1 Yoona higeenna laqoo! Mageni arda ifika wale'eeta? Harnga waawwo'o, ani umo angeninni Isira'eelichcho Biiniyaamike gosati minike Abirihaamixxe horten.

2 Magen edise fi'lemaka arda waale'eba'a. Eelyaasi Isira'eelika arda Magenoke'n ku'lemaxxa Woyyichchi maxaafi isixxee maa hiyyeexxa ege'nagophitnaata? 3 Goottaa, wabeeko atixxa shine'een; tolchimalchuwwa atikaranna diinge'een; ani calli qofigatenen; aneneenna shino'a hansa'neen. 4 Yaane kinni Mage maata hiyye iso'n hisse haaso'e? «Ba'aal sagadebaka torbaane kuma manna ani ifi'a gatlseenen» hiyye. 5 Ta'ike barro'inna iittanni Magen badhaadha ifike'n fi'leexxi hafe hexxeen. 6 Yoonna badhaadhikete kaddoole hujetiteba'a. Hujetite kadde'ya badhaadhi badhaadhake kadda silat gate'eman. 7 Yoona maachota? Isira'eeli jaba qicinni halsiteecho alfiteba'a; fi'leemake manni kinni alfe; wel mannixxi qalbenna dillootte.

8 Tinninna konechi butti'a hiyyende borresendeqic,

«Ille insa'nexxi affabaashsha

mansha insa'nexxinna laqqabaashsha

Magen telchqio'n

Dillo'atika irra insa'ne'n woccasse»

9 Daawwitinna hiyyeqic:

«Qore insa'nexxe'n insa'ne abidaxxe foxoronna ribbo

itti gugufanta guffonna assineexxe fuggoxxeenna insa'neke hira kaddowwal.

10 Ille insa'nexxi affabashanna himmitowwal!

hidhi insa'nekinna duuchchi woddi'a xukkowaal.»

11 Ayihudoot gugufate ibeeke ke'abaqico'niteta? Hiyye higgen qoraane? Harnga waawwo; yaane kinni Isira'eel hinaafasha assatee insa'nexxe balleesaxxe buutonni Ayihudake kadeebake manni'a anjirasha dagge. 12 Yaane kinni balleessa insa'nexxi buttate eeba idaggeechinni insa'nexxi ibanna Ayihudake kadebaake manni'anna eeba idageechinni insa'nexxi womaqicinni i'leema higa hiteqicota birsaxxexxa eebba idaguta!

13 Koo Yihudake kaddinebaake manna ta'a ha'no'n haaso'enen; ani Ayihudake kadebaake mannike ergamallo kadennexxenni ergatensha anxa lumisannon. 14 Tinninna anka manna hinaanfaashsha damasennexxe insa'ne giddii'n heenoka manna anjiranoxxa addateten. 15 Insa'nexxi waalensha buttate'e aarara idageechinni insa'nxi Magenoke'n adhdhensha reyotenaa'n ke'atishaten hiyyati gadhidarre wele maayya dandeesisata? 16 Mitte liixxenaa'n umi Magenoke uwwemeexxi woyyichchke kadoole gattexxi liixxe duuchchi woyyitete; haqichik hiddi woyyichke kadoole isixxi damuwwanna woyitte kadda.

17 Eettene dumuwwaa'n mitte mitte meshqendoole ati gongomiike zayitetike ejesaka kaddene'n hexxe wele dumuwaxxe oddo'n eyyit itti dhaphphi laetexxi ookkone zayitetike ejrsike hiddinaa'n daggaxxa la'o alfitetchinni, 18 tenne damuwwa'n hoolitoxe; hollitotole kinni heddiyyo hassixxi yaane ati hidda ba'itebexxo hiiddake ate'e ba'edhe malee. 19 Yoona at «Iitti damuwwa mesheqendechchi ani eetne isexxe bakka'n e'yona'aaten» hitatoxe hexxeen. 20 Iitta ati hiyya dhugaaten; yaane kinni insa'ne mesheqemeechi amanagophatenaa'niten. Ati amanatenaa'n kexxeexxa uurte'eten. Sodaati malee ifisaadoxxe. 21 Mage'n eetene dadumiinxe damuwwa kademakeeri'a maramra gophpheechinni ha'no'anna mararbaan.

22 Yoona Mageniixxa mararanna isixxa godoba jaabbat hubati; jabeene isik ibekkeraniten; marrte isixxi kinni isixxe mararte giddo hexxetqico'n ati'aten; iittate kaddagophoole kinni atinaa kutendaton. 23 Insa'nenna amamangopha ifixxa waaleexxi ileema hingoole Mageniginna insa'ne edike inseke booncho'n hissa dade'aan. 24 Gongomike kade'eeke zaitetike egrsinke haqichinaa'n kardetexxi atike dadumike kadebaake ookkone eloke ejersa'n haqico'n ee'yitetechinni daduumik ifixxe damuwwa kade'eekir iikki ifike zayitetike ejersa'n e'yiyota hittata dandesagophata!

25 Anke dayyuwwa no'o egene'eneke hitineexxi ifisaadinoqe, ha'no tenne buuqo yaane egendinebaag gattino'a ani eeyabe'non; Ayihudake kadebaake filemeek manni duucchchi dagaqico Isira'eelike arda'n mitte mitte darre'n dillo'a kadde. 26 Tennexxee Isira'eelik ardi duuchchi enjirema; tinninna hiyyende borresendemashanni:

«Anjiralli Tsiiyooninaa'n dagaan.

Ya'iqoobixxe horte duuchchanaa'n fuggaalessumma fuggusaan.

27 Tinninna ani insa'nexxa cubbo insa'nenaa'n fuggusano wodda

insa'ne'a aaganoxxe kakon.»

28 Wengelt darree'n insa'ne ha'noxxee la'o'a Magenokee naaphake; filensha darre'n kinni insa'ne annuwwa ifikixxe buuton eeyemekera. 29 Magenxi uwwanna isik ye'yinji hansha afeba'a. 30 Ha'nonna edo Magenoke ajajendinamabaak ta'a insa'nexxe ajajemagohanaa'n kexxeexxa gattowwal alfinemaqisha 31 insa'nenna Magen ha'no'a gattowwaal hiyyatenaa'n kexxeexxa gattowaal alfino'a ta'a ajajemabaake kande'een. 32 Tinninna kadde'elchi Mageni duuchchinge gattowaal hiyyo'a manji duuchchi ajajemagopha giddo hedhaasha asse'een.

33 Hayi hoola Magenike beekuma isixxe marartenna isixxe ege'na!

murte isixxa ayyinna qo'nisaba'a

Ora isikinna ayyinna ege'na dande'aba'a

34 «Goottinka yaada ege'neeke aate?

Yookaan is'a mari'e uwwa dande'aak aate?»

35 «Yookaan Magen isi'a hissaashsha

Magenoke edise liqeeseek aate?»

36 Duuchchinxa yaane insibaa'n, isidarre'ninna isi'ate kaddemaxxe

isi'a duuchchchi woddinaa'n duuchhci woddi'a ulfinni isi'a kadowaal! Ameen.