1 Intteno Isra7eele asatoo!

GODAY inttes yootiza qaala siyite!

2 GODAY, «Kawoteththata oge

intte tamaaropite.

Istti salo bolla

malata be7idi shirotikkoka,

intte shirotopite.

3 Gaasoykka dereta wogay hada.

Istti mith worappe qanxxeettes;

hiillay massi giigssees.

4 Istti biraninne

worqqan alleqisseettes;

qaaxxontta mala naariqara

misimaaren dhishkidi

oyththeettes.

5 Istta eeqa xoossati

istta kaththa giddon

do7a daganththanaas

essiza misle mala.

Haasayanaas dandayettenna.

Hemettanaas

istti dandayontta gishshas

asay istta tookkees.

Istti iita gidiin

woykko lo7o miish

intte bolla ooththanaas

dandayontta gishshas

isttas mulekka yayyofte» gees.

6 Abeet GODAWU!

Ne malay oonikka deenna.

Neni gita;

ne sunththayka gitanne wolqqama.

7 Abeet kawoteththatas kawoo!

Nees yayyonttay oonee?

Nees bonchchoy bessees;

gaasoykka aadho eranchchata

garsaninne

istta kawoteththata ubbaa garsan

ne malay deenna.✝

8 Hada gidida miththafe masettida

eeqa xoossatappe

timirte tamaarza ubbay

eeyanne damma.

9 He eeqa xoossati Tarseeseppe

yida biraninne

Ufaazeppe yida

worqqan alleqettida.

Istti woyne ushshaninne

ochcha teera misatiza

medhara diza

may7on kamettida.

Istti ubbay kushe ooso

hiillatan oosettida.

10 Gido attiin GODAY tumu Xoossa;

izi de7o Xoossanne mernaa Kawo.

Izi hanqettiza wode

biittay qaaxxees;

kawoteththatikka

iza yiillo dandayettenna.

11 GODAY, «Intteka, ‹Heyti salonne

sa7a medhdhontta xoossati

sa7appenne salo garsafe

dhayana› geeta» gees.

12 Ba wolqqan sa7a medhdhiday,

ba aadho erateththan

alame essiday,

ba akeekan

salo micciday GODAA.

13 Izi guummiza wode,

salon diza ubbay qaaxxees.

Izi shaara sa7a gaxappe

pude denththees.

Izi irara dada yeddees;

carkoka ba minjjasoppe kessees.

14 Asi ubbay era dhaydi dammides;

worqqa seerisiza asi ubbay

ba ooththida eeqa xoossatan

yeellatides.

Gaasoykka eeqa xoossati wordo;

isttas shemppoy deenna.

15 Istti coo qidhes

medhettida miishsha.

Pirday istta bolla gakkiza wode

istti dhayana.

16 Gido attiin Yaaqoobe qaaday

heyta mala gidenna.

Gaasoykka izi ubbaa medhdhidayssa;

Isra7eeley doorettida dere.

Iza dooridayssa sunththay

Ubbaafe Wolqqama

GODAA Xoossa.

17 Intteno morkkey giddoththidaytoo!

Diza miish dizasoppe shiishshite.

18 Gaasoykka GODAY,

«Tani ha sa7a bolla diza asaa

ha7i gede kare kessada gooddana.

Isttas erettana mala

ta istta bolla meto ehana» gees.

19 Waanoo ay hanoo!

Ta madunththay

paxontta madunththa.

Gido attiin ta tana,

«Hayssi ta harge;

tani dandayanaas bessees» gadis.

20 Ta dunkaaney laalettides;

iza wodoroy ubbay duuxerettides.

Ta nayti ubbay

taappe shaakettidi bichchida;

hayssafe guye simmettenna;

ta dunkaana zaaridi tolanaas

woykko ta magalasha kaqqanaas

ha7i issi asinne attibeenna.

21 Heenththanchchati dammida;

istti GODAA oychchibeettenna.

Hessa gishshas isttas injjetibeenna;

istta wude ubbay laalettides.

22 Siyite! Iita yo7oy yuussa bolla dees;

hessi, «Pudeha baggara diza

kawoteththan

gita bul7aketeththi

yuussan dees» gizayssa.

Iza olanchchati yiidi

Yuhuda katamata bazzonne

worakanata duussaso kessana.

23 Abeet GODAWU! Asa de7oy

izaade kushen donttayssanne

ba hemetaakka barkka

ba shene mala

lo7eththana dandayonttayssa

ta erays.

24 Abeet GODAWU! Tana seera;

gido attiin ginara gido.

Tani mulera dhayontta mala

neni hanqora ta bolla yooppa;

25 Yaaqoobe mulera

mi mittidayta bollanne

ne sunththaa xeygontta

asata bolla guussa.

Iza duussasokka

kayzisida gishshas

neni ne hanqoza nena erontta

dereta bollanne

ne sunth xeygontta

kawoteththata bolla gussa.