1 GODAAPPE Ermaasakko yida qaalay hayssafe kaallizayssa. 2 GODAA Isra7eele Xoossay Ermaasa, «Tani nees yootida qaala ubbaa maxaafan xaafa. 3 Tani ta dere Isra7eelenne Yuhuda kase istta aawatas ta immida biitta isttas zaara ehana wodey gakkides; isttika laattana» gees.

4 GODAY Isra7eelesinne Yuhudas yootida qaalay hayssafe kaallizayssa.

5 GODAY, «Tani babonne

shiro waaso siyays;

saroykka deenna.

6 Ane oychchitenne akeekite!

Addey yelanaas dandayzee?

Histtiin addey ubbaa

miixay oykkida maccassa mala

ba kushe ba ulo bolla woththiin

asa ubbaa sinth karettiin

ta be7izay aazassee?

7 He gallassay ay mala

daganththiza gallas gidanee!

hessa mala gallassi deenna;

he gallassay Yaaqoobe

zereththatas

meto gallas gidana;

gido attiin istti

he metozappe attana» gees.

8 GODAY Ubbaafe

Wolqqama Xoossay,

«He gallas tani istta morgefe

qambara menththana;

istti qashettida

sansalatakka duuththana;

hayssafe guyen

allagay istta haarenna.

9 Gido attiin GODAAS

bantta Xoossassinne

tani isttas kawoththida

kawo Dawite zares

istti haarettana» gees.

10 «Hessa gishshas ta aylle

Yaaqoobe zareto yayyofte!

Intteno Isra7eeleto dagammofte!

Intte haahoson dishin

tani inttena ashshana;

intte zaretakka istti di7ettida

biittafe kessa ekkana;

Yaaqoobe zareti simmidi

saroninne woppan uttana;

istta yashissana

ay miishshika deenna.

11 Tani inttena ashshanaas

inttenara days;

tani inttena

kawoteththata giddon laalladis;

he kawoteththata

mulera dhayssana;

gido attiin inttena

mulera dhayssike;

tani qixaatey baynda coo aggike;

gidikkoka tani inttena

ginara qaxxayana» gees GODAY.✝

12 GODAY, «Intte meqoy koolettenna;

intte madunththay paxenna.

13 Intte gishshas mootettizay deenna;

intte madunththaska dhaley beettenna;

inttes paxoy deenna.

14 Intte laggeti ubbay inttena dogida;

istti intte gishshas wudettettenna;

tani inttena

morkke shociza mala shocadis;

menxe iita asa mala

ta inttena qaxxayadis.

Gaasoykka intte qohoy gita;

intte nagaraykka daro.

15 Dhaley baynda intte hargessinne

intte madunththaa gishshas ays waasseetii?

Intte mooroy gitanne

intte nagaray daro gidida gishshas

hayta ubbaa ta intte bolla

ooththadis» gees.

16 «Gido attiin inttena

dippi histti mida ubbati

hessaththo meetettana;

intte morkke ubbatikka di7etti baana;

inttena bonqqidayti bonqqettana;

inttena boggizayti bogettana.

17 Inttena gidikko tani zaarada payyisana;

intte madunththaaka paththana.

Gaasoykka isttas, ‹Kadhettidaaro;

oonikka koyontta Xiyoono›

gida gishshassa» gees GODAY.

18 GODAY,

«Tani Yaaqoobe keeth zaara keexxana;

izi dizasoskka qadhettana;

katamayakka kase ba laalettidason

simma keexettana;

kawoteththa keeththayka kase ba dizason

simmi keexettana.

19 Isttafe galata mazamureynne

ilili1sa cenggurssi siyettana;

Tani istta darssana;

istta qoodaykka paccenna;

tani istta bonchchettida dere ooththana;

istti kadhettidayta gidettenna.

20 Istta zereththay

beni wode diza mala daana;

istta maabaraykka ta sinththan

minni eqqana;

istta un7eththiza ubbaaka

tani qaxxayana.

21 Istta kaaleththizay istta baggafe gidana;

istta ayssizay

istta giddofe dendana;

tani iza taakko shiishshana;

izikka taakko shiiqana.

Ta shiishshontta dishin xalidi

taakko shiiqanay oonee?

22 Hessa gishshas intte ta dere gidana;

tanikka intte Xoos gidana» gees.

23 Be7ite GODAA hanqoy

dambala mala dendees;

bul7akettiza gote carkoy

iitata wodhdhana.

24 Iza wozina qofaa

polontta GODAA hanqoy

coo hada guye simmenna;

hessa yiza wodetan intte akeekana.