1 Hanoxxe oddo'n amanat goofi manji mornsisaaxxe yaane'a afeeke yaadda'n murtinebaang adhdhe. 2 Mitti manji afeenxa yaane itatee'e eeti uwwendeesha amanak hedhe; amaat jabaatebaake wele manji kinni hiddichcho calla ita. 3 Tennexxe duuchinxa yaane itaak manjichchi itaamabaaka tufatoqqe'e; itabaakinna itamake'n muroqqe'e; tinni kaddaachi Mageni iso'o gibe'eeke manjo kadgophemaxeten. 4 Ati wele manjike erganjo'ni murtek isi ati aate? Isi iboole yookaan uuroole ifike ookkone gootti'aten; yaane kinni Magen iso'o uursa dande'amaxxe isi uuraan.

5 Mitti manji mitte barra mittetenaa'n caala eloxxe kadeesha heddaan; wel kinni duuchinxi barra mittette kadeexxa hedhaan; mitti mitting manji ifika yaada kokowaal. 6 Mitte barra wele barranaa'n sa'ise ulfeesak hedheexxe kaddoole isi tenne assa'neeke Goottakeeyeten; heene itanna itaak Goottinke ulfinni'a hiyye itaan; eetene itaaxxe ita'anna Mageno galateefataan; itabaakinna Goottakeeye hiyye itaba'a; itagophateenna Mageno galateefata. 7 No'onaa'ni ayyinna ifi hedhaakinna ifi reyaak hedheba'a. 8 He'nonolenna Goottake'e he'nanon, rennonolenna Goottake'e rennanon, tennexxee he'nonolenna rennonole no'o Goottinken.

9 Tenne yaanexxee buuto'a Kiristoosi hedheeke mannikenna reyeeke mannike Gootta kado'a reyedheen, hedhokenna kadeedheen. 10 Meeteta ati dayyo atike'n murtaatee? Yookaan mayeetta dayyo atika tufataatte? No'o duuchching Magenxe murtetixxe mootte edo shinqano.

11 Tinninna,

« ‹Ani hedhanoke kadenaxxe›

‹Manji duuchchi ani edo gulubo ifikenni gulufataan,

arabo ifikinna ani Magenoke kadenexxa kulaan› hiyya'neen Gootti» hiyyende borresendemashaten.

12 Tennexxe no'o'o mitti mitti umi no'okixxe huje'a Mageni edo shinqenexxi hisicho is'a uunanon.

13 Tennexxe weli'an weli mitti mitteke'n mura waallo. Tenne irra ayyinna ifike dayyike ora'n gufachiseexxa yookaan takaldaxxa yaane uggurabaashsha mudhowaal. 14 Gootta Yessuusinni hedhe'nexxi umo ifikenn mitte battoteexxi ita hexxebaaxxa ege'ne'enen; yaane kinni mitti manji mittie yaane'e battottesha asse uudeexxe kaddoole itti yaane isi'a battotteexxen. 15 Itatenaa'n kexxeexxa amaagne atika dayyo yaadisaatole eeyate'n hexxetekeba'a. Kiristoosi isi'a reyeeka atika dayyo itatenaa'n kexxeexxa ba'aasha assitoxxee! 16 Iittanni ati elochonni hite heddaatechi fuggochcho hiyyemeexxi uudemaashsha assitoxxe. 17 Magenxi moottumma Woyyichchi Hafuuri afendaxxa qullumma nege'anna gamasho malee'e itatixenna ha'wiinxe yaaneba'a. 18 Konne orni Kiristoosi'a ergatemak manji Mageno gammachiisan; manjoke'ninna galateefatemeeken.

19 Tennexxe nage'i afemo'anna weli jaarona'a dandenenexxa duuchcha assino. 20 Itatixxe buuto'a Magenxa huje diiggoxxe'e; duuchchinxi ita ca'iteten; yaane kinni wele manjo gugufachissaxxa ita itiyyo dhedhake. 21 Atika amaagene dayyo gugufachiisa gophatee maala ita gopha yookaan woyinetixxa booka ha'wagopha yookaan heene gugufachisaaxxa yaanenna assagopha eloxxe.

22 Yoona tenne yaanuwwaxxe afe'etexxi amana Magen edo ati'anni kaddowaal. Kokeesexxe yaane ifi'n murabaak maji isi eebisemeek. 23 I'nata'n itaak manji kinni amanatite kadgophemaxxe iso'n murendaan; amanati assendebaaxxi yaane duuchcha cubbote.