1 ጎዳይ ግብፀ ቢታን ሙሰነ አሮና ሀይሳዳ ያግስ፤ 2 "ሀ አጌናይ ህንተዉ ላይስ ኮይሮ አጌና ግዶ። 3 እስራኤለ አሳ ኡባስ ሀ ዎጋ ኦድተ። ሀ አጌናይ ገልዳ ታማን ጋላሳን፥ እስ አስ ባ ሶ አሳስ እስ ማራዘ ዎይኮ እስ ኮለ ኤኮ። 4 ሄ ኬ አሳ ታይቦይ ሄ መህያ ዉርስድ ማናዉ ዳንዳኦና እፅኮ፥ እያራነ እያ ማታ ሾሩዋራ ባንታ ሶ አሳ ታይቡዋ መላነ እስ እስ አስ ምድ ዉርሳናዉ ዳንዳእያ ኬና ኤክድ ሄ መህያ ሹክድ እስፈ ሞና። 5 ህንተ ዶርያ መሄይ ዶርሰ ዎይኮ ዴሸ ግዳናዉ ዳንዳኤስ፥ ሽን እስ ላይ ኩምዳይሳነ እያ ቦላ ቦረይ ባይና አደ ግዶ። 6 ሀ አጌናስ ታማነ ኦይዳን ጋላስ ጋካናዉ ኤንታ ሄምተ። ሄ ጋላስ ኦማርስ ላድያ ዎደ እስራኤለ አሳ ማባራ ኡባይ ኤንታ ሹካናዉ በሴስ። 7 አሳይ ሄ ሱፈ ኤክድ ኤንቲ ምያ ኬ ዉላ ጋርሳ፥ ቆሙዋነ ቦኮሉዋ ትዮ። 8 አሹዋ ሄ ጋላስ ቃማ ታማን ጫጭድ ጫምያ ቦንጮራነ ኡይራ ሚተ። 9 አሹዋ ቃየ ዎይኮ ካድ ሞፕተ። ሁጵያ፥ ገዳታነ ኡሎ አሾታ ኡባ ጫጭድ ሚተ። 10 ሄ አሹዋፐ ዎንታና ጋካናዉ አይኮካ አሾፍተ። ዎንታና ጋካናዉ አትኮ ሄሳ ፁግተ። 11 ኦገስ ጊግያ ማኦ ማእድ፥ ህንተ ጫማ አድ፥ ህንተ ፃምኣ ኦይክድ ኤሶን ሚተ። ሄስ ታና ጎዳ ቦንችያ ፓስካ ባኣለ ህንተዉ ግዶ።

12 "ታኒ ሄ ቃማ ግብፀራ ካንዳ ባይራ የለትዳ ኡባ፥ አሳነ መህያ ዎና። ግብፀ ኤቃታ ኡባ ፕርዳና፤ ታኒ ጎዳ። 13 ሄ ሱይ ህንተ ደእያ ኬ ኤርስያ ማላ ግዳና። ታኒ ግብፀታ ፕርድያ ዎደ ሄ ሱ በአዳ ህንተና ቆሆና አጋ አና።

14 "ሀ ጋላሳይ ታኒ ጎዳይ ህንተዉ ኦዳይሳ ላይን ላይን ቆፍስያ ጎዳ ቦንችያ ባኣለ ግዶ" ያግስ።

15 "ላፑን ጋላስ ጋካናዉ እርሾይ ገሎና ኡይ ሚተ። ኮይሮ ጋላስ እርሾ ህንተ ሶፐ ድግተ። ሄ ላፑን ጋላሳታን እርሾይ ደእያ ኡይ ምያ አስ እስራኤለ አሳ ግዶፈ ዱፅድ ኩረቶ። 16 ኮይሮ ጋላሳንነ ላፑን ጋላሳን ጎይናናዉ ሺቅተ። ሄ ጋላሳታን አይብ ኦሶካ ኦፍተ፥ ሽን ካ ካናዉ ዳንዳኤታ።

17 "ታኒ እስራኤለ ደርያ ግብፀፈ ከስዳይ ሄ ጋላስ ግድያ ግሾ ሀ ኡይ ባልያ ላይን ላይን ቦንችተ። ሄስ ህንተዉ መርና ዎጋ ግዶ። 18 ኮይሮ አጌናን፥ ታማነ ኦይዳን ጋላስ ኦማርሳፈ ዶምድ፥ ላታማነ እስን ጋላስ ኦማርስ ጋካናዉ እርሾይ ገልቦና ኡይ ሚተ። 19 ላፑን ጋላስ ጋካናዉ እርሾይ ህንተ ሶን በንቶፎ። እርሾይ ገልዳባ ምያ ቢታ አዉ ናአ ግድን ዎይኮ አሳ ጋደ አስ ግድን፥ ሄ ኬ አዋይ እስራኤለ ማባራ ግዶፈ ኩረቶ። 20 እርሾይ ገልዳባ አይኮካ ሞፕተ። ህንተ ደእያሶን አዉንካ እርሾይ ገልቦና ኡይ ሚተፐ አትሽን፥ እርሾይ ገልዳ ኡይ ሞፕተ" ያግስ።

21 ሙሰይ እስራኤለ ጭማታ ኡባ ፄግስድ ሀይሳዳ ያግስ፤ "ህንተ እሶይ እሶይ ሶ ብድ ፓስካ ባኣለ ቦንቻናዉ ማራዘ ዎይኮ ኮለ ሹክተ። 22 ህሶጰ ም ሀይፈ ዳንክ ኤክድ፥ ከረን ደእያ ሱን የድ ኤክድ ዉላ ጋርሳ፥ ቆሙዋነ ቦኮሉዋ ትይተ። ዎንታና ጋካናዉ ህንተፈ እሶይካ ባ ኬፈ ካረ ከዮፖ። 23 ጎዳይ ግብፀ ባይራታ ዎናዉ ሄ ቢታራ ካንያ ዎደ፥ ሄ ሱ ዉላ ጋርሳ፥ ቆሙዋንነ ቦኮሉዋ ቦላ በእድ አግድ አና። ሀይቆ ኤህያ ኪታንቾይ ህንተ ሶ ገልድ ህንተና ዎና መላ ድጋና። ህሶጰ ጌተትያ ም

24 "ህንተነ ህንተ ናይት ሀ ኪታ መርናዉ ናግተ። 25 ጎዳይ ካሰ እማና ግድ ቃላ ገልዳ ቢታ ህንተ ገልያ ዎደ ሀ ዎጋ ኦተ። 26 ህንተ ናይት ህንተና፥ ‘ሀ ባልያ ኑ አይስ ቦንችዉ?’ ግድ ኦይችያ ዎደ፥ 27 ህንተ ኤንታኮ፥ ‘ሀይስ ጎዳ ቦንችያ ፓስካ ያርሾ። ሄስካ ጎዳይ ግብፀ ቢታን እስራኤለ አሳ ኬ አግድ፥ አድ፥ ግብፀ ባይራታ ዎድ፥ ኑና አሽዳ ግሾሳ’ ያግተ" ያግስ።

ሄሳፈ ጉየ፥ እስራኤለት ጉልባትድ ጎይንዶሶና። 28 እስራኤለት፥ ጎዳይ ሙሰነ አሮና ኪትዳይሳዳ ኦዶሶና።

29 ግድ ብላሄ ጎዳይ ግብፀን ባይራ የለትዳ ኡባ፥ ካዉዋ አራታ ላታናዉ ደእያ ባይራ ናኣፐ ዶምድ፥ ቃሾ ኬን ደእያ አሳታ ባይራ ናይታ ጋካናዉነ ባይራ የለትዳ መሄ ኡባይ ሀይቅዶሶና። 30 ካዎይ፥ እያ ሞርናትነ ግብፀ ቢታ አሳ ኡባይ ቃማ ደንድዶሶና። ግብፀ ቢታን አስ ሀይቅቦና እስ ኬካ ባይና ግሾ፥ አሳይ ባንታ ቃላ ቁ ኦድ ግታ ዬሆ ዬክዶሶና። 31 ሄ ቃማ ካዎይ ሙሰነ አሮና ፄግስድ፥ "ህንተነ ህንተ እስራኤለት ታ ቢታፈ ከይድ ቢተ። ህንተ ታና ኦይችዳይሳዳ ብድ ህንተ ጎዳ ጎይንተ። 32 ህንተ ግዳይሳ መላ ህንተ ዶርሳነ መህያ ዉድያ ኤክድ ቢተ። ቃስ ህንተ ፆሳይ ታና አንጃና መላ ዎስተ" ያግስ።

33 ግብፀ አሳይ፥ "እስራኤለት ባንታ ቢታፈ ኤለስድ ከያና መላ ድርግስዶሶና። ህንተ ከዮና እፅኮ ኑ ኡባይ ዉሮስ" ያግዶሶና። 34 ሄሳ ግሾ፥ እስራኤለ አሳይ እርሾይ ገልቦና ሙናቃ ከረን ኩንድ፥ ባንታ ማኡዋን ካምድ፥ ባንታ ሀሸን ቶክዶሶና። 35 እስራኤለት ሙሰይ ኤንታ ኪትዳይሳዳ ግብፀታ፥ ብራ አሌቆ፥ ዎርቃ አሌቆነ ማኦ እማና መላ ኦይችዶሶና። 36 ጎዳይ፥ እስራኤለት ግብፀታ ስንን ሳበታናዳ ኦን፥ ግብፀት ኤንቲ ኦይችዳባ ኡባ እምዶሶና። ሄሳዳ ያትድ ኤንቲ ግብፀታ ሻሉዋ ቦንቅ ኤክድ ብዶሶና።

37 እስራኤለት ራምሰ ካታማፐ ደንድድ ሱኮታ ጌተትያ በሲ ቶሆን ብዶሶና። አሳ ታይቦይ ናይታነ ማጫሳ ጉጆና ኡሱፑን ፄቱ ሙኩላ። 38 ቃስ ኤንታራ ሀራ ዳሮ ዋላካ አሳይ፥ መሄይነ ዶርሳ ዴሻ ዉደይ ላገትድ ብስ። 39 ግብፀፈ ኤንቲ ድርጎን ከይዳ ግሾ ካ ካናዉ ዎደ ይዶሶና። ኤንቲ ከይሸ ኤክ ከይዳ እርሾይ ገልቦና ሙኑቃፐ ኤክድ ኡይ ኡክዶሶና።

40 እስራኤለት ግብፀ ቢታን ደእዳ ላይይ ኦይዱ ፄታነ ሀስታማ። 41 ኦይዱ ፄታነ ሀስታሙ ላይይ ዉርያ ሄ ዉርሰ ጋላስ ጎዳ አሳ ኡባይ ግብፀ ቢታፈ ከይዶሶና። 42 ጎዳይ ባ አሳ ናግድ፥ ግብፀፈ ከስዳ ዎደ ሳእ ቃማ። ሄ ቃማይ የለተፈ የለተ ጋካናዉ እስራኤለ አሳይ ባርክድ ናግሸ አቅያ፥ ጎዳስ ዱማትዳ ቃማ።

43 ጎዳይ ሙሰነ አሮና፥ "ፓስካ ጋላሳ ቦንችያ ዎጋይ ሀይሳ ያግስ፤ አሳ ጋደ አስ ፓስካ ካፈ ሞፖ። 44 ህንተ ህንተ ሚሸን ሻምዳ አይለይ ቃፃረትዳፐ ጉየ ሞ። 45 ሽን ህንተራ ጋምእያ እማነ ኡነ ኦያ አስ እያፐ ሞፖ።

46 "ሄ ፓስካ ካይ ካፅዳ ኬን ያን ሚተ። ሄ አሹዋፐ አይኮካ ካረ ከሶፍተ። መቀታፐ እሱዋካ መንፍተ። 47 እስራኤለ ማባራ ኡባይ ፓስካ ባኣለ ቦንቻናዉ ኮሼስ።

48 "አሳ ጋደ አስ ግድድ ህንተ ግዶን ደእያ አስ ጎዳ ፓስካ ባኣለ ቦንቻናዉ ኮይኮ፥ እያራነ እያ ሶን ደእያ አደ ኡባይ ቃፃረቶ። ሄሳፈ ጉየ፥ እ ቢታ አዉ ናአዳ ታይበትድ ፓስካ ባኣለ ቦንቻናዉ ዳንዳኤስ። ሽን ቃፃረትቦና አስ እያፐ ሞፖ። 49 ሀ ዎጋይ ቢታ አዉ ናይታስነ ሀራ ቢታ አስ ግድድ ህንተ ግዶን ደእያ አሳስ እስኖ" ያግስ።

50 እስራኤለ ኡባይ፥ ጎዳይ ሙሰነ አሮና ኪትዳይሳዳ ኦዶሶና። 51 ሄ ጋላስ ጎዳይ እስራኤለታ ጩጋን ጩጋን ግብፀ ቢታፈ ከስስ።