1 Yoona amanat qulloommennexxi Gootta no'oke Yessuusi Kiristoosi darree'n Magenik welti nage'a anfeennen. 2 Isi darree'n ta'a uurrineenneke badhaadhibaa amanat e'ya dandeeneennen; Mageniinka ulfinnanna addantennexxi gammandanno. 3 Tenne calla'nite kaddebaak no'oxxe rakko'ninna gammandannon; tinninna kaddaachchi rakkotenaa'n ossa affendaaxxa egenneennexxeeten. 4 Ossatenaa'n jabeenni, jabeennekenaa'n hega uudemeek adab, hega uudemeek adabinaa'n adde afenda. 5 Magen jaalala ifixxa no'oxxe qalbe'n Woyyichchi Hafuur ga'mii'n wonshemaxxee tinni adde no'oo shookkishshaba'a.

6 Ifi gonphende'n he'ne'naa iitti murendeexxi yanna geltee wodda Kiristoosi cubbaaleyyetee reye. 7 Qullichchi manji'a reyaaka manjo afa lumooshsha rakkissaan; qajeeli manji'a hiyyeexxi reyatee shene'e hiyyaak manji akimagaada afema dande'aan. 8 Yaane kinn no'o cubbaaleyeende kandeenni he'nennaxxe yanna'n Kiristoosi no'oxxee reye; tinnenni Mageni no'aa afeexxa ifixxa jaalala leellishsha.

9 Ta'a munde isixxenni qulloommennexxenni no'o isi darree'n Magenuunxe mufenaa'n hittata caala anjiremagonphannota! 10 No'o Mageniinke naapha kandeenn he'nee'naa Magenik welti isike beltixxe reyonni araarremmennexxenni, araara alfinennechchi uduma isixxe hedhonnita anjirema no'oxxi hittata caala kokeesndeexxe kada gophphata! 11 Tenne callabaan; yaane kinni ta'a araara alfinnenneke Gootta no'oke Yessuusi Kiristoosi darree'n Magenoke'n ifisaandanno.

12 Tennexxee cubbo, mitte manjixxe buutonni tenne butta'n e'yittemmashsha iittanni reyotinna cubboti darree'n e'yiteen; konne qicinni reyo manji duuchchibaa dagge; tinni kaddeechchi duuchching cubbo hujemmaxxeeten. 13 Muusek seeri uwwemebaa edi darre cubbo kaba butta hexxeman; kaddo malee seer hedhammabaa wodda cubbo cubbotishsha laakko'endeba'a. 14 Yaane kinn Addaamixxe yannanaa'n Muuse qico'n Addamishsha seera enqeexxi cubbo hujebaake duuchcha'n midde reyo mootonde. Addaaminna ookkone dagaake kiristoosike fakkeennamman.

15 Yaane kinni Mageniinxi uwwa eettene qaxaamurixxe qixxeshshateba'a. Mitte manjixxe cubboxxee heddi manni reyechchinni, Mageniink badhaadhinna mitte manjinni, kuninna Yessuusi Kiristoosike badhaanni daggeexxi iitti uwwa hittata heddi manni'a caala bira sa'a gophphata! 16 Iittanni, Mageniink badhaadhi mitti manjixxi cubbo iyyedaggaaxxe yaanenni mikemakebaan; tinninna iitti murte mitte manjixxe cubboxxe buuto'a murte uwwende, yaane kinni iitti uwwa heddo balleesaxxe buuto'a qulluma iyyedagge. 17 Mitte manjixxe balleesaxxe buuttonn reye ookken manji darree'n mooteexxe kaddoole Magniinka hara bira asa'eeka badhaadhanna qullummatixxa uwwa adheekiir, ookkone mitte manjo Yessuusi Kiristoosi darree'n hittata caala hedho moya gophphata!

18 Yoona mitte manjixxe balleesanaa'n kexxeexxa murte duuchchingee manjo'n murendeemmashshanni, iittanni mitte qullichchixxe hujenni manjo duuchchi'a hedho uuttaaxxi qulluma afende. 19 Ookkone mitte manjixxe ajajema gophabaa'ni kexxeexxa heddi manni cubbaleeyyete kadeemmashshanni iittanni mitte manjixxe ajajenshanaa'n kexxeexxa heddi manni qullichchake kada. 20 Seeriinxe uwweshshanni qaxaamura bira saxxe. Yaane kinni cubbo bira saxxeexxe qixxe'n badhaadhi caala bira sa'eeke kade. 21 Tinni kaddeechchi cubbo reyoti darree'n mootteemmashshanni iittanni Yessuusi Kiristoosi darree'n duuchchi woddixxe hedho afendo'a badhaadhi qullummat moyo'aten.