1 Matungo nanso maumbɨ aantʉ ɨdʉ ikɨlo akilʉndɨɨla sʉnga akatulipanangɨla, Yesʉ akatulitabʉlya nɨamanyisigwa akwe hanza, akalʉnga, "Hʉgʉki mʉleke kʉtenda anga Apalisayo, ingɨ itendisa kɨna amʉtyatile Itunda. 2 Kɨhi nɨkipihilwe kikupihʉʉlwa, ang’wi nɨkɨpihilwe kɨkʉikwa mʉyelʉ pee. 3 Nɨmʉkɨtambʉe mʉkiti, kɨkʉkumʉka mʉyelʉ, niki nɨmipwepwee mʉakʉtwɨ anyu mʉkɨanda kʉnʉ lʉjɨ lʉlugaɨwe, kɨkitʉntwa kitembe.

4 "Kʉmʉtambʉɨla ʉnyenye nɨmɨahʉmba ɨane. Leki kʉaogopi awo nɨɨbʉlaga ʉmʉɨlɨ, anga abʉlage ɨleng’waa kitʉma kɨntʉ kɨhi. 5 Ingɨ kʉmʉlagɨɨla ʉyʉ nʉtakɨwe kogopwa. Mogopi ʉyo nɨɨza anga wakondye kʉʉbʉlaga ʉmʉɨlɨ, ʉhumile kʉʉgʉmɨla mʉmoto nɨshanga wɨlima mahikʉ ɨhi, kʉlʉ kʉʉlʉ kʉmʉɨla mogopi yʉyo.

6 Mʉlingɨle kɨna nsologwe itaano igʉligwa kʉ ʉgʉli ʉniino nangaluu? Ingɨ Itunda shanga ʉkʉmiwa ganɨng’wɨ ao. 7 Leki kogopi, ʉnyenye mʉkete nsailo kʉkɨla insologwe. Ga ninsingɨ niamʉmatwe anyu iaigwe.

8 "Kʉmʉtambʉɨla kɨna, wɨhi nʉkʉtanantya ntongeela aantʉ kɨna nʉanso ʉkolɨ palʉng’wɨ nʉ nene, nʉ Ng’waa Mʉntʉ ʉkʉmʉtanantya kɨna ʉkolɨ palʉng’wɨ nʉnene ntongeela aitʉmi akigʉlʉ nɨang’wi Itunda. 9 Ingɨ mʉntʉ wɨhi nʉkʉnihita ntongeela aantʉ, nʉ Ng’waa Mʉntʉ ʉkʉmʉhita ntongeela aitʉmi akilunde nɨang’wi Itunda.

10 "Mʉntʉ wɨhi nʉɨmʉtambʉla ibɨ nimbɨ ʉ Ng’waa Mʉntʉ ʉkʉlekelwa, nʉ kʉmʉkunka ʉ Ng’wahʉ wang’wi Itunda shanga ʉkʉlekelwa.

11 "Hangɨ anga amʉtwale mʉnyʉmba niakʉtankanɨla Ayahudi nʉkʉmʉsemela kʉatongeeli nɨatemi, leki kikolyi nɨkakʉsʉkɨɨlya. 12 Kʉnsoko matungo nanso Ng’wahʉ wang’wi Itunda ʉkʉmʉmanyisa ɨko nɨmʉtakɨwe kʉtambʉla."

13 Mʉntʉ ʉng’wɨ miumbɨ nɨla antʉ akamʉtambʉɨla ʉ Yesʉ, "Mʉmanyisi mʉɨle ʉ heu wane komolane isalo."

14 Yesʉ akamʉsʉkɨɨlya, "Mʉhʉmbamɨane, nyenyu nʉmbɨkile ʉnene ntule nɨmʉsali wanyu?" 15 Sʉnga ʉ Yesʉ akaatambʉɨla antʉ nɨanso, "Hʉgʉki nʉʉimani, kʉnsoko ʉʉpanga wamʉntʉ ʉmʉtilɨ mʉʉgolɨ nʉkete."

16 Sʉnga Yesʉ akaapa mpyani ɨyɨ, "Aɨʉkolɨ mʉgolɨ ʉng’wɨ, mʉgʉnda wakwe aɨʉkindile nangaluu. 17 Ʉʉgwa mʉgolɨ ʉyʉ akatula sɨnganɨɨlya mʉnkolo akwe, ‘Ntendeʉlɨ kanɨmʉgila ʉɨko nʉandya yane nɨmpʉe? 18 Sʉnga akalʉnga kʉtenda itɨ, ‘kʉtaʉla imasalanka ane ɨhi ntume isalanka lɨng’wɨ nikʉlʉ kʉkɨla aya, nkitɨle indya yane yɨhi mʉng’wanso ninsao yane yɨhi. 19 Sʉnga akitambʉɨla mʉnkolo akwe, nkolo ane itungo ɨlɨ nkete nsao yɨdʉ ninza nɨnsʉmbilye kʉmyaka ɨdʉ. Itungo ɨlɨ supya ʉlye ʉng’we hangɨ wiloeelye.’ 20 Ingɨ Itunda akamʉtambʉɨla, ‘Ʉewe wɨmʉpʉngʉ, ʉtikʉ walelo ʉkʉsha. Ɨmaintʉ ɨhi nʉsʉmbilye akʉtula ang’wa nyenyu?"’

21 Yesʉ akamalɨnkɨɨlya wazelʉnga, "Iti ʉʉ yɨlɨ kʉmʉntʉ nʉisʉmbyaa insao kʉnsoko akwe ʉng’wenso, ingɨ agila kɨntʉ nɨ kansaɨlo kʉng’wi Itunda."

22 Sʉnga ʉ Yesʉ akaatambʉɨla amanyisigwa akwe, "Kʉlʉlo leki kiaji kʉnsoko alikalo lanyu kɨna mʉkʉlya ntʉni, ang’wi kʉ mɨɨlɨ anyu kɨna mʉkʉtugala ntʉni. 23 Kʉnsoko bahu ʉpanga kʉkɨla indya, hangɨ bahu mʉɨlɨ kʉkɨla ingʉo. 24 Gozi inkʉngʉlʉ, shanga yɨtemela ang’wi kʉogola, ngila anga isalanka ang’wɨ ʉɨko wɨhi nʉwandya, ingɨ Itunda wɨilɨsa. Ʉnyenye mɨbahu ikʉlʉ kʉkɨla inyunyi nɨanso. 25 Nyenyu mʉng’waanyu nʉhumile kiaja wiongeelye ʉlikalo lakwe ki saa lɨng’wɨ du? 26 Kʉnsoko mʉlemilwe kitʉma ikani ɨlɨ niniino, nɨkɨgwa mʉkiaja kitʉma makani nɨmangɨɨza? 27 Gozi mpʉmbʉʉlʉ nɨkʉla, shanga itʉma ang’wɨ kʉtuma ngʉo. Ingɨ kʉmʉtambʉɨla, Mʉtemi Solomoni palʉng’wɨ nʉgolɨ nʉkʉtugala ngʉo maza ikɨlo, shanga aɨʉtugaigwe iza anga mpʉmbʉʉlʉ nɨanso. 28 Anga ɨze Itunda wɨmatugalya iza impʉmbʉʉlʉ namʉmɨgʉnda nɨɨza lelo akolɨ mʉdaʉ akʉmagʉmɨlwa mʉmoto, itɨɨ, shanga ʉkʉmʉtendeela ʉza ʉnyenye kʉkɨla nanso? Ʉnyenye nimʉkete ʉhʉɨɨlɨ ʉniino.

29 Leki kiaji kɨna mʉkʉlya ntʉni ang’wi mʉkʉng’wa ntʉni. Leki kagɨɨli makani nanso. 30 Kʉnsoko ɨantʉ nɨshanga amʉhʉɨɨe Itunda agigwa nɨmakani nanso. Ingɨ ʉ Tata wanyu nʉa kigʉlʉ ʉlɨngile kɨna mʉmatakile ɨmakani nanso. 31 Ingɨ ʉdumi hanza ʉtemi wang’wi Itunda, nɨ maintʉ aya itɨga mʉkʉpegwa."

32 "Leki kogopi ʉnyenye nɨmɨasheenyʉ, kʉnsoko Ʉtata wanyu ʉsɨgɨɨe kʉmʉpeza Ʉtemi wakwe. 33 Gʉlyi insao yanyu impia nɨmʉkʉlija mʉape ɨaʉla. Tumi imbogoshi ya kuɨkɨɨla mpia nɨshanga yikʉlʉpaala, mʉɨke ɨkɨʉto nɨshanga kɨkepaa kilunde. Kʉng’wanso shanga kɨkiwa, ang’wi kʉgazangɨgwa nʉmʉpwa. 34 Kʉnsoko mʉkɨmolɨ ɨkɨʉto kako, papo nɨnkolo ako ikʉtula ɨmolɨ.

35 Ɨze mihambile kitʉma ɨmɨlɨmo, nimʉli yanyu ɨze yeilye. 36 Anga anyamɨlɨmo nɨamʉlindɨɨe ʉmʉkʉlʉ wao nʉkʉtulya kʉpuma kʉwɨnga, anga watulye nʉkʉpɨndʉla ahume kʉkaya kʉmʉlugʉɨla. 37 Anyamɨlɨmo awo akʉlowa ʉmʉkʉlʉ anga waahange amʉlindɨɨe. Kʉlʉ kʉʉlʉ kʉmʉtambʉɨla, ʉkitunga ngʉo aanyamʉlɨmo ʉkʉaɨla ikii pihɨ nʉnene kʉmʉlɨsa. 38 Anyamɨlɨmo awo akʉlowa mʉkʉlʉ wao nʉkʉahanga ihambile kʉmʉsɨngɨɨlya, palʉng’wi kɨna ʉtulye ʉtikʉ wigengʉ ang’wi dau maniambwa. 39 Mʉlɨnge kɨna, angaɨze mʉkola nyʉmba ʉlɨngile matungo ʉmii nʉkingɨla nʉkʉmiɨla shanga ʉkʉlala ʉtikʉga, hangɨ shanga ʉkʉmileka nyʉmba akwe wiɨlwe. 40 Nʉnyenye ga ihambi, kʉnsoko Ng’waa Mʉntʉ ʉzile itungo nɨshanga mihambile."

41 Petelo akamʉkolya, "Isekʉlʉ, mpyani nanso ʉkʉʉtambʉɨla ʉsese duune, ang’wɨ antʉ ɨhi?"

42 Isekʉlʉ akamʉsʉkɨɨlya, "Nyenyu nɨ mitʉmi nɨ mʉhʉɨɨli hangɨ nɨ mʉnyamahala, nʉ mʉkʉlʉ wakwe ʉkʉmʉɨka wɨmɨɨle ɨnyʉmba akwe nʉkʉapa indya yao kʉ matungo akwe? 43 Yʉkʉtula ilʉmbi kʉ mitʉmi nʉanso nʉmʉkʉlʉ wakwe ʉkʉtulya wamʉhange ʉkʉtenda ʉʉ. 44 Kʉmʉtambʉɨla kʉlʉ kʉʉlʉ mʉkʉlʉ wakwe ʉkʉmʉɨka ʉmitʉmi nʉanso wɨmɨɨli mʉnsao yakwe yɨhi. 45 Ingɨ mitʉmi nʉanso anga wasɨgɨɨle mʉnkolo, Mʉkʉlʉ wane watinia kʉtulya, wandye kʉakʉa itʉmi aʉya, nɨakɨgoha nawa nɨakɨsʉngʉ, kʉnʉ wazelya nʉkʉng’wa nʉkʉgala, 46 ingɨ mʉkʉlʉ wakwe ʉkʉtulya lʉhikʉ nɨshanga ʉsɨgile nɨmatungo nɨshanga ʉine. Mʉkʉlʉ nʉanso ʉkʉmʉpɨsɨɨlya ikʉlʉ, nʉkʉmʉɨka palʉng’wɨ nɨ antʉ nɨabɨ.

47 Mitʉmi ʉyʉ nʉlɨngile mʉkʉlʉ wakwe wɨlowaa watendeʉli nʉyo ingɨ nʉanso wahite kʉtenda anga nʉloilwe, ʉkʉpɨsɨɨligwa ikʉlʉ. 48 Ingɨ mʉntʉ wɨhi nɨshanga ʉlɨngile natakɨwe kitʉng’wa, witʉme makani aʉpɨsɨɨlya, ʉkʉpɨsɨɨligwa iniino. Mʉntʉ wɨhi nʉilihilwe intʉ yɨdʉ ʉkʉdaigwa yɨdʉ, nʉyʉ nʉpewe wɨmɨɨli nʉ mʉntʉ mʉngɨɨza ʉkʉkoligwa nanguluu.

49 "Nzile akɨlya moto mihɨɨ, ndoilwe ɨze wandyaa kakɨla. 50 Nkete lwago lʉbɨ nɨtakiwe kagigwa, kʉnyomeka ikʉlʉ kʉpikɨɨla nʉlʉkʉkondanɨɨla. 51 Leki kʉsɨgi ndetile ʉlowa mihɨɨ? Kʉmʉtambʉɨla shanga ʉʉ, ndetile ʉtemanʉki. 52 Kʉpumɨɨla itungo ɨlɨ, mʉnyʉmba ɨng’wɨ akʉtula akolɨ antʉ ataano nɨshanga akilɨnga kʉnsoko ane, nɨataatʉ akʉtemanʉka nawa nɨabɨɨlɨ ang’wi nɨabɨɨlɨ akʉtemanʉka nawa nɨataatʉ. 53 Ihe akʉtemanʉka nʉng’waakwe, ng’wana akʉtemanʉka nihe, ʉnyinya akʉtemanʉka nʉmʉnanso wakwe, nʉmʉnanso akʉtemanʉka nʉnyinya, mʉkwingwa akʉtemanʉka nʉmʉkʉmʉlɨma, mʉkʉmʉlɨma akʉtemanʉka nʉmʉkwɨng’wakwe."

54 Akaatambʉɨla ʉmilʉndo nʉa antʉ, "Anga mʉone imalunde akilingɨila ipande lang’weli, itungo ʉdu mɨlʉngaa ‘mbula akakʉa, nɨmbula ɨkʉa ɨtaitaai. 55 Anga ng’wega nʉʉkʉkunka kʉpumɨɨla takama, mɨlʉngaa yainaa kɨpasʉ, ʉʉ itulaa, 56 Ʉnyenye nɨmɨateele mɨgozaa malunde nihɨɨ mʉhume kʉmalɨnga ɨmatungo, kʉnɨkɨgwa shanga mʉlɨngile ndogoelyo amakani nakigela itungo ɨlɨ?

57 "Niki mʉlemilwe kʉlamʉla ʉnyenye kitʉma makani atai? 58 Nɨmʉlongoe nʉmʉsemi wako kianza, gema kilɨnga nʉng’wenso nɨmʉkolɨ mʉnzɨla. Waleke kʉʉpikɨɨlya kʉ mʉlamʉli, nʉmʉlamʉli ʉkʉinkɨɨlya kʉmʉmboi, nʉmʉmboi ʉkʉʉlʉgaɨla mʉkadulumu. 59 Kʉlʉ kʉʉlʉ kʉʉɨla shʉʉkʉpuma mʉkadulumu, kʉpikɨɨla nʉʉzɨɨzamala kʉsʉsha impia yɨhi."