1 GODAY kosha gishshas Ermaasas

yootida qaalay hayssafe kaallizayssa;

2 «Yuhuda biittay yeekkees;

katamatikka porqqu geettes;

asay biitta bolla uttidi ceecees;

Yerusalaameppeka

waasoy seetettees.

3 Dureti bantta aylleta

haath duuqqanaas kiitteettes.

Isttika haaththa ollay

dizaso beettes;

gido attiin haath demmettenna;

bantta oto mela

tookki ekkidi simmeettes.

Yeellatidinne hidota qanxxidi

bantta hu7e gulluntteettes.

4 Iray bukkontta gishshas

biittay melidi za7ees.

Goshshanchchati yeellatidi

bantta hu7e gulluntteettes.

5 Maatay baynda gishshas

qorkkey ba yelida mara

demban yeggada bawus.

6 Hardidati aykkoy baynda

zumbullata bolla eqqida;

worakanata mala

haath koyidi leessotteettes.

Isttas miza miishshi

dhayda gaason istta ayfey

xeellanaas daaburdes» gides.

7 Asay, «Abeet GODAWU!

ne sinththafe baqata darssidos;

ne sunththaa gishshas

nuus issi miish ooththa;

nuni neeppe daroti

guye simmidos;

ne bollan nagara ooththidos.

8 Abeet Isra7eele hidotawu!

Meto wode ashshizayssoo!

neni biittan imaththa mala,

issi omars aqidi biza

oge asa mala ays hanay?

9 Neni hanizaazi dhayda asa mala,

ashshanaas wolqqay dhayda

olanchcha mala ays giday?

Abeet GODAWU!

Neni nu giddon daasa;

nunikka ne sunththan xeygettidos;

nuna neni aggofarkkii!» gides.

10 Ha asata gishshas GODAY,

«Istti toylatteteth keehi doseettes;

bantta toho naagettenna.

Hessa gishshas GODAY

isttan ufayettenna;

ha7i izi istta qoho qoppees;

istta nagara gaason

istta qaxxayees» gees.

11 Hessafe guye GODAY tana,

«Ha deraa lo7oteththas woossofa.

12 Istti xoomi woossikokka

tani istta waaso siyikke;

xuugettiza yarshonne

kaththa yarshoza

istti yarshikokka

tani istta yarshoza ekkike.

Tani istta mashshan,

koshaninne iita hargen

dhayssana» gides.

13 Histtiin tani, «Abeet Ubbaafe wolqqama GODAWU! Aayye ana! Nabeti isttas, ‹Intte ola be7ekketa woykko koshay inttena demmenna; tani inttes wurseth gakkanaas saroteth immana› geettes» gadis.

14 Histtiin GODAY taas, «Nabeti ta sunththan wordo yooteettes. Tani istta kiittabeekke, azazabeekke, isttaskka yootabeekke. Istti inttes wordo ajjuuta, muurenno yo7o, hada yo7onne bantta wozinan diza baleththo yo7o yooteettes. 15 Hessa gishshas ta kiittontta dishin, ‹Olaynne koshay ha biittay bolla yeenna› giidi ta sunththan wordo tinbite yootiza nabeta tani olaninne koshan dhayssana. 16 Qasse istti tinbite yootida dereykka koshaninne ola gaason Yerusalaame dubbushatan kundana; isttas, istta machcheta, istta attuma naytanne macca nayta aha moogizay dhayana; tani istta mooro mala istta bolla qixaate ehana» gides.

17 Ha qaala isttas,

« ‹Ta derey

keehi deshettidi

madunxida gishshas,

ta ayfeti omarsinne

gallas shempontta afunxxeettes.

18 Tani gaxare biikko,

mashshan hayqqidayta be7ays;

katama gelikko

koshay wursidayta be7ays.

Nabetinne qeeseti

ba erontta dere baqatida›

gees GODAY» gides.

19 Abeet GODAWU!

Neni Yuhuda mulekka aggadii?

Xiyoone asaa harassetadii?

Neni nuna paxontta mala

ooththada ays dechchadii?

Nuni saroteth naagidos;

gido attiin saroteth

demmibeekko;

«Paxana wodey yaana»

giidi naagidos;

gido attiin dagama xalla gidides.

20 Abeet GODAWU!

Nuni nu iitateththaa eridos;

Nu aawata qohokka akeekidos;

tumappeka ne bolla

nagara ooththidos.

21 Nuna ne sunththaa gishshas

gaada kadhopparkkii!

Ne bonchcho araata kawushshofa.

Neni nunara caaqettida

caaqoza qoppa;

ne caaqqida qaala mooppa.

22 Kawoteththata eeqa xoossati

ira bukisana dandayzoo?

Saloti ba shenen

puuse duge yeddanaas dandayzoo?

Dandayettenna;

Abeet nu GODAWU!

Hessa ubbaa ooththana

dandayzay nena;

hessa gishshas nuni nenan

hidota ooththoos.