1 GODAY, «Ane Yerusalaame ogeta bolla kezidi

pudenne duge yuushshi

xeellitenne akeekite;

derey duulatizasotan

xilloteth koyzaynne

suure pirdiza kezidi

intte issaadeka demmiko

tani Yerusalaame maarana.

2 Gido attiin isttas,

‹GODAY beyiin› gi caaqqikokka

istti tumappe

wordo caaqqeettes» gees.

3 Abeet GODAWU!

Ne ayfeti tumaa xeelettennee?

Neni istta shocadasa shin

istta sakkibeenna.

Neni istta kinchchereththadasa;

gido attiin

istti simmibeettenna;

istti bantta wozina

shuchchafe aaththi minththida;

bantta nagarappeka

simmontta ixxida.

4 Hessafe guye tani ta wozinan,

«Hayti manqotanne eeyata;

heyti GODAA ogenne

bantta Xoossa woga eronttayta.

5 Hessa gishshas

tani gita asataakko baana;

isttaskka yootana;

gaasoykka GODAA ogenne

bantta Xoossa woga ereettes»

gaada qoppadis.

Gido attiin istti ubbayka

issife iza qambara menththida;

qashozakka duuththida.

6 Hessa gishshas gaammoy

worappe kezidi

istta menththereththana;

kana suytey bazzofe kezidi

istta puuzereththana;

Maahey istta katamata yuusho

zamadi naagana.

He katamatappe keziza ubbaa

izi puuzana.

Gaasoykka istta

makkallateththinne

kaddoy darides.

7 GODAY, «Tani intte nagara

ays atto goo?

Intte nayti tana aggida;

eeqa xoossatankka caaqqida;

Tani istta kalssa mizadis;

istti gidikko laymatidanne

layma keeth bida.

8 Istti dhiikettida

korma para mala gidida;

istti issoy issoy

asa machcho

laggeththanaas kaallida.

9 Tumuppe tani ha yo7ota gishshas

istta qaxxayanaas bessennee?

Tani ta hu7era

hessa mala kawoteththa bolla

halo kessana bessennee?» gees.

10,11 Qasseka GODAY,

«Woyne tura giddo biidi

iza moorite;

gido attiin mulera dhayssofte.

Istti GODAAS gidontta gishshas

izi haggata tarshi tarshi yeggite;

Isra7eele asaynne

Yuhuda asay mulera

tana kaddida» gees.

12 Istti GODAA bolla wordo haasayda;

«Izi nuna aykkoka ooththenna;

iita miishshika

nu bolla gakkenna;

olanne kosha

nuni mulekka be7okko.

13 Nabeti carko mala attiin

istta giddon qaalay deenna;

istti gizaazi ubbay

istta bolla gakko» geettes.

14 Hessa gishshas GODAY

Ubbaafe Wolqqama Xoossay,

«Istti ha qaala haasayda gishshas

tani ta qaala

ne doonan tama kessana.

Ha asaakka mith kessana;

tamaykka istta

mi dhayssana» gees.

15 GODAY inttena,

«Intteno Isra7eele asatoo!

Tani intte bolla haaho biittafe

issi kawoteth ehana.

Izi wolqqamanne

beniisofe diza kawoteththa.

Iza qaalay inttes erettenna;

iza haasayay inttes gelenna.

16 Istta mashsha koohoy doya diza

duufo mala;

istti ubbayka wolqqama

olanchchata.

17 Istti intte kaththaanne

qumaa pitti maana.

Intte attuma naytanne

macca nayta wodhana.

Intte dorsanne miizaa

bonqqidi maana.

Intte woyne teeranne

balase teera

bonqqidi maana.

Intte ammanettiza gimbettida

katamatakka istti bantta

mashshan dhayssana» gees.

18 GODAY Ermaasa, «Gido attiin

he gallassatan

tani inttena mulera dhayssike.

19 Asay nena, ‹Nu GODAA nu Xoossay

nu bolla hayssa ubbaa

ays ooththidee?›

giidi oychchiza wode

neni isttas, ‹Intte tana GODAA

aggidi intte biittan

allaga xoossatas ooththida mala,

intteka asa biittan allagatas

hessaththo ooththana› ga» gides.

20 Qasseka GODAY,

«Hayssa Yaaqoobeso asatas yoota;

Yuhuda biittankka hizga awajja;

21 Intteno Ayfey dishin

demmonttaytoo!

Hayththi dishin siyonttaytoo!

Eeyanne yuushshi qopponttaytoo!

Hayssa siyite!✝

22 Intte taas yayyanaas bessennee?

Intte ta sinththan

kokkoranaas bessennee?

Ays giikko izi mernaas

kanththi bontta mala,

tani ancco abbas zawa ooththadis.

Dambalay bulakettikokka

zawappe aadhdhenna;

Izi guummikkoka

pinnanaas dandayenna.✝

23 Gido attiin ha deraas muumenne

makkalla wozinay dees;

Istti oge aggi wora bida.

24 Istti bantta wozinan,

‹Nuus sila iranne gabba ira

woden woden bukissiza,

kaththa shiishsho wode

nuus wodera ehiza GODAA

nu Xoossaas

ane yayyoos› gibeettenna.

25 ‹Intte iita oosoy

hayta inttena diggides.

Intte nagaray inttena

lo7o miishshafe

ashshides› ga» gees.

26 GODAY, «Ta asaa giddon

iita asati deettes.

Kafota oykkanaas

naagiza asa mala

istti woximade woththidi

asaa oykkanaas naageettes.

27 Kafo keeththan kafoy kumida mala

istta keeththan

baleththoy kumides.

Hessa gishshas istti

durenne wolqqama gidida.

28 Istti ordidanne modhdhida;

istta iitateththaas zaway deenna.

Yi7oti suure pirda demmana mala

isttas eqqibeettenna;

manqota maata gishshassika

mootettettenna.

29 Histtiin tani hayta

ha yoota gishshas,

istta qaxxayanaas bessennee?

Hessa mala kawoteththa bolla

ta halo kessanaas

bessennee?» gees.

30 Qasseka GODAY,

«Daro babisiza miishshinne

daganththiza miishshi

biitta bollan hanides.

31 Nabeti wordo tinbite yooteettes;

qeesetikka istta zoren aysseettes.

Ta asaykka hessa mala

miish dosees!

Histtiin wurseththan

intte ay ooththanee?» gees.