1 Mahikʉ nanso Agusito Mʉtemi nʉa Alʉmi akatanantya kɨna antʉ ɨhi mʉmahɨɨ aʉtemi wakwe aaligwe. 2 Ʉaligwa ʉwʉ aɨwakwandya kitʉng’wa matungo ʉ Kilenio naɨmʉtongeeli mihɨɨ akʉ Silia. 3 Antʉ ɨhi akalongola kʉaligwa mʉisalɨ yao naɨatungɨwe.

4 Yusupu akapuma kʉkɨsalɨ ka Nazaleti nɨkɨkolɨ kʉ Galilaya, akalongola kʉ Betelehemu mʉkɨsalɨ ka Yʉdea kaɨʉtugɨwe ʉ Daudi. Kʉnsoko ʉ Yusupu aɨwandʉgʉ ang’wa Daudi. 5 Yusupu nʉ Maliamu kʉnsoko aɨʉmʉligilye aɨendile kʉng’wanso aaligwe palʉng’wɨ, ʉ Maliamu aɨmʉlito. 6 Naɨakɨlɨ akolɨ kʉ Betelehemu, itungo nɨla kitungʉɨla ʉ Maliamu lɨkapika. 7 Maliamu akitungʉɨla tangi akwe nʉakɨgoha. Akamʉimba ngʉo aana nɨadabu akamʉlalya milinga nɨlakʉlɨsɨlya ɨmɨtugo, kʉnsoko aɨaʉiye ɨlyoma Mʉnyʉmba niakʉlala ɨazɨɨla.

8 Pang’waso aɨakolɨ pakupi niadɨma nkolo naɨakʉsʉnja imɨtugo ao ʉtikʉ. 9 Pumpulugu, mitʉmi nʉakigʉlʉ nʉang’wi Itunda akaeigela kʉng’waao, ʉmɨlɨgintu wang’wi Isekʉlʉ ʉkelya mpande yɨhi, adɨmi ɨhi akogopa nangalu, 10 ingɨ ʉmitʉmi nʉakigʉlʉ nʉang’wi Itunda akaatambʉɨla ɨadɨma nkolo, "Leki kogopi, nʉmʉletee mpola nziza niikʉleta ʉlowa ʉkʉlʉ kʉantʉ ɨhi. 11 Kʉnsoko lelo ɨyɨ mʉkɨsalɨ kang’wa Daudi ʉtugilwe Mʉponyi, ingɨ Kilisito Isekʉlʉ. 12 Kɨlɨngasɨɨlyo kanyu kɨkatula sɨkɨ, mʉkʉmʉhanga ng’wana mʉdabʉ ʉlalɨshigwe milinga lakʉlɨsɨlya mɨtugo nʉkʉimbwa ngʉo akʉimbɨla ana nɨadambʉ."

13 Pumbulugu iumbɨ ikʉlʉ nɨla itʉmi akigʉlʉ nɨang’wi Itunda likigela likihangʉɨla nʉmitʉmi nʉa kigʉlʉ nʉang’wi Itunda nʉakwandya akitʉnta azemʉkʉlya Itunda azelʉnga.

14 "Itunda nʉakʉligwe nʉkolɨ migʉlya ikʉlʉ kigʉlʉ

nʉmihɨɨ itule nʉʉpolo kʉantʉ nʉagombile."

15 Itʉmi akigʉlʉ nɨang’wi Itunda naɨaaleka nʉkʉlongola kigʉlʉ, adɨma mɨtugo akitambʉlya ɨenso akalʉnga, "Siali kwendi kʉkɨsalɨ ka Betelehemu kende kilolenkeele ikani ɨlɨ nɨlaʉkʉɨlwa nɨlɨpumɨe, nɨkʉɨɨwe ni Isekʉlʉ."

16 Ʉʉgwa adɨma mɨtugo akipatɨɨlya akalaongola kʉ Betelehemu, ɨkaahanga ʉ Yusupu nʉ Maliamu palʉng’wɨ nʉng’wana nʉmʉdabʉ ʉlaigwe milinga nɨlakʉlɨsɨlya mɨtugo. 17 Adɨma nkolo naɨamʉona ʉng’wana, akandya kʉtanantya inkani niyang’wana naɨatambʉɨwe nʉ mitʉmi nʉakigʉlʉ nʉang’wi Itunda. 18 Antʉ ɨhi naɨigulye akakʉɨlwa inkani niitambʉwe nɨadɨma nkolo. 19 Ingɨ ʉ Maliamu akatunga mʉnkolo akwe ɨmakani aya kʉnʉ wazemasɨganɨɨlya. 20 Adɨma nkolo akatʉlya kʉwii, kʉnʉ akazemʉkʉlya nʉkʉmʉlʉmbiilya Itunda, kʉmakani ihi naɨatambʉɨwe nʉmitʉmi nʉakigʉlʉ nʉang’wi Itunda nʉkilolenkeela.

21 Mʉlʉhikʉ nʉla mʉnana, akamʉtwala ʉng’wana kɨganda, nʉkʉmʉta ɨlina Yesʉ, lina ʉ Maliamu naɨʉtambʉɨwe nʉmitʉmi nʉakigʉlʉ nʉang’wi Itunda apo naɨwakɨlɨ kʉʉsha ɨmɨligo.

22 Mahiku akɨzʉmba naiakila Maliamu akielya anga ntendo niilagɨɨye mʉmalagɨɨlyo ang’wa Musa, Yusupu nʉ Maliamu akamʉtwala ʉng’wana kʉ Yelusalemu kʉmʉpumya kʉng’wi Itunda. 23 Anga niandɨkilwe mʉmalagɨɨlyo ang’wi Itunda kɨna, "Ʉng’wana nʉakɨgoha wɨhi nɨtangi wapumigwe kʉng’wi Itunda." 24 Hangɨ aɨapumilye ipolyo, nkʉlʉ ibɨɨlɨ, ang’wi ana nkʉnda abɨɨlɨ, anga niilagɨigwe mʉmalagɨɨlyo ang’wi Isekʉlʉ. 25 Matungo nanso mʉkɨsalɨ ka Yelusalemu aɨʉkolɨ mitʉnja ʉng’wɨ ɨlina lakwe Simioni naɨza mʉntʉ nʉalwijo, hangɨ aɨʉgombekile kʉng’wi Itunda. Mʉntu naɨʉsʉmbɨɨye kʉkomolwa kʉ Aisilaeli, nʉyo aɨwɨpalʉng’wɨ Ng’wahʉ wang’wi Itunda. 26 Ng’wahʉ wang’wi Itunda aɨʉmʉkamɨnkɨɨye mʉmɨloto kɨna shanga ʉkʉsha kʉpikɨɨla wamʉone ʉ Kilisito nʉhoilwe ni Isekʉlʉ 27 Ng’wahʉ wang’wi Itunda akamʉtonga ʉ Simioni akalongola panyʉmba ang’wi Itunda. Aleli naɨamʉleta ʉ Ng’wana ʉ Yesʉ ahume kʉmʉtendeela anga niitakɨwe mʉmalagɨɨlyo, 28 papogwa ʉ Simioni akamʉhola ʉng’wana mʉmɨkono akwe nʉkʉmʉkʉlya Itunda, wazelʉnga,

29 "Isekʉlʉ Mʉnyangulu, anga naɨʉlapile,

itungo ɨlɨ wamʉgombyaa ʉmitʉmi nʉako wende kʉ atataakwe kʉʉziza.

30 Kʉnsoko kumiho ane nilolenkeela ʉponyi wako,

31 nʉaʉɨka pantongeela aantʉ ɨhi.

32 Nzelya nɨɨkelya kʉantʉ nɨshanga Ayahudi,

nʉʉkʉlʉ kʉantʉ ako Aisilaeli."

33 Aleli ang’wana aɨakendakʉɨlwa ɨmakani nakʉtambʉlwa kʉng’wana. 34 Ʉʉgwa ʉ Simioni akaakembeta, akamʉtambʉɨla ʉ Maliamu nyinya wang’wa Yesʉ, "Ʉng’wana ʉyʉ ʉɨkilwe nɨ Itunda kisɨgo nɨla kʉagwɨsa ang’wi kʉaponya antʉ ɨdʉ mʉ Isilaeli. Nʉanso ʉkʉtula kɨlɨngasɨɨlyo kang’wi Itunda nʉkʉhitwa nɨantʉ ɨdʉ, 35 ingɨ masɨgo na antʉ ɨdʉ akʉkumʉʉlwa. Nʉewe ʉkʉtula nʉʉkɨa ʉkʉlʉ anga ʉwai wapanga nʉʉkʉawa mʉnkolo ako."

36 Mʉng’wanso Mʉnyʉmba ang’wi Itunda aɨʉmolɨ mʉsʉngʉ ʉng’wɨ mʉgʉmba mʉmanga wang’wi Itunda, lina lakwe Ana ng’wana wang’wa Pwanueli nʉa ndʉgʉ ang’wa Asheli. Mʉsʉngʉ ʉyʉ akazeʉtɨnilwe nʉkikala kʉmyaka mʉpungatɨ ʉdu akashɨlwa nʉmʉgoha wakwe. 37 Sunga aɨwikae mʉʉshɨlwa kʉmyaka makʉmi mʉnana nainnɨ. Matungo nanso ɨhi shanga aɨwɨhega panyʉmba ang’wi Itunda ingɨ wazemʉkʉlya Itunda kʉnʉ azewɨgwalya kʉlya nʉkʉmʉlompa ng’ʉng’wɨ nʉʉtikʉ. 38 Itungo lɨlo lɨɨlo Ana akigeela paa Yusupu nʉ Maliamu, nʉkandya kʉmʉkʉlya Itunda, nʉkʉganʉla makani ang’wana kʉantʉ ɨhi naɨamʉsʉmbɨɨye Itunda wakomole ɨantʉ akʉ Yelusalemu.

39 Yusupu nʉ Maliamu naɨakondya kitʉma intendo yɨhi anga niilagɨigwe mʉmalagɨɨlyo ang’wi Isekʉlʉ Itunda, akatulya kitolao kʉ Nazaleti, kʉkɨsalɨ ka Galilaya. 40 Nʉng’wana, ʉ Yesʉ akalongoleka kʉkʉla nʉ kʉlija ingulu nɨmahala nʉʉkende wang’wi Itunda aɨʉkolɨ kʉng’waakwe.

41 Yusupu nʉ Maliamu aleli ang’wa Yesʉ myaka ɨhi aɨza akete wɨda wakʉlongola kʉ Yelusalemu matungo iloeelya nɨla Pasaka. 42 Yesʉ naɨwapisha myaka ikʉmi naɨbɨɨlɨ, akalongolanya nɨaleli akwa kiloeelya anga naɨwɨda wao. 43 Naɨ amalɨnkɨɨla iloeelya, Yusupu nʉ Maliamu akaze akolɨ mʉnzɨla agomokile kitolao, ingɨ ʉmʉhʉmba Yesʉ akasaga kʉ Yelusalemu ɨaleli akwe shanga akaze alɨngile. 44 Aleli aɨasɨgile kɨna ʉng’wana ʉkolɨ palʉng’wɨ nɨanyamʉhɨnzo aʉya. Akagenda pii ng’ʉng’wɨ wɨhi, kʉnsoko shanga aɨakendamʉona akatula mʉduma mʉanyandʉngʉ nʉ mʉahʉmbaʉya. 45 Naɨamʉʉlya, Yusupu nʉ Maliamu akatulya kʉ Yelusalemu endemʉdumɨla kʉko. 46 Lʉhikʉ nʉlakataatʉ akamʉona Pa Nyʉmba ang’wi Itunda, wikiɨ pakatɨ aamanyisi, ʉategeeye nʉkʉakolya makolyo. 47 Awa ɨhi naɨategeeye inkani yakwe aɨakʉɨwe kʉona ʉkete mahala nʉʉhumi ʉkʉlʉ nʉakʉlɨnga nʉkʉsʉkɨɨlya. 48 Yusupu nʉ Maliamu naɨamʉona akakʉɨlwa. Ʉnyinya akamʉkolya, "Ng’waane nɨkɨ nʉakʉtendeela itɨ? Goza ʉnene nʉtataako kainakʉduma kʉnʉ kogopile."

49 Yesʉ akaakolya, "Kʉnɨkɨ mʉkʉnduma? Shanga mʉlɨngilene kɨna ʉnene ntakɨwe kishiɨ Pa Nyʉmba ang’wa Tataane?" 50 Aleli akwe shanga akalʉlɨnga ʉlʉkani nʉatambʉɨe.

51 Sʉnga akalongolania nɨenso kʉ Nazaleti, nʉng’wenso aɨʉkete lwijo kʉaleli akwe. Ingɨ ʉnyinya akamaɨka ɨmakani aya ɨhi mʉnkolo akwe. 52 Nʉng’wenso Yesʉ akakʉla nʉkongeeleka kukula kimuili nɨmahala, aze ʉmʉloeeye Itunda nɨantʉ.