1 Yoonata Ayihudichchi Ayihudake kadebaakemaa'n mayik sa'a? Yookaan jila ofo'latixi la'o maachchota? 2 Duuchchiinge orinni la'o heddoten! Duuchchiinxenaa'n taakkaxxi Mageni hiyyichcho ifika Ayihudake'n maganne uwwaten.

3 Ayihudikenaa'n mitti mitti amana gophoole, insa'nexxi amana gopha Mageniinxa xurameessumma gattissaataa? 4 Haranga gattissaba'a! «Haaso'a atikenaa'n kexxeexxa dhugaalessumma atixxi kokeesendaan; murteti edonna injifatalloke kaddaton» hiyyendee borreesendemaxxee manji duuchchi dharichchake, Magen kinni xurameesake kaduun. 5 Yaane kinni no'oxxi cubbo Mageniinxa qullumma leellishshaaxxe kaddeexxenni yoonata maa hiyya dandeennanno? Manjiinxe moromashsha Magen ifixxa mufe no'o'n iyyedaga dhugaat murebaan hiyyateetaa? Tennee hiyya anxi manjiinke yaadishsha hiyyeeten. 6 Haranga iitta kaddaba'a; iittate kadde'eele Magen buttate'n hitta mura dande'a? 7 «Yaane kinn anxi dharichchumma Mageniinxa dhugaalessumma hara lumissaaxxe, isika gaachchannanna lebbaaxxe kaddoole cubbaalesake hiyyemennexxi ta'a qico mayee ane'n murendaa?» hiyyat moromaak manji hedhaaxxe hexxeen. 8 Tinniqaa, «Eloxxi kaddaashsha elobaaxxa assino» hina'neen hiyyati mitti miiti manni no'oxxee odeessemmashshaten. Tennexxee konne manna'n murendaaxxi murte dhugaatixxen.

9 Yoona maa hinanno? No'o insa'naa'n sa'nannota? Haranga waawwo'o! Manji duuchchi Ayihudake kadi Ayihudake kadebaak, duuchchiing cubbot hunda hedheexxa edinseenni kokeesinneennen.

10 Hiyyendeexxi borreesendeemma qici, «Mittikinna qullichchi hedheba'a; mitti manjinna midde hedheba'a;

11 qalbeefataak mitti hedheba'a;

Magenonna halsaak mittikinna hedheba'a.

12 Duuchchiing dhugatike orinaa'n fule'een;

mittemba wayi fullabaake kande'een;

Eloxxa huje hujaa'neek hedheba'a

mittikinna midde.»

13 «Manjo miidhaaka haaso'a haaso'atee'e afo'i insa'nek moogiinxe baleshsha haanni hiyyeeken;

arabo ifikenn manjo gurgurra»

«Suume insa'nexxe'n buutetixxe ha'la hexxe.»

14 «Insa'neke afo'o'n badinotinna fuggoxxi wo'mite'een.»

15 «Lekka insa'nexxi munde dunatee wiinandaaxxen;

16 Insa'neke ora'ninna ba'netinna abara hexxeen.

17 Nage'iinka ora egenneba'a.»

18 «Insa'nexxe ille'n Mageno soda'a hexxeba'a.»

19 Yoonna afo'i duuchchi buqemo'aanna butta duuchcha Mageniinxe murte hunda hexxo'a, seeri haaso'aaxxi duuchchi ookkone seerii hunda hedheekeeri'aate kadeexxa egenneennen. 20 Tennexxee ayyinna Muuseka seera heqqedhat Magenii edo qullichchake hiyyeema dande'aba'a; seeri assaachchi manji duuchchi cubbichchake kadeexxa ege'nishateeten.

21 Ta'a kinni Muusek seerinna wabeeko isexxee dhugaa kuldeexxi Muuseke seeri gadhi darre kadde'eexxi Mageniinxi qulluma leellite'een. 22 Tinni Mageniinxu qullumma Yessuusi Kiristoosi'ni amanat afendaaxxe qulluman; gargarumma hexxeba'a; 23 tinninna kaddeechchi duuchchiing cubbo huje'een; Mageniink ulfinninna insa'nenaa'n xe'ye'een. 24 Tennexxee manji Yessuusi Kiristoosi darree'n kaddeexxe wodonni tolanga Mageniinke badhaadhanni qulloome'een. 25 Mageni Yessuusi Kiristoosii'i tolchake asseexxi shiqiseek iso'n amanaak duuchchi isixxe mundenni ifixxe cubboxxa gattowwaal alfo'aaten; Mageni tennee asseechchi edo hujendeemmaxxa cubbo mura woxisebaang osseexxi sa'at ifixxa qullumma leellisho'aaten. 26 Ta'ike barro'n Mageni tennee asseechchi qullima ifixxa tinninna isi umo ifikenni qullichchake kadeexxi Yessuusi'n amanaakaara qulloonsaake kadeexxa leellisho'aaten. 27 Yoona ifi duka haba hexxe? Ise gatte'een; hoone seerini? Hujetike sseriniteetaa? Waawwo'o, amanatike seerinite malee. 28 Tennexxee Mageni manjo qulloonsaak manji seera asseexxeete kaddebaak amanatite kaddeexxa kokeesinaannen. 29 Yookaan Mageni Ayihudiinke Mageno callataa? Is Ayihudake kadebaake manni'aanna Magenongebaataa? Eet is Ayihudake kadebaake mannike Magenon. 30 Jila ofo'leeka amanat jila ofo'lebaakanna eettene amananninni qulloonsaak mitti Mageno callan. 31 Iittate kaddooleta amanatixxe buutonni seera wayi fulabaake kadaashsha assinnaannuutaa? Haranga waawwo'o; seera jabeesinaanne malee'e.