1 GODAY, «Duge Yuhuda kawo soo baada, 2 ‹Nenoo Dawite kawoteththa araata bolla uttida Yuhuda kawoo! Neninne ne shuumeti, ha pengetara geliza as ubbay GODAA qaala siyite› ga» gees. 3 GODAY, «Suure pirdanne xillo ooththite; bonqqettidayta un7eththizayta kusheppe ashshite; beteta, yi7otanne am7eta qohopite; ha sohonkka xillo suuth gussofte. 4 Hayta azazota intte lo7eththi naagikko Dawite kawoteththa araata bolla uttiza kawoti ba shuumetaranne ba dere asaara para-gaarenne para toggidi hayssa kawoteththa keeththa pengera gelananne kezana. 5 Gido attiin intte ta azazota naagontta ixxiko, ‹Ha kawoteththa keeththay mulera dhayana› gaada tani tarkka tanan caaqqays» gides.

6 GODAY Yuhuda kawo keeththas,

«Neni taas Gala7aade biittanne

Libaanoose zuma xeera mala

lo7ikkoka tani nena

addafe bazzonne

asi izan baynda

katama ooththana.

7 Tani nena olizayta hu7en hu7en

ola miish oyththada

ne bolla yeddana;

istti zigappe masettida tuuqeta

qanxxereththidi taman yeggana.

8 «Dumma dumma kawoteththafe yida asay ha katamayra aadhdhi bishe, ‹GODAY hanno gita katamayo ays hayssaththo ooththidee?› giidi ba garsan haasayettana.

9 «Istti, ‹GODAA bantta Xoossaara caaqettida caaqo aggidi eeqa xoossatas goynnida gishshassinne isttas ooththida gishshassa› gaana» gees.

10 Hayqqida Kawo

Iyosiyaasas yeekkofte

woykko kayottofte;

Hessa aggidi di7etti bida

Shaalumes mishettidi yeekkite.

Gaasoykka izi mulekka

guye simmenna;

ba yelettida biitta

nam7anththo be7enna.

11 Ba aawa sohon

Yuhudan kawotidi dishe

ha sohoppe bida

Iyosiyaasa naa Shaalume gishshas

GODAY, «Izi mulekka

guye simmenna.

12 Izi di7etti bida biittan

heen hayqqana;

simmi yiidi ha biittayo be7enna.

13 «Ba kawoteththa keeththa

genen keexxizayssas,

pirda geellasidi

pooqe keexxizayssas,

as coo mela oosisizayssas,

iza wolqqa waaga ciggonttaades,

14 Izi, ‹Gita pooqenne

aaho kawoteththa keeth

taas keexxana› gizaades

aayye ana!

Izi ba keeththas

gita maskooteta kessees;

ziga miththan alleqissees;

zo7o qalamekka tiyees.

15 «Ne kawoteththa keeththa

daro ziga miththan keexxidayssi

nees kawotidaa misatizee?

Ne aaway suure pirdanne

xillo ooththida gishshas

mizaazinne uyizaazi paccidee?

Izas ubbaa miishshika injjetides.

16 Izi manqotassinne metotanchchatas

pirda geellasibeenna;

hessa gishshas ubbaa

miishshika izas eeno gides;

taas ero guussi hessa gidennee?

17 Gido attiin ne ayfeynne

ne wozinay shempiday

haa hee shocechchon

demmiza go7an,

xillota suuth gusson,

asaa un7eththoninne

gene oosonna» gees.

18 Hessa gishshas GODAY

Yuhuda Kawo Iyosiyaasa naa

Iyo7aaqeme gishshas,

«Woo ta ishawu!

Waay waay ta michchee!

Qasse, ‹Ta godawu woo woo!

Ne gitateththaa woo woo!›

giidi zilalettenna.✝

19 Harey moogettiza mala

izi moogettana;

Iza ahay Yerusalaame

pengetappe gooshettidi

kare olettana» gees.

20 GODAY Yerusalaame,

«Pude Libaanoose baada waassa;

Ne qaalakka Baasaanen sissa;

Abaarimen eqqada waassa;

gaasoykka nees ola laggeti

ubbay wurida.

21 Neni saro dishin

ta nees minththa yootadis;

gido attiin neni, ‹Siyikke› gadasa.

Yelagateththafe doommiin

ne ogey hayssa;

neni taas azazettontta ixxadasa.

22 Ne heenththanchchata ubbaa

carkoy efana;

ne laggeti ubbay di7etti baana;

ne iitateththaa ubbaa gaason

yeellatananne kawuyana.

23 Hanne Libaanoosen dizaaree!

Ne keeththaa ziga

miththafe keexxidaaree!

miixay oykkida maccassa mala

metoy ne bolla yishin

waana waassandii!» gees.

24 GODAY, « ‹Tani ta de7on caaqqays› Yuhuda kawo Iyo7aaqeme naa Ikoniyaane neni taas ushachcha kushe qalabate maatame gididaakkoka ta nena kessa olana.✝ 25 Nena wodhanaas koyzaytas, neni yayyiza Baabiloone Kawo Nabukadanaxooressinne iza olanchchatas tani nena aaththa immana. 26 Tani nenakka nena yelida ne aayeyokka intte yelettontta allaga biittan ola aggana; intteka heen hayqqana. 27 Intte simmanaas laamotiza biittayo mulekka simmeketa» gees.

28 Hayssi Ikoniyaaney kadhettidi

meqqida oto mala

oonikka koyontta miishshe?

Izinne iza nayti

ays kare oletti attidoo?

Istti ba erontta allaga biittan

ays yegetti attidoo?

29 Hanne biittayee, hanne biittayee!

GODAA qaala siya!

30 GODAY, «Yuhuda ayssanaas

asi baynda gishshas,

Dawite araatan uttana

issaadeyka ke7ontta gishshas,

issi paxa asi kezontta gishshas

izas de7o layththa

ubbaan injjetontta

dhonththa as giidi xaafte» gees.