1 He wode GODAA Keeththan Imere naa qeese Pashkurey Ermaasi tinbite yootishin siyidi, 2 nabe Ermaasa shocides; Xoossa Keeththaafe pude baggara diza Biniyaame gimbe penge bolla agrimooqen qachchides. 3 Wonteththa gallas Pashkurey Ermaasa qashoppe birshiin Ermaasi izas, «Hachchife doommiin GODAY ne sunth Maagormisaabibe* gaana attiin Pashkure geenna. 4 Gaasoykka GODAY, ‹Tani nenanne ne laggeta ubbaa dagamas aaththa immana; istti neni xeellishin bantta morkketa mashshan wurana; tani Yuhuda asaa ubbaa Baabiloone kawo kushen aaththa immana; izi istta di7idi Baabiloone efana; histtidi heen istta mashshan siifana. 5 Ha katamay aqota, iza ooththa demmida ubbaa, Yuhuda kawota aqotanne isttas diza al7o miish ubbaa tani istta morkketas aaththa immana; isttika di7i ekkidi Baabiloone efana. 6 Pashkure! Neninne ne sohon diza ubbayka di7ettidi Baabiloone baana. Neninne ne isttas wordo tinbite yootida ne laggeti ubbay heen hayqqananne moogettana› gees» gides.

7 Abeet GODAWU!

Neni tana cimmadasa;

tanikka cimettadis.

Neni taappe keeha minnada

tana xoonadasa.

Gallas kumeth tani asas

miichchas attadis;

ubbayka tana qidhees.

8 Tani haasayza wode

ubbaan waassays;

«Shironne bash» ga awajjays;

Hessa gishshas GODAA qaalay

taas kumeththa gallas ta bolla

cashshenne qidhe ehides.

9 Tani, «Hayssafe guye

GODAA sunththaa denththike;

iza sunththankka

haasaykke» giikko

iza qaalay ta wozina giddon

tama mala,

ta meqeththa giddonkka

surquntto mala gidides;

hessa gishshas

ta kamma oykkanaas xoonides;

mulerakka eqettanawu

dandayabeekke.

10 «Ubbason shiroy dees;

hilite ane nunikka hiloos» giidi

daroti saasukettishin ta siyadis;

ta kundeth naagettishe diza

ta laggeti ubbay,

«Oonee erizay

balettana dandayzaakko

histtiko nuni iza xoonanakkonne

nu halo kessanakko» geettes.

11 Gido attiin GODAY yashissiza

toora qara mala tanara dees;

hessa gishshas tana yedeththizayti

dhuphettana attiin

tana xoonettenna;

istti iita kawush kawuyana attiin

isttas giigenna;

istta kawushshateththay

mulekka dogettenna.

12 Abeet Ubbaafe

Wolqqama GODAWU!

xilloza paaccizayssoo!

wozinanne kaha

pilgga xeellizayssoo!

tani ta mooto nees

aaththa immida gishshas

neni istta bolla halo kessishin

ta ayfen be7anaas tana gaththa.

13 GODAAS yexxite!

Izas galata shiishshite;

izi metotanchchata shemppo

iitata kusheppe ashshees.

14 Tani yelettida gallassaya

qanggettidaaro gidu!

Ta aayeya tana yelida

gallassaya anjjettufu!

15 Ta aawaas, «Nees mishiraachcho;

nees attuma nay yelettides!»

gi yootiday qanggettidaade gido!

16 Hessaadey GODAY qadhetay baynda

shirechchi yeggida

katamata mala gido;

maalado waaso, gallassa seetan

ola shiro siyo.

17 Ta aaya taas duufo gidana mala,

izi uloy taas mernaa

duussaso gidana mala

tana heen ays wodhibeennee?

18 Tani metonne ceece be7anaassinne

ta de7o layththaa ubbaa

kawushshateththan

wursanaas ta aayi uloppe

ays kezadinaa?✝