1 Huun baalominna afemeek Magnxe fedhinnite kaddemaxxe manji duuchching baalomike manni'a ajajema hississaan; ta'a hedheeka baalomik mannanna baalonseek Magenoken. 2 Tennexxe mottumma gareeraak duuchchi Magenxa aada gareeraan; iitta assak manninna murte ifi'n idaqqan. 3 Galchalluwwi fuggoxxa assakri'ate malee eloxxa assakeri'a soddaachisake kadaba'a. Baalomake'n hedheeka manna sodaatagophota'a eeta'etteta? Yoonna eloxxa assi isinna atee galatefataan. 4 Tinni kaddeechinna isi ati'a eloxxa assatee baalomeeke Mageniike erganjo kademaxxeten; yaane kinni fuggoxxa assittotole sodaat; tinni kaddaachi baalomeke manji wolaaticho ka'leechi iittan toolangeetebaan; fuggoxxa assakara'n mura woxxisatee mufetike mi'a kade'eeke Magenike erganjo. 5 Tennexxe muratixxe soda'a calla kaddebaak sammo ha'noxxi eloyoxxa gargar hisite ha'no kuldaamaxxe baalomike manni'a ajajema hassissaxxenn. 6 Irbotanna uutina'neek tennexxeenden; kunni baalomiik manni wo'ma yanna tenne huje huja'neechi Mageno ergatemateeten. 7 Tennexxe baaloomike manji'a assemiyyo hassissaaxxa duuchcha asse; irbo hasisaake'e irbo, qaraxa hasisaake'e qaraxxa, sodatemiyo hasisaake'e soda'a, ulfinni hasisaakee'e ulfinna uwwe.

8 Weli'aan weli eeyyat gadhidarre ayyik liqinna ha'no'n hedhoqe'e; wele manjo eeyaak isi seera muuxeekenn. 9 «Yabaabuldoxxe, shiltoxxee'e, moortoxxee'e, gaabitoxxee'e» hiyyaak ajajinna weli ajaji duuchchi, «Wele manjo umi ifikishsha eeyyi!» hiyyaake konne mitti ajaji giddo bukkassemeen. 10 Wele manjo eeyak duuchchi ookone eeyaake manjo'n elobaaxxa yaane assabaan; tennexxe manjo eeyak duuchchi seera duuchcha muuxedhen hiyyoten.

11 Diiphokenaa'n dammaqinaaxxi yanna gelteexxa tenne ege'ne; anjirensha no'oxxi edo amnanenexxe barra irra caala ta'a no'oba'a shiqeen. 12 Hashsha saxxo'aten barratinna shiqqe'een. Tennexxe dukanatixxa huje waaledinexxi ifinka lolii miya ka'lino. 13 Barra mamaremanesha eloqicinni mamaremo; olkatinna ma'cho'at kaddoqqe'e; yabaabulatinna qilmisat kaddoqe'e; welgonpetinna gaabeti kaddoqqe'e. 14 Tenne irra Gotta Yessuusi Kiristoosi oddo'we malee'e halcha ifixxa muuxashsha maalinke yaadi'a ifi uutinoqe'e.