1 Tennexxe Yessuus Kiristoosi'n hedheekri'a ta'a insa'n murendaba'a. 2 Tinninna kaddeechi hedho uwwak Woyyichchi Hafuur seer Yessuusi Kiristoosi darre'n cubbotike seernaa'ninna reyotike seernaa'n no'o'o tikemaxxeten. 3 Seer, maalnke dadumike adabinaa'n keexxeexxa ifigopheexxi assatee dande'agopheemaxxa yaane Mage belto ifika cubbote tolchemo'a cubbichi maanlxe fakke'n ergiyot ookkone isike maala giddo cubbote'n mure. 4 Tinneneenna asseek no'o'o maalnxenite fedhenite kaddebaag Hafuurxe fedhinni he'naa'neke'n seer hasa'nexxi qulluma womaqicinni muuxendo'aten.

5 Maalnxe fedhisha hedhaakir qalbe ifixxa maalinxe halcha'n uggura; Hafuurnxe fedhisha hedhaakir kinni qalbe ifixxa Hafuurnxe halcha'n uggura. 6 Malnxa yaane hediyyo reyoten. Hafuurinxa yaane hediyyo kinni hedhotenna nage'aken. 7 Tennexxe maalnxa yaane hedaaki manji Magenoke naaphan; isinna Magenoke seeri'a hiremaba'a, hiremanna dande'aba'a. 8 Manlxe fedhisha hedhakir Mageno gamachiisa dande'aba'a.

9 Ha'no kinni Magenk Hafuur ha'no giddo hedheexxe kaddoole maalnxe fedhishate kaddebaag Hafuurnxe fedhisha hexxina; ayyinna Kirstoosika Hafuura afebaak is Kiristoosi keba'a. 10 Yaane kinni Kiristoosi hano giddo hedhoole bisi ha'noke cubbotixxe buuto'a reyeeke kadoolenna irri ha'nok kinni qullumatee buutonni hedhoti hedha. 11 Yessuusi'i reyotenaa'n ke'iseek isik Hafuur ha'no giddo hadha'noole, Kiristoosi'i reyotenaa'n ke'iseek ha'no giddo hedha'neeke isike hafuur reyaake ha'noek maali'a hedho uwwaan.

12 Tennexxe anke dayyuwwa no'o idake anfe'ene; yaane kinni kunni idi maalnxe fedhisha he'nonna maalaketabaa'a. 13 Malnxe fedhisha hexxinoole rertinaan; yaane kinni Hafuurk maalnxa huje shiltinoole hedhot hexxina. 14 Tinni kaddaachchi Mageniik Hafuurnni akeekemaak duuchchi Magenxe oose kademaxxeten. 15 Soda'ati hexxinaasha haaroba ha'no'o garbake assaaka Hufuura adhitine'ebaan; yaane kinni adhdhitineek Hafuur, «Annayyo» hitina'n yexxinaasha assaake beltumatika Hafuuran. 16 Mageniixe oose kandeenexxa iikki Hafuur no'oke irrni welt mitteba higeexxi dhuga kula. 17 Yoona Mageniinxe oose kandeenexxinni no'o isike dhaalnjuwanni, ittayotinna no'o Magenke dhalnjuwwan; Kiristoosinni weltinna dhaalanon; ta'a Kirsitoosn welti rakko adhinonole uduma iska ulfinna isin welt adhdhinano.

18 Konne barrixxi rakko edi'a no'o heqita'neeke ulfinni welti hergendoole mittelchishanna lakko'endabaaxxa ege'ne'ene. 19 Dada duuchcha Mageniixxe oosexxe leella lumoxxe halchanni heqqexxa'nen. 20 Dada duuchchi way fulagophate'e hirendaashsha assende'een; Tininna dada fedhi ifixxenite kadebaak addet hirendaashsha assikixxe fedhinten. 21 Tinni addachisanna dada umo ifikeninni ba'netixxe garbuntenaa'ni leexa fuldeexxi Mageniixxe oose kadaaxxe leexumaba'anna ulfiniba'a geltaashaten.

22 Telchiqico'n dada duuchcha cintoti wixxiyanni aadiyyote'n hexxeexxa egene'enen. 23 Yaane kinni aadiyyote'n hexxexxi dada calla kaddebaag no'onna uminxa Hoyyichchi Hafuurxa gumma alfinenek Magenxe oosumake ulfinna kade'eeka biso no'okixxa wodensha halchaati heqe'na'n ifik giddo aanda'enen. 24 No'o tenne addachisaan anjirem'een; yaane kinn addantaxxi leeltaaxxe yaane kadoole addeteba'a. Anga hexxeexxa yaane aate adde assedhata? 25 Yaane kinni anga no'oxxen hexxebaan yaane addantole, eetene yaane ossunteti heqqe'nanon.

26 Iittanni Hafuur ifi gonphe no'oxxe'n no'o'o gargaraan; no'o hitta soodata haasissaqico ege'nagonbe'no; Hafuur kinni tennete hiyyeme haaso'emabaake ornni no'oxxa bado aadinoti no'o'a sodataan. 27 Qalbe no'oxxa qorqooraak Magen Hafuurnka yaada ege'nedhen; tinninna kaddaachchi Woyyichchi Hafuur Manjixxe fedhisha woyyolete insa'nexxa bado insa'ne'a soodatamaxxeten.

28 Mageno eeyakeri'a isixxe fedhisha ye'emeekeri'a Magen yaane duuchchi insa'ne'a eloxxe kaddasha assaaxxa egen'enen. 29 Tinninna kaddeechchi Magenik edise ege'nemakar Belto isika lanbasha ediseen mure; tinninna heddo dayyuwwi giddo isi angafake kadaashaten. 30 Belto isika lanbasha ediseen muremakaranna ye'e, ye'emakaranna qullonse, qullonsemakara ulfeesse.

31 Yoona tenne yaane'a maa hinanno? Mageni no'onni welti hedhoole ayyete no'o gareera? 32 Ifike mitte belti'a mararebaang no'o duuchchinge iso'o sa'ise uwweexxenni hitata belto ifiken welt duuchinxa yaane no'o'a tola uwwagophata? 33 Mageni fi'leeka manna aate insa'ne kula? Insa'ne'e qullonsaak Magenoken. 34 Insa'ne'n muraak aateta? Reyeek reotenaa'ninna ke'eek, Magenike midda'n ofoolek, Kiristoosi Yessuusi no'oxxa bado no'o soodataan. 35 Kiristoosixxe eeyumanaa'n no'o gargar hissa dande'aak ayye ayyike? Rakko yookaan wixxiyya yookaan shorsha yookaan solo'i yookaan daar yookaan sodachisaxxi yaane yookaan wolaantchake? 36 Tinninna «Atixxe barra barra'ninni renne gantenne; dullamaake gedhebisha kandenne laakko'emenne» hiyyende borreesendemashshaten. 37 No'o'o mittilchinna gargar hissachi hedheba'a; no'oo eeyeke Kirstoosinni konnechuwwa duuchcha injifachot injifatemakernaa'n sa'nanon. 38 Reyoteena kaddo hedho, ergana kaddo duriisa* 39 xungot kaddo dhi'mo yookaan hiini dadana Gootti no'ok Yessuusi Kiristoosi darre'n alfinenexxe Mageniinxe eeyuntenaa'n mittichinna no'oo gargar hissachi hedhebaaxxa wo'meenen.