebe'nokenabaata? 25 Tinninna Hoose'i giddo

«Anke arda kadeemabaaka, ‹Anke arda!› hiyyee'e ye'anon,

eeyemebaaka anka arda ‹Eeyemeke› hiyyee'e ye'anon» hiyyendemashaten.

26 Insa'nenna, «Ha'no anke ardabaan

Hiyyeme kullememake ookone booncho'ni,

‹Heddoke Magenxe oose› hiyyeme

ye'emaan» hiyye.

27 Issayaasinna Isira'elixxee'e hafuura gikkaseexxi hiyye haaso'eqic:

«Isira'eelike ardik laakkossi abbayatike maanchishsha bira sa'ollenna

Insa'nenaa'n hafe calli anjirendaan.

28 Tinninna Gotti murte ifixxa

butta'n rakeexxi muuxaminxe yanna'n muraan.»

29 Tinnina edo Issayaasi,

«Dada duuchcha ajajaak Duuchchi Woddik Gootti no'aa horte gatisa gopheele

Soodomishsha kandeenan

Gomoranna sila fakkantenan»

Hiyye'e haso'emashate.

30 Yoonata maa hinanno? Amanat dagaaxxa qulluma, qulluma alfatee elo'ebaak Ayihudake kadebaak manni alfe. 31 Yaane kinni seera heqecat daggaxxa qulluma halsemak Isira'eeli ardi eetene qullumma alfeba'a. 32 Tinni mayee kadde? Insa'ne'e qullumma alfate hanseek amanatite kaddebaak hujeti kaddesha halsenemaxxeten. Tennexxe insa'ne gufotike kinjo'n gufante. 33 Tinninna

«Kunse manjo gufatasha assaaka kinjo Tsiiyooni'n uggurannon;

iso'nininna amanaaki shookabaan» hiyyende boresendeshaten.