1 Yuhuda Kawo Sedeqiyaasi Malkiya naa Pashkurenne Ma7isaya naa qeese Sofonaasa Ermaasakko kiittida wode GODAA qaalay Ermaasakko yides. 2 Kiitettidaytikka, «Baabiloone Kawo Nabukadanaxoorey ba olanchchatara ha katama giddoththida gishshas ane nuus GODAA oychcha. GODAY beniyssa mala malalisiza ooso nu gishshas ooththidi iza guye zaaranaakko ooni erizee» gi oychchida.✝

3 Ermaasi gidikko isttas, «Biidi Sedeqiyaasas, 4 ‹GODAA Isra7eele Xoossay nena gimbezappe kare baggara dooddi uttida Baabiloone kawonne iza olanchchata olanaas intte kushen intte oykkida ola miishshaa tani intte bolla guye zaarana. Istta ha katamayo zaara gelththana. 5 Tani ta hu7era qixaates denththida kusheninne mino qesen, hanqoninne bashshan, gita boshan ta inttena caddana.✝ 6 Tani ha katamayn diza asaanne mehaa shocana; isttika iita hargen wurana. 7 Hessafe guye Yuhuda Kawo Sedeqiyaasanne iza shuumeta, iita hargefe, mashshafenne koshappe attida deraa Baabiloone Kawo Nabukadanaxooressinne istta wodhanaas koyza morkketas tani GODAY aaththa immana. Izi istta qara mashshan wodhana; istta maarenna; isttas mishettenanne qadhettenna› gees» giite.

8 GODAY Ermaasa, «Gujjadakka hayssa deraas, ‹GODAY hekko tani intte sinththan de7o ogenne hayqo oge woththadis. 9 Hanno ha katamayn takkiza ubbay mashshan, koshaninne iita hargen hayqqana; gido attiin katamayppe kezi biidi katama dooddi oykkida Baabiloone asatas ba kushe immida asi ba shemppo ashshananne de7on daana. 10 Tani ha katamaas lo7o ooththanaas gidontta iita ooththanaas qachchadis; iza Baabiloone kawos aadhdha imettana; izikka izo taman xuuggana› gees.

11 «Qasseka Yuhuda kawo keeththa asaas,

‹GODAA qaala siyite!

12 Intteno Dawite soo asawu!

Intte ooththida iita ooso gaason

eexxiin oonikka toyssana

dandayontta tama mala

ta hanqoy intte bolla

eexxontta mala

wonttan wonttan suure pirdite;

bonqqettidayta un7eththizayta

kusheppe ashshite› gees ga.

13 ‹Hanne shoobbaafe pude baggara

shuchchi dari dizason diza

Yerusalaame!

Tani ne bolla dendadis;

nu bolla oonee dendanay?

Nu keeth oonee

xali gelanay?› gizaaree!

14 Tani nena ne ooso mala qaxxayana;

tani ne woran tama yeddana;

iza yuushon dizayssaka

ubbaa xuuggana» gees.