1 GODAY, «Intteno Biniyaame zaretoo!

Pudeha baggafe iita miishshinne

bashshi yaana giza gishshas

intte shemppo

ashshanaas baqatite!

Yerusalaameppe kezite!

Tequhe kataman zaye punnite!

Beeti-Hakarimen malata bessite!

2 Tani mala lo7onne

ufayssiza Xiyoone

nayo dhayssana.

3 Heenththanchchati

bantta wude ekkidi

izi bolla yaana;

histtidi izi yuushon

bantta dunkaane tokkana;

bantta wude bantta

sohon sohon heemmana.

4 Istti issoy issaa, ‹Yerusalaamera

olettanaas giigettite! Dendite!

Ane nuni izo seeta gallas oloos.

Gido attiin aayye ana!

Sa7ay qammees;

omarsa kuway

aduqqi aduqqi bees.

5 Hessa gishshas dendite!

Ane omars oloos;

histtidi izi miixaakka

ane laalloos›

giidi maqettida» gees.

6 Ubbaafe Wolqqama GODAY,

«Miththata qanxxite.

Yerusalaame gimbe lanqen

biitta doorite;

ha katamayn qohoy

kumida gishshas

izis qixaatey bessees.

7 Ollafe haaththi pulttiza mala izakka

ba iitateththaa pulttisawus;

Makkalla miishshinne

bashsha miishshi

izi giddon seetettees;

ubba wode izi sakoynne

madunththi taas beettees.

8 Hanne Yerusalaame naagetta;

ne akkay giikko

ta neeppe shaakettana;

qasse ne biittaaka

bulasana» gees.

9 Ubbaafe Wolqqama GODAY,

«Woyne teera issinokka

ashshontta maxiza mala

Isra7eele asaappe

attidayta hessaththoka

maxi shiishshite.

Woyne teera maxiza asa mala

intte kushe haggata giddo

nam7anththoka yeddite» gees.

10 Tani oonas yootoo?

Oona seeroo?

Ooni ta gizaaz siyanee?

hekko istta hayththi

tulle gidida gishshas

istti siyettenna;

GODAA qaalay

isttas qidhes kezides;

istti izan ufayettettenna.

11 Hessa gishshas GODAA hanqoy

tanan kumi uttides;

tani ha hanqoza

ta ulon oykkana dandaykke.

Histtiin GODAY tana,

«Ta hanqoza ogen diza

guuththa nayta bollanne

shiiqida yelaga nayta bolla gussa;

machchanne azinay,

cimmida asatikka

kessi ekki attettenna.

12 Tani he biittan dizayta bolla

ta kushe yeddiza wode

istta keeththati, istta gadetinne

istta machchetikka attontta

ubbay haratas gidana» gees.

13 Qasseka GODAY,

«Guuththayka gitaykka

ubbay ba go7as yiiqetees.

Nabetinne qeeseti ubbay

as baleththeettes.

14 Istti ta deraa madunththaa

qeeri miishsha mala xeellida;

paxana mala koshshiza

ooso ooththibeettenna;

Saroy baynda,

‹Saro; saro› geettes.✝

15 Ha harassiza oosoza gishshas

istti yeellatidoo?

Akkay mulekka yeellatibeettenna;

istti yeellay aazakko erettenna.

Hessa gishshas istti kundizaytara

issife kundana;

tani istta qaxxayiza wode

istti kawuyana» gees.✝

16 GODAY, «Daggala oge bolla

eqqi xeellite;

beni ogeyo oychchite;

Lo7o ogey awaarii? Izira biite;

intte intte shemppos

shemppo demmana;

intte gidikko,

‹Nu izira bookko!› gideta.✝

17 Ta inttena naagizayta woththadis;

‹Zayey punettishin siyite› gadis;

intte gidikko,

‹Nuni siyokko› gideta.

18 Hessa gishshas kawoteththatoo, siyite!

Intteno markkatoo!

Istta bolla aazi

gakkanaakko akeekite.

19 Biittayee siya!

Istti ta qaala

siyontta ixxida gishshassinne

ta wogaakka kadhida gishshas

tani deraa bolla

istta iita qofaa mala bash ehana.

20 Exaaney Saaba biittafe

sawiza qimamey

haako biittafe yiikko

tana ay gaanee?

Xuugettiza intte yarshozakka

ta ekkike;

intte shiishshiza hara yarshoyka

tana ufayssenna» gees.

21 Hessa gishshas GODAY,

«Tani ha deraa sinththan

dhuphiza miish woththana;

aawatinne attuma nayti

izan dhuphettana;

shoorotinne laggeti

dhayana» gees.

22 Qasseka GODAY,

«Hekko pudeha baggafe

olanchchati yeettes;

gita kawoteththi sa7a gaxappe

denththa bolla dees.

23 Istti wondafenne toora oykkida.

Istti menxe iitatanne

qadhetay bayndayta;

istti bantta parata toggiza wode

abbay guummiza mala

guummeettes.

Intteno Xiyoone macca naytoo!

Istti giigettidi inttena

olanaas yeettes» gees.

24 Nuni he yo7o siyiin

nu qesey kim7ilish gides.

Maccas miixay oykkida mala

nuna ceecey oykkides.

25 Morkkey mashsha gixxides;

ubbason shiroy kumides;

hessa gishshas kare kezopite;

ogenkka hemettofte.

26 Ta deretoo maaqa may7ite;

bidinththa bolla bululettite;

mexi issi nay hayqqida asa mala

camo yeeho yeekkite;

gaasoykka nu qoppontta dishin

dhayssizay nu bolla yaana.

27 GODAY Ermaasa, «Ermaasaa!

Birata paaccizaade mala

neni ta dereza ogenne

istta hemeta paaccana mala

ta nena woththadis;

28 Istti ubbay zigirshe yuuyizaytanne

yootiin ekkontta

makkallanchchata;

istti xarqimala malanne

birata mala;

istti ubbayka mooro ooththizayta.

29 Birata seerisanaas womppiina

lo7eththa punna;

gido attiin iitati mulera

pitetti kezontta gishshas

hessi coo hada daabura.

30 GODAY istta kadhida gishshas

istti kadhettida bira

geetetti xeygettana» gees.