1 Yesʉ akakendegeela iza, akaaona ɨagolɨ akʉɨkɨla masongelyo ao mʉkɨseme kamasongelyo Mʉnyʉmba ang’wi Itunda, 2 akamʉona nʉ mʉsʉngʉ ʉng’wɨ mʉʉla nʉshɨɨwe nʉmʉgoha ʉkʉɨkɨla mʉmo isongelyo mʉkɨseme senti ibɨɨlɨ. 3 Itɨ gwa Yesʉ akaaɨla, "Kʉlʉ kʉʉlʉ kʉmʉɨla, mʉsʉngʉ ʉyʉ nɨ mʉʉla hangɨ nʉshɨɨwe nʉmʉgoha, ʉɨkɨe yɨdʉ mʉkɨseme ka masongelyo kʉkɨla antʉ ɨhi nɨaɨkɨe. 4 Kʉnsoko antʉ ang’wi apumilye isongelyo kʉpuma mʉʉsigo nʉasailo niyao, ingɨ ʉmʉsʉngʉ ʉyʉ kʉnsoko aɨmʉʉla ʉpumilye yɨhi niyakʉmʉaɨɨlya mʉlikalo lakwe."

5 Amanyisigwa ang’wi akatula mɨtambʉla Nyʉmba ang’wi Itunda, kʉitɨ nɨlɨzengilwe kʉmagwe ansaɨlo nkulu naɨanoneeye ɨ Nyʉmba ang’wi Itunda, palʉng’wɨ nɨmasongelyo naɨ apumigwe kʉng’wi Itunda. Yesʉ akalʉnga, 6 "Aya itɨ ɨhi nɨmʉkʉmaona apa, mahikʉ akʉpika yɨkʉtula kʉtilɨ igwe nɨlɨkasagɨɨla migʉlya alʉlya, maintʉ ɨhi akʉkumʉlwa nʉ kʉgʉng’wa kʉnzi."

7 Ʉʉgwa antʉ akamʉkolya ʉ Yesʉ, "Mʉmanyisi, Makani aya nʉkumatambʉla nali akʉpumɨla, kɨlɨngasiilyo kɨɨ nikikʉlagɨɨla kɨna yahumbeela kʉpumɨla ɨmakani nanso?"

8 Yesʉ akaasʉkɨɨlya, "Hʉgʉki mʉleke kʉkongwa. Kʉnsoko antʉ ɨdʉ akʉpembya kʉlina lane, azidaya kɨna ‘Ʉnene nɨ Kilisito,’ mʉlɨnge kɨna, ‘matungo nanso ahumbeela,’ ingɨ Ʉnyenye leki kʉatyati nɨanso. 9 Ʉʉgwa anga mije inkani niyambita nʉminyomo, leki kogopi, kʉnsoko maintʉ nanso atakɨwe apumile hanza, ʉgeelo nʉa maintʉ ɨhi ʉkʉtula ʉkɨlɨ."

10 Sʉnga Yesʉ akalongoleka kʉtambʉla, "Antʉ ihɨɨ ɨng’wɨ akʉlongola kikʉa nɨantʉ ihɨɨ nzʉya, hangɨ antʉ aʉtemi ʉng’wɨ akʉlongola kikʉa nɨantʉ aʉtemi ʉya. 11 Yʉkʉtula nɨmɨtentemo mɨkʉlʉ mihɨɨ, yɨkigela nzala nɨmalwae akilekeelya mʉ mahɨɨ ɨhi. Yikʉtula ɨkolɨ mɨʉkʉɨlwa akogopya niilɨngasiilyo ikʉlʉ kʉpumɨɨla kilunde. 12 Ingɨ azeakɨlɨ kʉpumɨla aya ɨhi, akʉmʉamba, akʉmaja akʉmutwala mʉlamʉlwe mʉnyʉmba niyakʉtankanɨla Ayahudi, akʉmʉtunga mʉkadulumu, hangɨ akʉmʉtwala kʉatemi nɨakʉlʉ kʉnsoko mʉnihʉɨɨe ʉnene, 13 ingɨ kʉng’waanyu ʉkʉtula ʉkʉɨɨli wanyu kʉng’waao. 14 Ingɨ leki kogopi, nʉkʉsigɨɨla mʉkʉtambʉla ʉlɨ, 15 kʉnsoko ʉnene kʉmʉlɨngasa inkani niyamahala niyakʉtambʉla, ingɨ alʉgʉ anyu shanga akʉmʉlemya nʉkʉmʉkʉnguma ʉnyenye. 16 Ʉnyenye mʉkʉpɨlʉkwa nɨaleli anyu nɨaluna anyu nɨanyandʉgʉ anyu nɨahʉmba ɨanyu, nɨang’wi anyu mʉkʉbʉlagwa. 17 Antʉ ɨhi akʉmʉbɨpɨlwa kʉnsoko mʉnihʉɨɨe nene. 18 Ingɨ Itunda ʉkʉmʉsʉnja shanga mʉkʉhangwa nʉʉbi wɨhi mʉlikalo lanyu, hangɨ nkolo yanyu yɨkʉtula ikolɨ iza ɨkalɨ na kalɨ. 19 Ingɨ ʉyo nʉkʉgimya, ʉkʉtula nʉ ʉpanga nʉa kalɨ na kalɨ.

20 "Anga mʉone kɨsalɨ ka Yelusalemu kapɨlɨmikɨɨligwa nɨanyambita aalʉgʉ, ʉʉgwa mʉlɨnge kɨna mahikʉ akʉkumʉlwa ɨkɨsalɨ nɨkanso apikaa. 21 Pang’wanso ɨantʉ nɨamolɨ kʉ Yʉdea amankɨɨle mʉmalʉgʉlʉ, nawo nɨamolɨ mʉkɨsalɨ ka Yelusalemu apume kʉnzi, nawo nɨamolɨ kʉmɨgʉnda aleke kingɨla mʉkɨsalɨ. 22 Kʉnsoko mahikʉ nanso akʉtula aʉpɨsɨɨlya, ingɨ kʉkondanɨɨlya ɨhi naandɨkilwe. 23 Akaga ikʉlʉ asʉngʉ nɨalito nawa nɨakonsha mʉmahikʉ nanso. Kʉnsoko yʉkʉtula nʉlwago lʉkʉlʉ mihɨɨ ɨhi, nikuo lang’wi Itunda lɨkʉahanga ɨantʉ ihɨɨ a Yʉdea. 24 Nɨang’wɨ akʉbʉlagwa kʉtemangwa apanga nɨang’wɨ akʉholwa ʉtʉʉng’wa mʉ mahɨɨ ɨhi, kɨsalɨ ka Yelusalemu kɨkʉteng’wa nɨantʉ nɨshanga Ayahudi, kʉpikɨɨla itugo nɨla antʉ nɨanso kʉtema nɨlɨkʉhila.

25 "Yʉkʉtula niilɨngasɨɨlyo mʉlyoa nʉ mʉng’weli nʉ mʉnzota. Yʉkʉtula nʉmʉlulumo nɨmaɨngʉ mʉlʉzɨ nʉlʉkʉlʉ, nɨantʉ a mihɨɨ ɨdʉ akʉnyong’wa nʉkogopa. 26 Antʉ akʉkatapa kʉnsoko awoa, aze asʉmbɨɨye ɨmakani nakʉʉhanga ʉʉnkumbigʉlʉ, kʉnsoko ngulu nia kilunde yʉkʉhingɨsigwa. 27 Mʉmatungo nanso mʉkʉmona ʉnene Ng’waa Mʉntʉ mpembilye mʉmalunde, nɨze nkete ngulu nʉʉmɨlɨgɨntu ʉkʉlʉ. 28 Matungo makani aya nakandya kʉpumɨla, imɨki ize mikaminyangile, kʉnsoko ʉponyi wanyu wahumbeela."

29 Sʉnga Yesʉ akaaɨla ɨamanyisigwa akwe mpyani ɨyɨ, "Siʉgozi kɨsa mʉkʉyʉ nɨmɨtɨ mɨngɨɨza ɨhi. 30 Anga mʉone andya kʉtegeta matʉtʉ, mɨlɨnga kɨna ɨhongola apika. 31 Itɨ ʉʉ anga mandye kʉona ɨmakani aya akigela, mʉkʉlɨnga kɨna ʉtemi wang’wi Itunda wahumbeela.

32 "Kʉmʉɨli ɨtai, antʉ nɨiele nɨakʉona makani aya shanga akʉkɨla ihɨ kʉpikɨɨla ɨmakani aya ɨhi apumɨle. 33 Lʉhikʉ lʉng’wɨ Igʉlʉ nihɨɨ shanga yʉkigela hangɨ, ingɨ nkani yane yʉkʉtula ikolɨ mahikʉ ɨhi.

34 "Hʉgʉki, nkolo yanyu ileke kʉlemeeligwa nʉ ʉlaku ang’wɨ ʉgala ntʉli ang’wɨ ʉnyomeki nʉa likalo ʉlʉ. Shanga ʉʉ, lʉhikʉ ʉlʉ lʉleke kʉmʉhanga ʉnyenye shanga ɨze mihambile, anga ʉmʉmpeto nʉɨambisa. 35 Itɨ ʉʉ lʉhikʉ nʉlanso lʉkʉazɨɨla antʉ ɨhi nɨishiɨ mihɨɨ ɨhi. 36 Hʉgʉki nʉkʉlompa mahikʉ ɨhi mʉhume kʉlija ingulu niyakʉkɨla iza mʉmakani ɨhi nɨɨkapumɨla, mʉhume kimɨka pantongeela a Ng’waa Mʉntʉ."

37 Mahikʉ ɨhi ʉng’ʉng’wɨ, Yesʉ aɨwɨmanyisa Mʉnyʉmba ang’wi Itunda, nɨ mpɨndɨ aɨ wɨlongolaa mʉlʉgʉlʉ nʉa mɨzeituni aɨwɨtula kʉko ʉtikʉ ga. 38 Anga wele ʉdu aɨwɨzaa Mʉnyʉmba ang’wi Itunda, nɨantʉ ɨhi aɨiandɨɨla akalongola kʉmʉtegeelya.