1 No'o amanat jabake kande'enek ifigopheeke mannixxa gonphe ba'edha no'o'o hassissa malee ifi gammachinsanoke kada hasisaba'a. 2 Mitti mitti no'ong mitti manji amanate'n jaaremo'a iso gammachisaxxanna isi'a la'o utaaxxa yaanne assa no'o'a hassissaan. 3 Kiristoosinna umo ifika gammachise'emabaan. Yaane kinni, «Ate'e yowwineemak yowichchi ane'n geyeen» hiyyendeexxi borreesendemashanni iso'n kadde. 4 Woyyichchi maxaafi uwwaaxxe oossunteninna dayefachonni adde anfannona'a edo borresendemaxxi duuchchi no'o barsisate borresende'enen. 5 Oosumatanna dayyefachcho uwwaak Magen Kiristoosi Yessusii'i hordofina wodda oddo ha'noxe'n mittumati hexxinaaka mitte yaada ha'no'a uwwo'a. 6 Tinninna mitte qalbenna afo'o mitte kaddine'e no'oka Gootta Yessuusi Kiristoosika Annanna Mageno ulfeesitino'aten.

7 Yoona Magenokee galati kado'a Kiristoosi ha'no adhdhemashsha ha'nonna wel wel adhdhe. 8 Tinninna kaddeechchi annuwwakee uwwemeeke addetika hiyyicho kokeeso'a Magenxe dhuga'a hiyyeexxi Kiristoosi Ayihudieke erganjo kadeexxa ha'no'n kulona'aten. 9 Iittanni Ayihudake kadebaak manni Mageno mararte isixxe galateefato'aten.

Tinninna, «Isira'elke arda kadebake mannixxe giddo ate'e galateefantannon,

summa atikanna faarsanno» hiyyende borresendemashaten.

10 Ittanni,

«Ha'no Isira'elke arda kaddinebaak manni,

Magenike ardinni welti gammadde» hiyyende'e borresende'en.

11 Higgeen

«Ha'no Isra'elke arda kaddinebaak manni duuchchi Mageno galateefatte;

Arduwwi duuchchinna iso'o galateefattee» hiyyendee'e borresende'en.

12 Ittanni Issayaasinna

«Gosa gosake arduwwa duuchcha'n mowaak

Isseyik Hiddi dagaan;

Ayihudake kadebbak ardinna iso'n addataan» hiyye'een.

13 Iso'n amandinemashanni addetik Magen gamashotanna na'ge'a womaqicinni ha'no'a uwwo'waal; tinninna Woyyichchi Hafuurxe hunnanni adde birsa'e ha'no wo'mito'aten.

14 Anke dayyuwwa ha'no umo ha'nonge'n elle wo'miteexxa, ege'na duuchinni wo'mitexxanna mitti wele gorsatixxa dande'a affineeke kaddineexxa ani umo anginenenni koke'enen. 15 Magen ani'a uwweeke badhaadhiqicnni higgeenna ha'no'n qallasona'a mitti mitti yaada'n afo'o ho'me ha'no'a borreesenne. 16 Kunni badhaadhinna ani'a uwwemeechi Magenxa wengele Ayihudake kadebaake manna'n lalabate Yessuusi Kiristoosi'i qeesumat ergatemona'aten; tinninna Ayhudake kadebaak manna Hafuur Woyyichchiki woyyomeexxi Magenedo edo gamachhisake tolcha kade'e shiqo'aten.

17 Tennexxe Mageno ergatama dande'nexxe Yessuusi Kiristoosi'n ifisaadaanen. 18 Tinni kaddeechinna Kiristoosi anke haaso'ininna assenexxe yaane darre'n Ayiudake kadebaak manni Magenoke ajajemaashsha, Kirstoos ane'n hedheexxe asseexxe yaane gadhidarre wele yaane afo'i wo'me haaso'abe'noxxeten. 19 Tinninna kaddeek woyyichchi Hafuurixxe hunnanni, beesisuwwikinna manbe'uwwikiteman. Konneqicnni Iyyerusaaleminaa'n Iliwariqoon qico'n Kiristoosixxa wengeele wo'miqicinn lalabe'enen. 20 Weli manji jaarexxe booso hana jaarbe'nosha hiyyati Kiristoosik summa laqisemebaake booncho wongel lalaba, anxe duuchchi woddixxe halchaman.

21 Tinninna

«Isixxee'e kulendebaak manni afaan

Isexxee'e laqebaakinna qalbeefataan» hiyyendee borresendemashaten.

22 Ta'iqico'n ha'noba'a dagebe'noshsha hoyyemenek tennenaa'n kexxeexxinniten.

23 Ta'a kinn konne loola'n assaanexxi huje hedhegophemaxxe, iittanni heddo wogga'anna ha'no uudona'a halcha'anaxxe, 24 konne yaada Isipeeni'a me'annoxxa yaana muuxanoxxa heda'nen; sa'ano woddanna ha'no uude ha'non welti heenoxxa yanna turenexxi halcha anxa bidhenechi uduma anxe me'a'a kadaaka gargaarsa ani'a assitinaaxxa addatano. 25 Ta'a kinni ookko hexxeexxa qulliyye ergatematee Iyyerusaalemi'a me'ate'n hedhenen. 26 Tinninna kaddeechchi Meqedooniyanna Akkaayiyaa Iyyerusaalemi giddo hexxeexxaa qulliyye garggaro ke'nemaxxeten. 27 Konne gargarsanna eeyuma ifixxenni uunechi insa'ne assa hasisaaxxe gattabaaxxe yaane kaddeexxetene. Tinninna Yihudootake kadebak manni Yihudotinxa hafuurn darrexxa eeba insa'ne welt qoodemeechinni insa'nenna ifixxe maaldarrexxe eebanni Ayihudoota gargara hasissaxxenna gattabaaxxe kaddemaxxeten. 28 Tennexxe konne bukkaseemeka gargarsinka maalaqa Iyerusalemi iyyemare uwwatixxa huje muuxenlchi uduma ha'no ga'miin Isipeeni'a sa'anon. 29 Ha'nobanna daganno wodda Kiristoosixxe wo'ma eebbanni daganoxxa ege'ne'ene.

30 Anke dayyuwwa ani'a Mageniba'a soodatina'n aninna welt cicitinaasha Gootta Yessuusi Kiristoosixxenninna Woyyichchi Hafuurixxe eeyumanni ha'no'o kadhataanen. 31 Ani'a kadhatinalchinna Yihudake boga'n hedheeke Mageno amanebaake mannixxe anganaa'n gatannoshanna Iyyerusaalemi giddo ergatemanoxxi ergatensha qulliyye gammachisaxxe kaddashsha soodate. 32 Tinninna Mageniike fedhi kaddoole gammashoti ha'noba dagenexxi ha'nonni welti hafuura adhono'aten. 33 Nage'ink Mageni ha'no duuchchingeninni welti hedhowaal. Ameen.