1 GODAY, «Yuhuda nagaray

birata bi7ireninne

hoxe almaaze xeeran xaafettides;

istta wozina bollanne

istti yarshizason diza

kaceta bolla xaafettides.

2 Isttas naytikka attontta cilila

miththata garsaninne

dhoqqa zumbullata bolla diza

yarshosotanne

Asheero geetettiza

eeqa misleyo qoppeettes.

3 Ne biittan oosettida nagara gaason

zumata bollanne

zumbullata bolla diza

ne aqota,

ne dureteththinne ne goynosota

tani di7os aaththa immana.

4 Ne mooro gaason

ta nees immida xinxxozappe

ne mela attana;

nena tani ne erontta biittan

ne morkketas ayllesana.

Gaasoykka mernaas

tama mala eexxiza

ta hanqoza

ne denththeththadasa» gees.

5 GODAY, «Asan ammanettizay,

asho may7ida asan ceeqettizay,

ba wozina GODAAPPE

haassizay qanggettidaade.

6 Izi bazzon diza

qeeri wora mala gidana;

izi lo7o miish be7enna;

izi asi baynda maxine biittan

bazzon mela sohon uttana.

7 Gido attiin GODAAN ammanettiza asi,

izi ammanettizay

GODAA gididaadey anjjettidaade.

8 Izi haaththa lanqen tokettidi,

ba xapho duge haaththan yeddida

miththa mala.

Awa seelaskka yayyenna;

iza hayththay

cililida mala daana;

away darida layththika babbenna;

ayfe imoppeka paccenna.✝

9 Asa wozinay ubbaa miishshafekka gene;

izas paxateththika deenna;

iza eranaas ooni dandayanee?

10 Tani GODAY as ubbaas

iza oge malanne

iza ooso mala immanaas

asaa wozina pilggayssinne

iza kaha paaccays» gees.✝

11 Bessontta ogera aqota dagasiza asi

ba phuqisontta ciye

haphphiza kuracho mala.

Iza layththay buro baggattishin

izi aqota aggi baana;

wurseththan iza eeyateththi

qoncce kezana.

12 Nu Xoossa Keeththi dizasoy

benippe doommidi dhoqqu gida

bonchcho araata.

13 Isra7eeles hidota gidida GODAWU!

nena aggi bida ubbay yeellatana;

nena de7o haaththa pultto gidida

GODAA aggida gishshas

ba ayfeso neeppe

haraso zaarizayti

gudulla bolla

xaafettidayssa mala gidana.

14 Abeet GODAWU! Tana paththa;

tanikka paxana;

tana ashsha;

tanikka attana;

gaasoykka ta galatay nena.

15 Asay tana zaari zaaridi,

«GODAA qaalay awan dizee?

Ane ha7i poletto!» geettes.

16 Heenththanchcha gidada

nees ooththanaappe

guye gabeekke;

ta isttas iita gallas

amottonttayssa ne eraasa;

ta doonappe kezizayssi

ne sinththan qoncce.

17 Tana daganththizaade gidoppa;

neni taas meto gallas

ta baqata attizasoho.

18 Tana yedeththizayti yeellatetto;

tana yeellasoppa;

istti dagammetto;

gido attiin tana dagamappe qotta;

istta bolla iita gallas eha;

istta bolla dakko bash eha.

19 GODAY tana, «Yuhuda kawoti katama gelizaasoninne kezizaaso deraa pengeninne hara Yerusalaame pengeta ubbaan baada eqqa. 20 Histtada isttas, ‹Ha pengetara geliza Yuhuda kawoto! Yuhuda asatoo! Yerusalaamen diza as ubbatoo GODAA qaala siyite!› ga» gees. 21 GODAY taas, «Sambata gallas tooho tookkidi Yerusalaame pengetara gelontta mala inttes naagettite!✝ 22 Sambata gallassan intte keeththafe tooho tookkidi kessofte; woykko aykko oosonne ooththofte. Kase intte aawata tani azazida mala, Sambata gallas dummasidi bonchchite.✝ 23 Istti gidikko siyibeettenna; wozinankka woththibeettenna; istti siyontta malanne simmontta mala ba wozina muumisida. 24 Gido attiin intte tani GODAY yootizayssa naagetti azazettiko, Sambata gallassan ay miishshika tookkidi hanno ha katamay pengetara gelontta aggiko, Sambata gallas dummasidi izan ay oosonne ooththontta bonchchiko, 25 Dawite kawoteththa araatan uttiza kawotinne istta shuumeti ha katamay pengera gelana; istti ba parataninne ba para-gaareta bolla uttidi Yuhuda asaynne Yerusalaame asay azhabiin yaana; ha katamaya mernaas asi diza katama gidana. 26 Asay xuugettiza yarshonne hara yarsho, kaththa yarsho, exaanenne galata yarsho ekkidi, Yuhuda katamatappe, Yerusalaame yuushon diza mooththatappe, Biniyaame biittafe, gadhappenne gezzefe qasseka Negebe biittafe GODAA Keeth yaana. 27 Gido attiin intte Sambata gallassata dummasontta ixxidi sambata gallas tooho tookkidi Yerusalaame pengetara gelidi ta azazo menththiko tani Yerusalaame pengeta bolla izi miixata miza to7ontta tama ta eeththana» gides.