1 Sʉnga ʉ Yesʉ akaatambʉɨla amanyisigwa akwe, "Maintʉ nakʉmʉsasha mʉntʉ witʉme mɨlandʉ akigela, ʉkaga mʉntʉ ʉyʉ nʉkʉsasha mʉntʉ witʉme mɨlandʉ. 2 Yɨkʉtula bahu mʉntʉ ʉyʉ watungɨɨlɨgwe lwala nʉlʉkʉlʉ mʉnkingo akwe wagʉmɨlwa mʉlʉzɨ nʉlʉkʉlʉ, kʉkɨla kʉmʉsasha mʉng’enya wɨhi mʉniino witʉme mɨlandʉ. 3 Kʉlʉlo hʉgʉki.

"Mʉnyandʉgʉ wako anga watenda mʉlandʉ, mʉkenele, anga wila itʉnʉ, mʉlekele ʉmʉlandʉ wakwe. 4 Anga wakʉtendeele mʉlandʉ nkʉa mʉpungatɨ mʉlʉhikʉ lʉng’wɨ, nʉng’wenso wakʉhange nkʉa mʉpungatɨ wazekʉɨla, ‘Nilaa itʉnʉ,’ mʉlekele ʉmʉlandʉ wakwe."

5 Itʉmi akamʉɨla ʉ Yesʉ, "Isekʉlʉ kongeelye ʉhʉɨɨlɨ."

6 Yesʉ akasʉkɨɨlya, "Anga azaize mʉkete ʉʉhʉɨɨlɨ ʉniino anga mbeʉ nɨ niino na mʉtɨ nʉa haladali, mʉhumile kʉʉlagɨɨlya mʉkʉyʉ ʉwʉ, ‘nomooka apaitɨ wende witemele mʉlʉzɨ nʉlʉkʉlʉ,’ mʉkʉyʉ aza ʉziija.

7 Yesʉ akalʉnga "Anga itule ʉng’wɨanyu ʉɨkete mʉnyamɨlɨmo ʉkʉlɨma mʉ mʉgʉnda ang’wi ʉkʉdɨma nkolo. Anga wakotoke. Itɨɨ, mʉkʉlʉ wakwe ʉkʉmʉɨlane ʉmʉnyamɨlɨmo pepala nzʉʉ ʉlye indya? 8 Itɨɨ, shanga ʉkʉmʉɨlane ʉmʉnyamɨlɨmo, ‘Ʉnoneelelye indya, ndye. Ihambe, ʉnoneelelye niyakʉlya nʉkʉng’wa, nʉewe ʉkʉtyatɨɨla kʉlya.’ 9 Itɨɨ, ʉkʉmʉlʉmbane mʉnyamɨlɨmo nʉanso kʉnsoko witʉmɨle aya nʉlagɨɨgwe kitʉma? 10 Iti ʉʉ nʉnyenye ga, anga mʉkondye kitʉma ɨhi nɨmʉlagɨɨgwe, lʉngi, ‘Ʉsese kɨanyamɨlɨmo nɨkɨagila anga nsailo, kitʉmile anga naza kʉlagɨigwe kitʉma."’

11 Yesʉ akaze ʉkolɨ mʉmʉhɨnzo ʉlongoe kʉ Yelusalemu aɨ ʉkɨɨe mʉmɨmbɨ niya Samalia nɨ Galilaya. 12 Naɨ wandilye kingɨla mʉkɨsalɨ kɨng’wɨ, anyambili ikʉmi akatankana nʉng’wenso, akimɨkɨla kʉli. 13 Akitʉnta, akalʉnga, "Isekʉlʉ, Yesʉ kʉaisɨɨlye!"

14 Naɨ waaona akaaɨla, "Longoli miambye kʉapolyi." Ʉʉgwa naɨ alongoe, akela ɨmbili ao nʉkʉgombeka kʉntendo ipolyo. 15 Ʉng’wɨao naɨ wiona kɨna welaa imbili akwe, akatʉlya kʉng’wa Yesʉ akazitʉnta nʉkʉmʉkʉlya Itunda. 16 Akagwa ʉundaala pamɨgʉlʉ ang’wa Yesʉ waze mʉlʉmba. Mʉntʉ ʉnyʉ ingɨ aɨ Mʉsamalia. 17 Papo Yesʉ akamʉkolya, "Itɨɨ, shanga nɨeilye antʉ ɨhi ikʉmi? Awa nɨkenda akolɨ pɨɨ? 18 Kʉtilɨne nʉmʉngɨɨza nʉsʉkile kʉmʉkʉlya Itunda, ingɨ wasʉka ʉmʉnzɨɨla yʉyʉ du?" 19 Sʉnga Yesʉ akamʉɨla mʉntʉ ʉyʉ naɨ welaa, "Imɨke ʉlongole kitolako, ʉhʉɨɨlɨ nʉako wakʉkomya."

20 Itungo lɨng’wɨ, Apalisayo akamʉkolya ʉ Yesʉ, "Ʉtemi wang’wi Itunda ʉzile nalɨ?" Yesʉ akaasʉkɨɨlya, "Ʉtemi wang’wi Itunda shanga ʉzile ize wigeelekile. 21 Hangɨ kʉtilɨ nʉkʉlʉnga, ‘Ʉkolɨ apa itɨ,’ ang’wi ‘Ʉkolɨ apo itɨ.’ Kʉnsoko ʉtemi wang’wi Itunda ʉmolɨ mʉng’wanyu."

22 Sʉnga akaatambʉɨla amanyisigwa akwe, "Itungo lɨpembilye nɨmʉkʉhʉng’wa nsʉla mʉone hangɨ lʉhikʉ lʉng’wɨ nʉla mahikʉ ane Ng’waa Mʉntʉ, ingɨ shanga mʉkʉmona. 23 Hangɨ antʉ akʉmʉɨla. ‘Gozi, ʉkolɨ apo itɨ.’ Ang’wɨ ‘Gozi ʉkolɨ apa itɨ.’ Ingɨ ʉnyenye leki kʉpumi pamʉkolɨ ang’wɨ leki kʉatyati. 24 Kʉnsoko anga lʉpɨto nʉlɨpɨta nʉkelya ilunde ipande lɨng’wɨ nipande lʉlya, ʉʉ ʉnene Ng’waa Mʉntʉ kʉtula mʉlʉhikʉ lane. 25 Ingɨ ntakɨwe ʉnene Ng’waa Mʉntʉ nagigwe hanza nʉkʉhitwa nɨantʉ iele ɨlɨ.

26 "Anga naɨ yɨlɨ mʉ mahikʉ ang’wa Nuhu, yʉkʉtula ʉʉ mʉ mahikʉ ane Ng’waa Mʉntʉ. 27 Mʉmahikʉ ang’wa Nuhu antʉ aɨ alongolekile kʉlya nʉkʉng’wa, kʉtɨna nʉkʉtɨnwa kʉpikɨɨla lʉhikʉ ʉ Nuhu naɨ wingɨe mʉsapina. Kɨhʉmo ka mbula nkʉlʉ akapumɨla nʉkʉlimansɨɨlya intʉ yɨhi. 28 Anga naɨ itulɨkile mʉmatungo ang’wa Loti. Antʉ aɨ alongolekile kʉlya nʉkʉng’wa, kʉgʉla kʉgʉlya, kʉlima nʉkuzenga. 29 Ingɨ ulʉhikʉ ʉ Loti naɨ ʉhegile kʉ Sodoma, moto nʉa kibiliti kʉpuma kilunde yɨkahunʉka anga mbula nʉ kʉalimansɨɨlya ɨhi. 30 Iti ʉʉ yʉkʉtula ʉlʉhikʉ ʉlo nʉla nene Ng’waa Mʉntʉ nɨkigeela.

31 "Lʉhikʉ nʉlanso, mʉntʉ wɨhi nʉkolɨ kitembe nʉaleke kʉsima kingɨla mʉnyʉmba kʉhola maintʉ akwe. Nʉyʉ nʉkolɨ kʉmʉgʉnda waleke kʉtulya kito kʉhola maintʉ akwe. 32 Kɨmbʉkɨɨlyi naɨ amʉhangɨle mʉsʉngʉ wang’wa Loti. 33 Kʉnsoko mʉntʉ wɨhi nʉloilwe kʉponia ʉlikalo lakwe, ʉkʉlʉlimɨlya, ingɨ ʉyʉ nʉkulimɨlya ʉlikalo lakwe kʉnsoko ane ʉkiponia. 34 Kʉmʉtambʉɨla, lʉhikʉ nʉlanso ʉtikʉ antʉ abɨɨlɨ akʉtula alae ʉlɨlɨ ʉng’wɨ, ʉng’wɨ ʉkʉholwa nʉmʉya ʉkʉlekwa. 35 Asʉngʉ abɨɨlɨ nɨakʉsia palʉng’wɨ mʉlwala, ʉng’wɨ ʉkʉholwa nʉmʉya ʉkʉlekwa." 36 Itʉnja abɨɨlɨ akʉtula akolɨ mʉ mʉgʉnda, ʉng’wɨ ʉkʉholwa nʉmʉya ʉkʉlekwa.

37 Papo amanyisigwa akwe akamʉkolya, "Isekʉlʉ makani aya akʉpumɨla pii?"

Yesʉ akaasʉkɨɨlya, "Nʉʉkolɨ mʉimba wakɨkalɨ, papo indi yʉkilingɨɨlɨla."