1 Lʉhikʉ nʉliloeelya, nʉla kʉlya mɨkate nɨshanga ɨgahɨigwe, nʉlitangwa pasaka aɨ lahumbeela. 2 Apolyi nɨakʉlʉ nɨamanyisi amalagɨɨlyo ang’wa Musa akatula duma nzɨla akʉmʉbʉlaga ʉ Yesʉ, aɨituma nɨlanso kʉ kɨnkunku kʉsoko aɨ aogopile antʉ.

3 Papo gwa ʉ Shetani akamingɨɨla ʉ Yʉda mʉntʉ kʉpuma kʉ Kaliote, ʉng’wɨao mʉ itʉmɨ ikʉmi na abɨɨlɨ nɨang’wa Yesʉ. 4 Yʉda akalongola akigombya nɨapolyi nɨakʉlʉ nɨasʉnja Nyʉmba ang’wi Itunda itɨ nʉɨkamʉsʉɨpa ʉ Yesʉ. 5 Antʉ awa akiloa ikʉlʉ, akigombya kʉmʉpa mpia. 6 Yʉda akagomba, akatula duma lyoma niza nɨla kʉmʉsʉɨpa ʉ Yesʉ itungo nʉɨmʉtilɨ mʉmilʉndo nʉa antʉ.

7 Papo gwa naɨlapika Iloeelya nʉla kʉlya Mɨkate nɨshanga igahɨigwe. Lʉhikʉ nʉlanso lʉlo nʉla kʉsɨnzwa ʉ ng’waa nkolo nʉa pasaka. 8 Yesʉ akaalagɨɨlya ɨa Petelo nʉ Yohana, wazeaɨla, "Longoli mʉnoneelye ndya niya pasaka kʉlye."

9 Petelo nʉ Yohana akamʉkolya, "Ʉloilwe kʉnoneelelye pɨɨ?"

10 Yesʉ akaaɨla, "Tegeelyi! Anga mingɨle mʉkɨsalɨ, mʉkʉmʉpantɨka mʉntʉ ʉkenkile ntʉnda amazɨ. Mʉtyati mingɨle mʉnyʉmba nʉɨkingɨla. 11 Mʉɨli ʉ mʉkola nyʉmba nanso, ‘Mʉmanyisi ʉkʉkolya kɨkolɨ pɨɨ kɨanda mʉnikalɨla ɨpasaka palʉng’wɨ nɨamanyisigwa ane?’ 12 Mʉntʉ nʉanso ʉkʉmʉlagɨɨla kɨanda kɨkʉlʉ migolopwa. Noneelelyi mʉmo."

13 Ʉʉgwa, akalongola akahanga maintʉ ɨhi atʉile anga naza atambʉɨwe nʉ Yesʉ, akanoneelya ɨpasaka.

14 Itungo lakʉlya naɨlapika ʉ Yesʉ akikiɨ walye ndya palʉng’wɨ nɨ itumi akwe. 15 Akaaɨla, "Nkete nsʉla ndye ɨpasaka palʉng’wɨ nʉnyenye nɨnkɨlɨ kagigwa. 16 Kʉnsoko kʉmʉɨla, shanga kʉlya hangɨ pasaka kʉpikɨɨla Itunda nʉʉkʉtula waakomola antʉ akwe nʉkʉatema."

17 Sʉnga naɨ wahola kɨkombe nɨkɨkete dibai, akamʉlʉmbɨɨlya Itunda, akalʉnga, "Holi ɨkɨkombe mʉumbane mɨhi. 18 Kʉnsoko kʉmʉɨli, shanga kʉmɨng’wa hangɨ ɨdibai a nkalɨ a zabibʉ kʉpikɨɨla ʉtemi wang’wi Itunda nʉʉzɨɨza." 19 Sʉnga Yesʉ akahola mʉkate, akamʉlʉmba Itunda, akaʉega, akaapa itʉmi wazelʉnga, "Ʉwʉ ingɨ mʉɨlɨ wane nʉʉpumigwe kʉnsoko anyu. Tendi ʉʉ mʉze mʉnkɨmbʉkile." 20 Naɨ akondya kʉlya akatenda ʉʉ akahola kikombe kadibai, wazelʉnga, "Dibai ɨyɨ mʉkikombe ingɨ ilago nipya nɨlɨkitʉng’wa mʉsakami ane nɨkʉhunʉka kʉnsoko anyu.

21 "Ingɨ mʉntʉ nʉkʉnsuɨpa kʉʉlɨzania papa. 22 Tai ʉnene Ng’wana Mʉntʉ naakenda bʉlagwa anga naɨ ilagɨigwe, ingɨ ʉkaga mʉntʉ nʉkʉnsuɨpa."

23 Akatʉlikolya enso kʉ enso, nyenyu nʉɨkitʉma ikani nɨlanso.

24 Ʉkigela wikʉngumi mʉitʉmɨ kɨna nyenyu mʉkatɨao nʉsɨgɨɨwe kʉtula mʉkʉlʉ kʉkɨla ɨaʉya. 25 Yesʉ akaaɨla, "Atemi a mihɨɨ ɨtemaa ɨantʉ ao kʉngulu, nienso ɨlowaa kitangwa, ‘Aguna antʉ.’ 26 Ingi ʉnyenye ileke kʉtula itɨ, itɨ gwa ʉyʉ nʉmʉkʉlʉ wanyu, ʉtakɨwe watule mʉniino kʉkɨla mɨhi, nʉyʉ nɨmʉtongeeli ʉtakɨwe watule anga mʉtʉʉng’wa. 27 Kʉnsoko, nyenyu nɨmʉkʉlʉ, itɨɨ, ʉyʉ nʉikiɨ pihɨ walye ndya, ang’wi ʉyʉ nʉkʉatengela antʉ indya? Shanga ʉyʉne nʉikiɨ pandya walye! Nɨitɨ ga, ʉnene molɨ palʉng’wɨ nʉnyenye anga nɨmʉtugwa.

28 "Ʉnyenye mʉsagile nʉnene matungo ɨhi namageng’wa ane, 29 anga itɨ ʉ Tataane nʉntemilye ʉʉtemi, itɨ ʉʉgwa nʉnene kʉmʉtemya ʉnyenye ʉtemi. 30 Mʉhume kʉlya nʉkʉng’wa nʉnene mʉʉtemi wane, nʉ kikiɨ mʉ matuntu akɨtemi kʉilamʉla ndʉgʉ ikʉmi na ibɨɨlɨ nia Aisilaeli.

31 Yesʉ akalʉnga, "Ʉewe Simoni! Simoni! Tegeelya! Shetani walompa wamʉpenente ʉnyenye anga mʉntʉ nʉɨpenenta ɨngano. 32 Ingi ʉnene nʉkʉlompee ʉewe ʉhʉɨɨlɨ wako ʉleke kʉkepa. Nʉewe anga ʉnsʉkile, ʉakamatɨshe anyandʉgʉ ako."

33 Petelo akamʉsʉkɨɨlya, "Isekʉlʉ, ʉnene nihambile kendania nʉewe mʉkadulumu, hangɨ ga nʉkusha."

34 Yesʉ akamʉsʉkɨɨlya, "Petelo kʉʉila, ʉtikʉ nʉa lelo ɨyɨ nsambalʉme ɨze ɨkɨlɨ kʉkʉnkʉla, ʉewe ʉkʉtula wanihita nkʉa itaatʉ kɨna shanga ʉnɨngile."

35 Sʉnga ʉ Yesʉ akaakolya amanyisigwa akwe, "Apo naza nʉmʉtakile mʉlongole ɨzemɨagila anga nkapu ang’wɨ mbogoshi ampia ang’wɨ makwasa, aza mʉʉɨwe kɨntʉne?"

Akamʉsʉkɨɨlya, "Shanga aza kʉʉɨwe"

36 Yesʉ akaaɨla, "Itungo ɨlɨ, ʉyʉ nʉkete mbogoshi ampia nʉahole, nʉyʉ nʉkete nkapu nʉahole. Nʉ mʉntʉ wɨhi nɨmʉgila panga, nʉagʉlye mʉjʉlʉngʉ wakwe wagʉle panga ɨng’wɨ. 37 Kʉnsoko yandɨkilwe mʉ Nkani Nza niyang’wɨ Itunda, ‘Aɨ ʉɨkilwe iumbɨ lɨng’wɨ nɨagazi,’ ʉnene kʉmʉɨla ikani ɨlɨ lɨtakɨwe kʉkondanɨɨla kʉng’waane. Nɨnandɨkɨwe ʉnene atakɨwe kʉkondanɨɨla."

38 Amanyisigwa akalʉnga, "Isekʉlʉ goza apaitɨ ɨkolɨ panga ibɨɨlɨ."

Yesʉ akalʉnga, "Yakonda."

39 Papo gwa ʉ Yesʉ akapuma, akalongola mʉlʉgʉlʉ nʉla Mɨzeituni, anga naɨ ntendo akwe, amanyisigwa akwe akamʉtyata. 40 Naɨ wapika kʉng’wanso akaaɨla, "Lompi mʉleke kingɨla mʉ mageng’wa."

41 Sʉnga akaaleka akalongola kʉli iniino mʉntʉ nʉhumile kʉgʉma igwe, akatugama akalompa. 42 "Ʉewe Tata, anga ʉloeligwe, lwago ʉlʉ lʉleke kʉnihanga, shanga kʉʉlowa wane, ingɨ ʉlowa wako wʉwo ʉtʉlike." 43 Papo Malaɨka akamʉziila nʉkʉmʉkomya nkolo. 44 Yesʉ naɨ ʉkolɨ mʉʉwai ʉkʉlʉ, akalongoleka kʉlompa, akatʉla puma litutu nʉlɨhangaa sakami lɨkatonya pihɨ.

45 Naɨ wakondya kʉlompa, akaasʉkɨla amanyisigwa akwe, akaahanga alala tʉlo kʉnsoko aɨ ahʉsha. 46 Akaatambʉɨla, "Malala nɨkɨ? Ʉki mʉlompe, mʉleke kingɨla mʉmageng’wa."

47 Naɨ wakɨlɨ ʉkʉligitya nɨamanyisigwa akwe, iumbɨ laantʉ lɨkapika lɨtongeewe nʉ Yʉda, ʉng’wɨ mʉtʉmɨ ikʉmi na abɨɨlɨ nɨang’wa Yesʉ. Yʉda akalongola wamʉlamʉshe nʉkʉmʉlʉngɨla ʉ Yesʉ. 48 Yesʉ ingɨ akamʉɨla, "Yʉda. Itɨɨ, ʉkʉmʉsʉɨpa ʉ Ng’waa Mʉntʉ kʉmʉlʉngɨla?"

49 Amanyisigwa akwe naɨ amaine nanso akalʉnga, "Isekʉlʉ kʉateme na panga yitʉne?" 50 Ʉng’wi ao akamʉteme kʉtwɨ nʉipande nɨla kɨgoha, ʉng’wɨ nʉa mitʉmi nʉa mʉpolyi nʉ mʉkʉlʉ.

51 Papo ʉ Yesʉ akalʉnga, "Leka. Yakonda." Akamʉgutya ʉkʉtwɨ wa mʉntʉ ʉyʉ akamʉponia.

52 Sʉnga ʉ Yesʉ akaatambʉɨla apolyo nɨakʉlʉ, nɨakʉlʉ aasʉnja nyʉmba ang’wi Itunda nɨanyampala naɨazile kʉmʉamba. "Itɨɨ, mʉpembilye nipanga niidunkʉli kʉmamba anga kɨna ʉnene nɨmʉgazi? 53 Mahikʉ ɨhi naɨkolɨ nʉnyenye mitando la Nyʉmba ang’wi Itunda shanga aɨ mʉmambile. Ingɨ lɨlɨ itungo lanyu lʉkʉlʉ, lɨlɨ itungo nɨla ʉtemi nʉwa kiti."

54 Ʉʉgwa, akamʉamba, akamʉlongolya munyumba amʉpolyi nʉ mʉkʉlʉ. Petelo akamʉtyatɨɨla kʉlɨ. 55 Palʉganga aɨakɨɨye moto, nɨantʉ awa akikiɨ kʉʉpɨlɨmikɨɨlya, Petelo aɨwikiɨ nɨenso. 56 Mitʉmi ʉng’wɨ nʉakɨsʉngʉ akamʉona ʉ Petelo wikɨɨ palʉng’wɨ nɨenso, akamʉgondoola, akalʉnga, "Mʉntʉ ʉyʉ aza ɨpalʉng’wɨ nʉ Yesʉ."

57 Ingɨ Petelo akahita akalʉnga, "Nyenyu! Ʉnene shanga nʉmʉmanyile ʉ mʉntʉ ʉyʉ."

58 Itungo iniino, mʉntʉ mʉngɨɨza akamʉona ʉ Petelo akalʉnga, "Ʉewe mɨpalʉng’wɨ."

Petelo ingɨ akasʉkɨɨlya, "Ʉweadɨ shanga nene."

59 Anga kʉkɨla isaa lɨng’wɨ, mʉntʉ mʉngɨɨza akakomangɨɨla, "Kʉlʉ kʉʉlʉ mʉntʉ ʉyʉ wɨpalʉng’wɨ nʉ Yesʉ, ʉpembeeye kʉ Galilaya."

60 Ingɨ ʉ Petelo akalʉnga, "Ʉweadɨ, ɨkɨ nʉkʉkɨtambʉla shanga nɨkɨlɨngile."

Papo paapo, Petelo aɨ wakɨlɨ ʉkʉtambʉla, nsambalume ɨkakʉnkʉla. 61 Isekʉlʉ Yesʉ akapɨlʉka akamʉgoza ʉ Petelo, Petelo nʉng’wenso akaikɨmbʉka nkani yɨhi naɨ ʉtambʉɨwe ni Isekʉlʉ. "Lelo nsambalume ɨze ɨkɨlɨ kʉkʉnkʉla ʉewe ʉkʉnihita kataatʉ." 62 Papo ʉ Petelo akapuma kʉnzi, akaalɨka mʉnkolo nʉkʉlɨla.

63 Antʉ awo naɨ amʉambile ʉ Yesʉ akatula mʉbehʉla nʉkʉmʉkʉa. 64 Akamʉtunga mʉkako mʉmiho, akatula mʉkolya, "Pumya mʉloto kʉone nyenyu nʉkʉkʉile." 65 Akamʉtʉkɨɨlya itʉki niikʉlʉ yɨdʉ.

66 Naɨwela kɨdaʉdaʉ, ianza la anyampala aantʉ nɨapolyi nɨakʉlʉ nɨamanyisi amalagɨɨlyo ang’wa Musa akatankana akikiɨ palʉng’wɨ. Akamʉleta ʉ Yesʉ pantongeela ianza nɨlanso. 67 Ianza ɨlɨ lɨkamʉkolya ʉ Yesʉ, "Sikʉtambʉɨle. Itɨɨ ʉewe, yʉʉ wewe wɨ Kilisito nʉhoilwe ni Itunda?"

Yesʉ ingɨ akaatambʉɨla, "Anga nʉmʉɨle shanga mʉkʉhʉɨɨla, 68 hangɨ anga nʉmʉkolye ikolyo, shanga mʉkʉnsʉkɨɨlya. 69 Ingɨ kʉpumɨɨla itungo ɨlɨ ʉnene Ng’waa Mʉntʉ kikiɨ ipande nɨla ʉkʉlʉ nɨlang’wi Itunda nɨ mʉnyangulu."

70 Pang’wanso ianza lɨhi lɨkatambʉla, "Ʉʉgwa kʉlʉnge ʉewe wɨ Ng’wana wang’wi Itunda?"

Yesʉ nʉyo akalʉnga, "Nɨmʉkɨtambʉe ʉnyenye kɨko tai."

71 Ianza lɨkalʉnga, "Itɨɨ, kʉloilwe ʉkʉɨɨli ʉʉya nʉʉlɨ gwa? Sese kʉtegeeye ʉkʉtambʉla kʉmʉlomo wakwe."