1 ጭንጫተ ፄጋዉሱ፤ ስእተ፤

አኬክ ባ ቃላ ቁ ኦዳ ስሳዉሱ።

2 ኦገ ዶናን ደእያ ዙማታ ቦላነ

ዳጋላ ኦግያን እያ ኤቃዉሱ።

3 ድርሳ ፐንገ ማታን፥ ካታማ ገልያ ፐንገን ኤቃዳ፥

ባ ቃላ ቁ ኦዳ ሀይሳዳ ያጋዉሱ።

4 አሳዉ፥ ታ ህንተና ፄጋይስ፤

አሳ ኮቸ ኡባ ፄጋይስ።

5 ህንተኖ ኤራተህ ባይናይሳቶ ኤራተ ታማርተ፤

ህንተኖ ኤያቶ፥ አኬካ ደምተ።

6 ታኒ ሎኦባ ኦድያ ግሾ ስእተ፤

ታ ዶናፐ ሱረባይ ከዬስ።

7 ታኒ ቱማ ኦደታይስ፤

ዎርዶይ ታ ማታን እፀትዳባ።

8 ታ ኦዳይ ቱማ፤

ጌላ ዎይኮ ምርቀ ግደና።

9 አኬክ ደእያ ኡራስ ታ ኦዳይ ልከ፤

ኤር ደእያ ኡራስ ታ ኦዳይ ቆንጨ።

10 ብራፐ አድ ታ ዞርያ ዶርተ፤

ጌሻ ዎርቃፈ አድ ኤራተ ዶርተ።

11 ጭንጫተ ዞኦ አልኦ ሹቻፈ አስ፤

ነ አሞትያ ኡባይ ኢራ ልከተና።

12 ታዉ፥ ጭንጫተስ አኬክ ደኤስ፤

ኤራተነ ሻክድ ኤሮይ ታባ።

13 ጎዳስ ያሽ ኢታተ እፆ፤

ታኒ ኦቶሮነ ጬቀተ እፃይስ፤

ኢታ ኦገነ ዎርዶ ኦዳ ዶስከ።

14 ዞረይነ ሎኦ ኤራይ ታባ፤

አኬክነ ዎልቅ ታዉ ደኤስ።

15 ካዎት ታ ባጋራ ካዎቶሶና፤

ሃረይሳት ሱረ ህገ ታ ባጋራ ከሶሶና።

16 ሀላቃት ታ ማድን ደርያ ሃሮሶና፤

ቢታ አይስያ ግታ አሳታ ታ ማዳይስ።

17 ታና ዶሰይሳታ ታ ዶሳይስ፤

ታና ምንድ ኮየይሳት ደማና።

18 ዱረተነ ቦንቾይ ታራ ደኦሶና፤

ዉሮና ሻሎይነ እንጀይ ታ ማታና።

19 ህንተ ታፐ ደምያ ጎአይ፥

ጌሻ ዎርቃፈነ ብራፐ አስ።

20 ታ ፅሎተ ኦገን ሄመታይስ፤

ሱረ ፕርዳ ኦግያራ ካንይስ።

21 ታና ዶሰይሳታስ ታ ሻሎ እማና፤

ኤንታ ኬ ዱረተን ኩንና።

22 "ጎዳይ ታና ኡባፈ ኮይሮ መስ፤

በንፐካ እያ ኦሱዋስ ዶመይ ታና።

23 አላመይ መታናፐ ካሰ

ታኒ ሹመታስ።

24 አባይ ባይና ዎደ፥ ፑልቶት ቆና

ደእሽን ታ የለታስ።

25 ደረትነ ዙማት መታናፐ

ስን ታ የለታስ። 26 ጎዳይ ሳኣነ ሳአን ደእያ ኡባ መናፐ ስን

ዎይኮ ኮይሮ ኮጰ ቢታይ ኦሰታናፐ ስን ታ የለታስ።

27 ጎዳይ ሳሎታ ምጭዳ ዎደ፥

አባታፐ ቦላራ ሳሎ ጉፋን ጊግስዳ ዎደ፥

ታኒ ያን ደአይስ።

28 ጎዳይ ሻራታ ቦላራ ዎዳ ዎደ፥

አባ ፑልቶታ ስዳ ዎደ፥

29 አባ ሃት እመትዳ ዛዋፐ ፕንድ፥ ቦላ አናዳ፥

እ ኤንታ ኪትዳ ዎደ ሳኣ ባሱዋ ምንዳ ዎደ፥

ታኒ ያን ደአይስ።

30 ሄ ዎደ ታ እያ ማታን ዋና ኦሳንቾ፤

ኡባ ዎደ ታ እያ ኡፋይሳይስ፤

ታዉካ እያ ስንን ኡፋይታይስ።

31 እ መዳ አላምያን ኡፋይታይስ፤

አሳ ናይትካ ታና ኡፋይሶሶና።

32 "ህዛ ታ ናይቶ፥ ስእተ፤

ታ ኦደይሳዳ ኦይሳት አንጀትዳይሳታ።

33 ታ ትምርትያ ስእተ፤ ጭንጫ ግድተ፤

ስእዳባ ዶጎፕተ።

34 ታኒ ኦድዳባ ስእያ ኡራይ፥

ጋላስ ጋላስ ታ ፐንግያን በንትያ ኡራይ፥

ታ ፐንግያን ናግያ ኡራይ አንጀትዳይሳ።

35 ታና ደምዳይ ደኦ ደሜስ፤

ጎዳፐ ሳባ ኤኬስ።

36 ሽን ታና ደሞና ኡራይ ባና ቆሄስ፤

ታና እፅያ ኡባይ ሀይቆ ዶሴስ።"