1 Tennexxee weleke'n murta'etek ati gattowaal affebexxon; weleke'n murtatto wodda ati umo atinge'n murtaatte hiyyaten; tinninna iikki muretaatek manaji assa'neemanxe yaane atinna assittaattaxxeeten. 2 Tenne assake duuchcha'ninna Mageniinxi murte seeriinxe kaddeexxa egenneennen. 3 Ati iitta assaake manna'n murta'n insa'ne assinammaxxa assittatto wodda ati Mageniinxe murtenaa'ni gattattochcho labbaata? 4 Yookaan Mageniinxa marartenna bira saxxeexxa ossunte isixxa tuffattutuuta? Magen ele ifixxa ati'a bira sa'iseek ati aadde aaggota'aate kaddeexxa egendebexxoota? 5 Yaane kinni ati aadde aaggo gophatinna godoba jabaatati dhugaatixxi Mageniinxi murte kaddaaxxa barra'a ati ifi'n Mageniixa aare tuu'litaaten. 6 Mageni mitte mittengee'e isixxe huje hujeshanni uwwaan. 7 Eloxxe huje'ni jabaatati galatakanna ulfinna iittanni baxxabaaxxa hedho halsaakeeri'a Mageni duuchchii woddixxa hedho uwwaan. 8 Yaane kinni ifixxa calla halsaakeeria'aanna dhugaa gibeexxi fuggoxxa hordofaakeera'n Mageniixi mufenna aare daggaani. 9 Fuggoxxa assaake duuchchiinge'n ediseexxi Ayihudake'n ookkoneechchi uduma Ayihudake kadebaakeera'n rakkonna wixxixxi hiyya kaddaan. 10 Yaane kinni eloxxa assaake duuchchiinge'n ediseexxi Ayihudakee ookkoneechchi uduma Ayihudake kadebaakee galati ulfinnikinna nage'i insa'ne'a kadaan. 11 Tinninna kaddaachchi Mageni manjoke'n ille uushsho assake kada gopheemmaxxeeten.

12 Seera afebaang cubbo hujeek duuchchi seerbelo ba'aan. Seera afeenn hedheexxi cubbo hujeek duuchchi ookkenne seerinninni murte adhdhaan. 13 Tinni kaddeechchi Mageni edo qulliyyete hiyyemaakiir seerakee ajajemeekeera malee seera laqeekeerabaan. 14 Ayihudake kadebaak manni seera afeba'a; yaane kinni seeri ajajaaxxa yaane daduma ifikenn assinamaxxee seera afa gophexxeenna insa'ne umo insanege'ninni seeraken. 15 Sammo insa'nexxi dhugaa insa'ne'n kuldaan; yaadi insa'nekinna insa'nee ku'laan; iittanni insa'nee'a faachefataan; tinninna seer ajajaaxxi yaane duuchchi qalbe insa'nexxe'n borreesendeexxa leellishshaan. 16 Tinninna kaddaak ani wengeeleti birachchiisenneshsha Magen manjinxe qalbe'n sho'ondeexxa yaane Yessuusi Kiristoosi darree'n muraaxxe barra'niten.

17 Ati ta'a «Ani Ayihudichchoken» hitta'etten; Muusseke seera'n irkatta'etten; Mageniinke kaddeetexxeenna hollitta'etten. 18 Ati seerik akeekendetexxi fedhii isixxa egende toggitte yaane foote abixxittootole, 19 ati balla'uwwiinke akeekallo, dukkana giddo hedheekeer'a ifake kaddeettexxa egendootole, 20 konne serinaa'n alfittetexxi ege'nanaa'ninna dhugaanaa'n kexxeexxa ege'nebaakeeri'a gorsalloke annooleteenna barachchiisalloke kaddo'ootole, 21 yoona ati wele barachchiisa'eetek atika umo ifi barachchiisabexxoota? Mortoxxe'e hittetexxi lallabatok ati morta'etekebaataa? 22 Ati manji yaabaabula hassissabaan hittaattek, ati yabaabuldaatekebaata? Ati dharcha mageno diqqattaatek Woyyichcha Galma sanda'etekebataa? 23 Ati Mageniinke seerinni hollita'eetek seera diigati Mageno salphisaatekebaata? 24 Tinninna, «Ha'noo Ayihudiinke mannixxe buuttoxxee Mageniink summi Ayihudake kadebaake manni giddo yowwemaan» hiyyendee borreesendemmashshaten.

25 Jila ofodha ati'a la'o affaachchi seerakee ajajendotoleten. Seera diiggotole kinni atixxi jila ofo'la jila offo'la gophatishsha laakko'endaan. 26 Tennexxee jila ofo'lebaak yaane kinni seeri hiyyaaxxa ajajemeeke kadoole jila ofo'la gopha isixxi isi'a jila ofo'le'eeshsha laakko'endabaata? 27 Ati borreesemeeka seera affeenni hexxe'e jila ofoldeetenge kadde'e seera diiggotole yaane kinni jila ofo'lebaang seera ajajemaak ate'n muraan. 28 Tennexxee summi callinni Ayihudichchoke kadeek dhugaatike Ayihudichchoba'a; iittanni gadhi darrexxa maaliinke bisixxa jila ofo'la dhugaatixxe jila ofo'laba'a. 29 Dhugaatik Ayihudichchii giddixxe ifixxe hedhonn Ayihudichchoke kade'eeken; dhugaatixxa jila ofo'laa Mageniinke Hafuurinni kaddaaxxe qalbetixxa jila ofo'la malee'e Muuseke seera'n borreesendema qicinni maaliinke bisixxe jila ofo'laba'a. Iitta hedheeke manji galata alfaak Magenokenaa'nite malee'e manjokena'nitebaan.