1 Yesʉ akaze ʉkete ngulu nia Ng’wahʉ wang’wi Itunda, akahega kʉmongo nʉa Yolodani, akatongwa nʉ Ng’wahʉ wang’wi Itunda kʉlongola kuwɨɨ, 2 kʉng’wanso akatula geng’wa nʉ shetani mahikʉ makʉmi anɨɨ itungo nɨlanso lɨhi shanga aɨʉkendalya anga kɨntʉ, sʉnga akahʉng’wa nzala. 3 Shetani akamʉɨla, "Angaɨze tai ʉewe wɨng’wana wang’wi Itunda lɨpɨʉle igwe ɨlɨ lɨtule lʉdya ʉhume kʉlya."

4 Yesʉ akamʉsʉkɨɨlya, "Iandɨkilwe, ‘mʉntʉ shanga ʉsanilye angandya ʉdu wahume kishiɨ, ʉsanilye lʉkani lang’wi Itunda"’

5 Shetani akamʉtonga kʉmʉtwala kʉpikɨɨla mʉlʉgʉlʉ nʉlʉlɨpu, kitungo lɨng'wɨ akamʉlagɨɨla ʉtemi wɨhi nʉa mʉʉnkʉmbigʉlʉ. 6 Shetani akamʉɨla, "Kʉʉhumya kʉtema ʉtemi ʉwʉ wɨhi nʉʉza wakwe kʉnsoko akolɨ mʉʉhumi wane, nʉnene nihumile kʉmʉpeza wɨhi nɨnʉmʉloilwe. 7 Anga ʉewe ʉkʉnkʉlye ʉnene, maintʉ ayaitɨ ɨhi akʉtula ako."

8 Ingɨ Yesʉ akamʉsʉkɨɨlya, "Hangɨ yandɨkilwe ‘mʉkʉlye Isekʉlʉ Itunda nʉkʉmitʉmɨla ʉng’wenso du."’

9 Shetani akamʉtwala kʉ Yelusalemu, akamʉnankɨlya mʉkilingasiilyo ka Nyʉmba ang’wi Itunda akamʉɨka kʉnsonge, akamʉɨla ʉ Yesʉ, "Ang’wɨ tai ʉewe wɨng’wana wang’wi Itunda, sialɨ igʉme pɨhi kʉpʉmɨɨla apa, 10 kʉnsoko iandɨkilwe, ‘Itunda ʉkʉʉlagɨɨlɨlya Itumi akwe nɨakigʉlʉ akʉake, 11 akʉʉhola mʉmɨkonoao nʉmʉgʉlʉ wako shanga ʉkikʉɨlya migwe"’

12 Ingɨ Yesʉ akamʉsʉkɨɨlya ʉshetani, "Hangi yandɨkilwe, ‘Leka kʉmʉgema Isekʉlʉ Itunda ako"’

13 Shetani naɨwakondya kʉmʉgema ʉ Yesʉ, akamʉleka, akatungɨla itungo nɨlɨgombekile.

14 Sʉnga Yesʉ akatʉlya kʉ Galilaya kʉnʉ waze ʉkete ngulu nia Ng’wahʉ wang’wi Itunda, lʉkumo lakwe lɨkakumʉka mʉ Galilaya nɨmahɨɨ ɨhi nakolɨ pakupɨ. 15 Akatulingɨla Mʉnyʉmba niakʉtankanɨla Ayahudi mʉng’wanso akatula manyisa, antʉ ɨhi naɨamʉtegeeye akamʉlʉmbɨɨlya.

16 Yesʉ akalongola kʉ Nazaleti kɨsalɨ naɨʉkʉɨe, naɨlɨlakapika Lʉhikʉ nʉla Kʉsupya nʉlitangwaa Sabato akingɨla Mʉnyʉmba nakʉtankanɨla Ayahudi anga naɨntendo akwe. Akimɨka wahume kʉsoma. 17 Akapegwa mbugulu nɨandɨkilwe nʉ Isaya mʉmanga wang’wi Itunda, Yesʉ akakunukula paiandɨkilwe.

18 "Ng’wahʉ wang’wi Isekʉlʉ ʉkolɨ mʉng’wane,

kʉnsoko ʉnihoile nɨatanantɨlya ɨahimbɨ Nkani ni Nziza.

Ʉndagɨɨye kʉatanantɨlya ɨatʉng’wa kʉlekelwa kʉng’wao,

nɨapoku ahume kʉona hangɨ,

nʉ kʉalekela awa nɨɨonelwa,

19 hangɨ kʉʉtanantya ng’waka wang’wi Isekʉlʉ nʉʉgombekile."

Nʉang’wi Isekʉlʉ kʉaponya ɨantʉ akwe.

20 Sʉnga akakunikila ɨmbugulu ɨyɨ, akamɨsʉsha akikiɨ. Antʉ ɨhi Mʉnyʉmba akʉtankanɨla Ayahudi akamʉgondoola.

21 Papo akandɨɨlya kʉatambʉɨla, "Nkani izi lelo yapikɨɨla anga naɨmijaa."

22 Antʉ ɨhi akaloeeligwa nʉ Yesʉ, akakʉɨlwa nkani ninziza nʉtambʉe, akikolya, "Ʉyʉ shanga ng’wana wang’wa Yusupu ne?"

23 Yesʉ akaatambʉɨla, "Nɨngile mʉkʉmbɨla ntambʉ ɨyɨ, ‘Mʉlagʉli ilagʉle ʉewe.’ makani ɨhi nanza ʉtendile kʉ Kapelenahumu, itʉme napa mʉkɨsalɨ kako." 24 Yesʉ akatambʉɨɨla, "Ituleʉʉ kʉmʉɨla, mʉmanga shanga wɨkʉligwa nɨantʉ amʉkɨsalɨ kakwe."

25 "Kʉmʉlompa mʉntegeelye, Ingɨ ɨtai kɨna matungo ang’wa Eliya mʉmanga wang’wi Itunda aɨakolɨ asʉngʉ ɨdʉ nɨashɨɨwe nɨagoha ʉko kʉ Isilaeli, ilunde aɨlɨgiɨigwe nɨmbʉla shanga ɨkakʉa kʉ myaka ɨtaatʉ nɨ myeli mʉtandatʉ, lɨkigela izala ikʉlʉ mihɨɨ ɨhi. 26 Nɨitɨga ʉ Eliya shanga aɨʉlagɨigwe kʉasʉngʉ nɨanso nɨashɨɨwe nɨagohaao, akalagɨlɨigwa kʉ mʉsʉngʉ ʉng’wɨ nʉshɨɨwe nʉmʉgoha ʉko kʉ Seleputa mihɨɨ akʉ Sidoni. 27 Hangɨ aɨakolɨ antʉ ɨdʉ naiambʉe mihɨɨ a Isilaeli matungo ang’wa Elisha. Hangɨ aɨikɨlɨ wigele mʉntʉ nʉanambʉ nʉaponigwe, ingɨ ʉ Naamani du mʉnyakʉ Silia."

28 Antʉ ɨhi pa Nyʉmba akʉtankanɨla Ayahudi naɨakija inkani izi akabɨpɨlwa nangaluu. 29 Akimɨka, akamʉamba ʉ Yesʉ akamʉkweha nʉkʉmʉpumya kʉnzi akɨsalɨ, akamʉtwala kɨgɨɨlɨ lalʉgʉlʉ kaɨ kɨzengilwe ɨkɨsalɨ, akamʉpisha migɨɨlɨ la lʉgʉlʉ ahume kʉmʉgʉmɨla. 30 Ingɨ Yesʉ akitʉntʉmɨɨlya akakɨɨla pakatɨ ao akalongola yakweʉ.

31 Sʉnga ʉ Yesʉ akahulumʉka kʉ Kapelenaumu mʉkɨsalɨ ka Galilaya, mʉ Lʉhikʉ nʉla Kʉsupya akatula amanyisa iantʉ. 32 Antʉ akakʉɨlwa ʉmanyisi wakwe, kʉnsoko aɨʉkʉmanyisa kʉʉhumi. 33 Pa Nyʉmba akʉtankanɨla Ayahudi aɨʉkolɨ mʉntʉ ʉkete ahɨng’wɨ, akazogolya nʉkitʉnta wazelunga, 34 "Ʉloilwe kʉʉtenda ʉli Yesʉ mʉnya kʉ Nazaleti? Kʉleke. Itɨɨ ʉzile kʉʉlimansɨɨlyane? Nʉkʉlɨngile ʉewe winyenyu. Ʉewe ingɨ ʉhoilwe kʉnsoko ang’wi Itunda."

35 Ʉʉgwa Yesʉ akamʉkenela uhɨng’wɨ nʉanso, akamʉɨla "Kɨlaga ihɨtwɨ hangɨ hega kʉmʉntʉ ʉyʉ." Ʉhɨng’wɨ akamʉkatʉlya pihɨ ʉmʉntʉ ʉyʉ pantongeela ao ɨhi, akapuma shanga ʉmʉlemaaye.

36 Antʉ ɨhi akakʉɨlwa akitambʉlya, Ʉmanyisi ʉwʉ wakɨnyaʉlɨ? Ʉkʉakenela ɨahɨng’wɨ kʉʉhumi ʉkʉlʉ, nao akʉhega." 37 Lʉkumo lakwe lɨkakumʉka nkɨka yɨhi nihɨɨ nanso.

38 Yesʉ akapuma pa Nyʉmba akʉtankanɨla Ayahudi akalongola kitolang’wa Simioni. Mʉkwing’wa nʉakɨsʉngʉ nʉang’wa Simioni aɨwalwae ikʉlʉ, akamʉlompa ʉ Yesʉ wamʉponyie. 39 Yesʉ akahumbeela pa mʉlwae akaʉtambʉɨla ʉlwae ʉpume kʉ mʉntʉ ʉyʉ, ʉlwae ʉkapuma, Itungo lɨlo lɨɨlo akaʉka nʉkandya kʉatʉmɨkɨla.

40 Lyoa naɨlɨkʉhaɨɨla, antʉ ɨhi naɨakete ɨalwae andwala yɨsa akaaleta alwaeao kʉng’wa Yesʉ, nʉ Yesʉ akakaɨkɨɨlya ihi mikono akaalompeela, akaaponya. 41 Ahɨng’wɨ akapuma mʉalwae nɨanso akaze azogooye nʉkʉlʉnga, "Ʉewe ingɨ Ng’wana wang’wi Itunda."

Yesʉ akaakenela akɨlage, kʉnsoko aɨalɨngile kɨna nʉanso ingɨ Kilisito naiuhoilwe ni Itunda.

42 Mʉdaʉ maniambwa, Yesʉ akikoma wing’wene. Antʉ akatula mʉduma, naɨakamʉona akagema kʉmʉgiɨlya waleke kʉhega.

43 Ingɨ ʉ Yesʉ akaatambʉɨla, "Ntakɨwe kʉtanantya Nkani Nziza nia ʉtemi wang’wi Itunda mʉisalɨ ingɨɨza, kʉnsoko wʉwʉ mʉlɨmo aɨntʉmilwe ni Itunda nitʉme."

44 Itigwa akalongoleka kʉtanantya Pa Nyʉmba niakʉtankanɨla Ayahudi niya kʉ Yʉdea.