1 GODAY tana, «Baada laynoppe oosettida dancco shammada ne xeessan dancca; gido attiin haaththan boshisoppa» gides. 2 Hessa gishshas tani GODAY azazida mala dancco shammada ta xeessan danccadis.

3 GODAA qaalay nam7anththo taakko yiidi, 4 «Neni shamma danccida danccoza ekkada Efiraaxise Shaafa ba; histtada zaalla za7a giddon qotta» gides. 5 Histtiin tani GODAY taas yootida mala efada Efiraaxise Shaafa lanqen qottadis.

6 Daro gallassafe guye GODAY, «Denda Efiraaxise Shaafa baada tani nena, ‹Heen qotta› gida danccoza kessa» gides. 7 Histtiin tani Efiraaxise Shaafa ba bookkada danccoza ta qottidaasoppe kessadis; gido attiin he danccozi moorettidi mulera go7onttaaz gidides.

8 Hessafe guye GODAA qaalay taakko yiidi, 9 «GODAY tani Yuhuda asaa otoreteththinne Yerusalaame asaa ceeqeteth hessa mala dhayssana. 10 Ta qaala siyontta ixxidi, bantta wozina muumeteththa kaallidi, eeqa xoossatas ooththanaassinne goynnanaas biza ha iita asay hayssa danccoza mala mulekka go7onttayssa gidana. 11 Danccoy asa xeessa baqqi oykkiza mala Yuhuda asay ubbaynne Isra7eele asay ubbay taakko shiphphi gaana malanne ta sunththas galatanne bonchcho immana mala ta ooththiin istti ta gizaaz siyibeettenna» gees.

12 Qasseka GODAA Isra7eele Xoossay, «Ermaasa! Asaas, ‹Oto ubbaan woyne ushshay kumana› gees. Istti nees zaaridi, ‹Oto ubbaan woyne ushshi kumanayssa waani nu erokkonii?› giikko, 13 neni isttas, ‹GODAY tani ha biittan diza asaa ubbaa, Dawite kawoteththa araatan uttiza kawota, qeeseta, nabetanne Yerusalaamen diza asaa ubbaaka ta woyne ushshan maththosana. 14 Tani issi as hara asara, aawa naara ooshshana; tani istta dhayssana attiin isttas mishettike; qadhettikenne maarikke› gees ga» gides.

15 GODAY yootides;

wozinan woththi siyite;

aggite otoranchcha gidopite.

16 Izi dhuma ehontta dishin

dhumida zumata bolla intte tohoy

dhuphettontta dishin

GODAAS intte Xoossas

bonchcho immite;

Intte, «Poo7oy yaana»

giidi naageeta;

gido attiin

izi dhuman laammana;

sakkanna dhuma ooththana.

17 Intte siyontta ixxiko,

intte otoreteththaa gishshas

ta shemppoya geeman yeekkana;

GODAA wudey

di7etti bichchida gishshas

tani camo yeeho yeekkays;

ta ayfeppe afunththi

haaththa mala goggees.

18 GODAY tana, «Kawozasinne

iza aayo godatteys,

‹Intte bonchcho kallachchay

intte hu7eppe

wodhdhana gishshas,

intte kawoteththa araataappe

duge wodhdhite.

19 Negebe biittan diza katamati

ubbay gordettana.

Istta doyanaadeyka deenna;

Yuhuda asay ubbay

di7ettidi baana;

istta ogeykka

gordettana› ga» gides.

20 Qasseka GODAY, «Ane dhoqqu giidi

pudeha baggafe yizayta xeellite;

inttes imettida wudey,

intte ceeqettiza dorsati

awan dizoo?

21 Neni nees dabbo gidana mala

koyidayti nena xoonidi

haariza wode

ne ay gaanee?

Yelo miixay oykkida

maccassa mala

nena miixay oykkennee?

22 Neni ne wozinan,

‹Hayssi ubbay ta bolla

ays gakkidee?› giikko,

ne may7oy qaarettiin

ne sugettiday,

ne asa kushen waaye be7iday

ne nagaray darida gishshassa.

23 Tumu Tophphiya asi ba medha,

woykko maahey ba masarateththaa

laammanaas dandayzee?

Intte iita ooththi meezetidayti

lo7o ooththanaas

dandayekketa» gides.

24 GODAY, «Bazzo carkoy

suulla laalliza mala

tanikka inttena laallana.

25 Intte tana dogida gishshassinne

wordo xoossatan

ammanettida gishshas

intte saamaynne

intte qaaday hayssa.

26 Intte kalloy

beettanaashe gakkanaas

tani intte may7o qaarada

intte sinth kammana.

27 Intte zumbullata bollanne

demban ooththida harassiza ooso

tani be7adis;

intte laymateththanne intte ziita

hanota ta be7adis;

Yerusalaame nees aayye ana!

Neni ayde gakkanaas

ne tunateththaafe

geeyontta daanee?» gees.